Matthew 27
27
Jesus Pilate-muurrauruq
(Mark 15.1; Luke 23.1-2; John 18.28-32)
1Uvlaatchaurami iluqaġmiŋ aŋaiyyuliqsiqpaich umialiŋnaŋiḷḷu Jew-guruat sivunniuqatigiiŋarut Jesus-kun tuqutchukługu. 2Tavra qiḷiqsruiŋagaat, aasii aullautivlugu aitchuutigiŋagaat Pilate-mun kavanauruamun.
Judas Tuquruq
(Acts 1.18-19)
3 #
Ac 1.18, 19. Tavrali Judas, Jesus aitchuutigiriŋa, iḷitchuġikami Jesus tuqutaksraġuqtilaaŋanik nunuuraliŋaruq, aasii utiqtiłługich iñuiññaq qulit maniich aŋaiyyuliqsiqpaŋnun, umialiŋnanullu, 4uqallakłuni, Piḷuksiŋaruŋa aitchuutigivlugu tuqutautquvlugu patchisaitchuaq iñuk. Ilaisa kiuŋagaat, Suliqutauva taamna uvaptiŋnun? Qaunakkuiḷḷi iliŋnik. 5Tavra Judas miḷuqsautivlugich maniich ilaaguaqtauŋaruamun aŋaiyyuvikpaŋmi, ilaa aullaqłuni qimiñŋaruq inmiñik.
6Tavrali aŋaiyyuliqsiqpaich tiguvlugich maniich uqallaŋarut, Pitquratiguaŋaitchuq iksraukpata maniich aitchuutiqaġviŋmun aŋaiyyuvikpaŋmi, qanuq akigigai iñuktauruam. 7Tavra uqaaġutigiŋagaich, aasii tauqsiutigivlugich Utkutchirim Nunaŋanik, iḷuviġviksramik iglaaguruanun. 8Tavra taamna pisigivlugu taamna nuna atchiŋagaat Nunaŋa Augum paŋmapaŋmunaglaan. 9,10#Zec 11.12, 13.Tavrani taŋŋiqsauŋaruq uqautigiŋaraŋa uqaqtaata God-im Jeremiah-m, uqaqłuni, “Ilaisa tiguŋagaich iñuiññaq qulit maniich, aasii tauqsiutigivlugich utkutchirim nunaŋanun, piraksriutaatun Atanġum uvamnun. Tavra taapkua maniich iñugiaktilaaŋat Israel-guruat sivunniutigiŋakkaŋich akiḷiutigisukługich ilaanun.”
Jesus Apiqsruqtuġaa Pilate-gum
(Mark 15.2-5; Luke 23.3-5; John 18.33-38)
11Tavra Jesus makitaŋaruq sivuġaani kavanauruam, aasii kavanauruam apiġiŋagaa, Umialigivatin Jew-guruat? Jesus kiuŋagaa, Tainna uqallaktutin. 12Tavra ilaa saŋutkaluaġmanni aŋaiyyuliqsiqpaiḷḷu umialiŋnallu, kiulaiñŋagai. 13Kiisaimmaa Pilate uqallakpuq ilaanun, Tusaqsraġiŋitpigich qanutun iñugiaktigiruat uqautigikkaŋich ilipkun? 14Tavra Jesus kiuŋaitkaa sumikunnii, kavanauruaq aliuġutchapiaġataqługu.
Jesus Tuquruksraġuġaat
(Mark 15.6-15; Luke 23.13-25; John 18.39—19.16)
15Tavra niqinaqilimaaġmata Itqaunmik qulaurrusiqiviŋmun, kavanauruaq piḷġusiqaŋaruq anipkaivḷuni nallipayaaŋannik tigutaaqtat, iñuich pisukkaŋannik. 16Tavra tigutaaqtaqaŋarut iñugiiḷapiaġatamik, atiqaqtuamik Barabbas-mik. 17Tavra katinmata Pilate apiġiŋagai, Kimik anipkaitquvisiŋa? Barabbas-mik, naagga Jesus-mik taggisiqaqtuamik Christ-mik? 18Qanuq Pilate iḷisimaŋaruq killuġivlugu Jesus ilaiññun aitchuutigiŋatilaaŋanik inmiñun.
19Tavra Pilate isivġiipkaqtillugu isivġiġvium aquppiutaŋiñi, nuliaŋan tilisivigiŋagaa uqaluŋmik, Iḷaksianagu taamna nalaunŋaruaq iñuk, qanuq iłuiḷḷiuġutigillakkiga ilaa unnuapak siññaktuġivlugu.
20Tavra aŋaiyyuliqsiqpaiḷḷu umialiŋnallu maliksuktitchiŋarut iñuŋnik annaktitquvlugu Barabbas aasii tuqullugu Jesus. 21Tavra Kavanauruam apiġitqiŋagai, Nalliak ukuak iññuk anipkaquvisiuŋ? Iliŋisa kiuŋagaat, Barabbas. 22Pilate uqallautiŋagai, Aasii qanuġniaqpigu Jesus taggisiqaqtuaq Christ-mik? Iluqaġmiŋ uqallaŋarut, Kikiaktuutili aŋarrauramun. 23Tavra ilaan uqallautiŋagai, Summan, sumik pigiitchualiqiŋava? Tavra nipaallavsaaqsiññaŋarut, Kikiaktuutili aŋarrauramun. 24#Dt 21.6-9.Tavra Pilate iḷitchuġikami qanuġluni piyumiñaiññiqami, piallagniksraŋat isagutiniuraaqsiññaaqsimman, ilaa tigusiŋaruq imiġmik aasii iqaġivlugich argagni takkuanni iñusalaich, uqallakłuni, Uvaŋa patchisauŋitchuŋa uuma iñuum tuqutauniksraŋagun. Ilivsi pisiuŋ. 25Tavra iluqaġmiŋ iñuich kiuŋagaat, Tatavsausiaq tuqutauniŋagun uvaptiŋnun piḷi miqłiqtuptiŋnullu. 26Tavrani Pilate-gum anipkaŋagaa Barabbas, aasii ipiġaqtuqtitqaaqługu Jesus, aitchuutigiŋagaa kikiaktuutitquvlugu aŋarrauramun.
Aŋuyaktit Kipagigaat Jesus
(Mark 15.16-20; John 19.2-3)
27Tavrani aŋuyaktiŋisa Pilate aullautiŋagaat Jesus kavanauruam igluqpaŋanun, aasii katinŋagaich tamatkiqł̣ugich aŋuyaktauqatigiich avataanun Jesus. 28Tavra annuġaiyaŋagaat aasii atipkaqługu kavviġiksuamik annuġaanik umialiktun. 29Aasii niaquġusiŋarut kakiḷḷaġnaqtuanik qisiqsiutinik, aasii iḷivḷugu niaquanun, suli saakkiqł̣ugu qirugmik taliqpianun. Tavra sitquqłutiŋ sivuġaanun kipagiŋagaat uqaqłutiŋ, Sivisuruamik iñuuli umialgat Jews. 30Tavra tivvuaqtuŋagaat, suli tiguvlugu qiruk tigumiaġikkaŋa anauŋagaat niaquagun. 31Tavra kipautigianikamirruŋ, annuġaagiŋagaat, aasii atipkaqługich ilaan annuġaaŋi, aullautivlugu kikiaktuutisukługu aŋarrauramun.
Jesus Kikiaktuurrauruq Aŋarrauramun
(Mark 15.21-32; Luke 23.26-43; John 19.17-27)
32Tavra iglaullaġmiŋ, paaŋagaat iñuk Cyrene-miu, atiqaqtuaq Simon-mik. Taamna iñuk nunurivḷugu iqsruktinŋagaat Jesus aŋarrauraŋanik. 33Tavra tikiññamiŋ inimun atiqaqtuamik Golgotha, sivuniqaqtuaq niaquġruam inaanik, 34#Ps 69.21.tavrani aitchuŋagaat Jesus wine-mik imiksraŋanik, avuramik suŋŋamik. Tavra uullakkaluaqamiuŋ, imiġuŋiñŋagaa.
35 #
Ps 22.18. Tavra kikiaktuutianikamirruŋ aŋarrauramun, autaaŋagaich annuġaaŋi inmiŋnun saaptautigivlugich. 36Tavrani aquptaaqłutiŋ naipiqtuŋagaat. 37Aasii qulaanun niaquan iḷiŋagaat pasikkun ilaagun, taiguaġnaqtuaq, Uvva Jesus Umialgat Jew-guruat. 38Tavraptauq malġuk tigligayuktik kikiaktuutiŋammigaich, igḷua taliqpian tuŋaanun, suli igḷua saumian tuŋaanun.
39 #
Ps 22.7; 109.25. Suli iñuich tamaunnaaqtuat niaqulavigiraġaŋagaat nivliativlugulu pisaaŋŋatinik Jesus, 40#Mt 26.61; Jn 2.19.uqaqłutiŋ, Ilivich siquvsiyumaaŋaruatin aŋaiyyuvikpaŋmik aasii nappatqigḷugu uvluni piŋasuni, annauttuiñ iliŋnik. Iġñiġikpatin God-im, atqaġiñ aŋarrauramiñ. 41Tavraptauqsuli aŋaiyyuliqsiqpaich, piqatigivlugich iḷisaurriḷḷu pitquranik umialiŋnallu, kipagiŋagaat uqaqłutiŋ, 42Annaurriŋagaluaqtuq allanik, annautilaitchuq inmiñik. Umialiginiqparruŋ Israel, atqaġli paŋmapak aŋarrauramiñ ukpiġiliġñiaġikput. 43#Ps 22.8.Ukpiqtuq God-mun, uqaqłuniḷu Iġñiġinivḷuni God-mun. Kiasii tautuglakput God-mun annautisuŋmagaan paŋmapak. 44Taapkuaktauq tigligayuktik kikiaktuutiqatauruak ilaanun kipagiŋammigaak tainnatun.
Jesus Tuquruq
(Mark 15.33-41; Luke 23.44-49; John 19.28-30)
45Tavra uvlum qitiqqaġniŋaniñ piŋasunugataqtillugu taaqsiŋaruq nuna iluqani. 46#Ps 22.1.Tavra piŋasunukpalliġman Jesus nipatutilaamisun nivliŋaruq, Eli, Eli, lama sabachthani. Taamna sivuniqaqtuaq, God-iiŋ, God-iiŋ, summan suksraaqpiŋa? 47Tavra iḷaŋisa tamaani makitaruat tusaavlugu uqallaŋarut, Uvvauma ququulagaa Elijah. 48#Ps 69.21.Tavra iḷaŋat tavrauvvaa aqpamik tigusiŋaruq ivsaktaqtuamik, immiqł̣ugu wine-mik, iḷivḷugu qiruum nuvuanun, qaiñŋagaa ilaanun imiquvlugu. 49Aasiiḷi allat uqallaŋarut, Aannagu, naipiqtuġlakput Elijah qaiñiaġmagaan annautiyaqtuġlugu. 50Tavra Jesus nivlitqiŋaruq nipatuvluni aasii aniġniġiqł̣uni.
51 #
Ex 26.31-33. Tavra tavrani, talukiyaaŋa aŋaiyyuvikpaum aliŋaruq malġuułłuni, qulimiñiñ anmun. Tavrasuli nuna aulaŋaruq, uyaġagruallu quvluŋarut. 52Iḷuvviviiḷḷu aŋmaŋarut, suli iñugiaktuat God-im iñuŋi tuquŋaruat aŋiŋarut tuqqunmiñ. 53Suli qimaŋagaich iḷuvġuvisiŋ. Jesus aŋianiŋman tuqqunmiñ, Jerusalem-muŋarut aasii tautuŋagaich iñuich iñugiaktuat.
54Tavra aŋuyaktit atanauraŋata tamatkualu aŋuyaktauqatiŋisa munaqsriruat Jesus-mik, tautukługich nuna aularuaq sullu piraġaqtuat aliuġusuliŋarut aasii uqallakłutiŋ, Iḷumun una Iġñiġimagaa God-im. 55#Lk 8.2, 3.Tavra tavrani iñugiaŋammiut aġnat, qiñiqtuaqtuat uŋasiñiñ, maliŋaruat Jesus-mik Galilee-miñ, savautivlugu. 56Iḷagiŋagaat Mary Magdalene, Mary suli aakaŋak James-lu Joseph-lu, aakaŋaglu iġñakisa Zebedee-m.
Jesus Iḷuvviuġaat
(Mark 15.42-47; Luke 23.50-56; John 19.38-42)
57Tavra unnuksraaġman, suġalliruaq iñuk qaiŋaruq Arimatheamiñ, atiqaqtuaq Joseph-mik, iḷitchitquraummiñiqsuaq Jesus-mun. 58Ilaa ullautiŋaruq Pilate-mun aasii apiqsriaġivlugu timaa Jesus. Tavrani Pilate piraksriiŋaruq aitchuutigitquvlugu Jesus timaa Joseph-mun. 59Tavra Joseph atqaqługu timi, nimmaaŋagaa nutauruamik ukił̣haaġiqsuamik. 60Aasii iḷiŋagaa ilaan nanmiñiq nutaamun iḷuvviviŋmiñun, iḷuvviviḷiamiñun uyaġagruakun, aasii ilaan aksraliŋagaa uyaġagruaqpak upkurriutivlugu iḷuvviviŋmun, aasii aullaqłuni. 61Mary Magdalene allalu Mary aquppiŋaruk tavrani sanmivḷugu iḷuvvivik.
Munaqsrich Iḷuvviviŋmik
62Siqiñiq nipianiŋman, Jew-guruat nutauruaq uvluat isagutimman, aŋaiyyuliqsiqpaich Pharisees-lu kasimaqatigiŋagaat Pilate, 63#Mt 16.21; 17.23; 20.19; Mk 8.31; 9.31; 10.33, 34; Lk 9.22; 18.31-33.aasii uqallakłutiŋ, Kamanaaq, itqaumarugut qanuq taimña sagluqinnikti iñuuŋŋaġmi uqaŋatilaaŋanik, Uvlut piŋasut pianikpata aŋiñiaqtuŋa. 64Taamna pisigilugu iḷuvvivik anayanaiyaqtillugu uvluk piŋayuaŋnunaglaan, iḷaanni iḷitchitquraŋisa qaiḷutiŋ tiglikpiaġaat aullautilugu, aasii iñuich uqautiaqsiḷugich, Ilaa aŋiñiḷugu tuqqunmiñ, aasii taimma aqulliq saglutaun pigiił̣haaġluni sivulliġmiñ. 65Pilate uqallautiŋagai, munaqsriqaqtusi aŋuyaktinik anayanaiyaġiaqsiuŋ piyumiñaqtilaavsisun. 66Tavra aullaqłutiŋ anayanaiyaŋagaat iḷuvvivik aŋmaqsausiqaġnaiqł̣ugu nalunaiñŋutchiqsuqługu nalunaiñŋutamiŋnik munaqsriḷiqł̣ugulu aŋuyaktinik.
ទើបបានជ្រើសរើសហើយ៖
Matthew 27: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
