Matthew 26
26
Sivunniuġun Tuqutchukługu Jesus
(Mark 14.1-2; Luke 22.1-2; John 11.45-53)
1Tavra Jesus naannamigich iluqaisa tamatkua iḷisaurrutit, ilaan uqallautiŋagai iḷitchitqurani, 2#Ex 12.1-27.Iḷisimarusi uvluk malġuk pianikpaŋnik Qulaurrusiqiviŋmun itqaun tikiññiaqtuq, aasii Iġñiŋa Iñuum aitchuutauniaqtuq kikiaktuurrautqulugu aŋarrauramun.
3Tavra aŋaiyyuliqsiqpaich umialiŋnaŋiḷḷu Jew-guruat katinŋarut igluqpaŋanun aŋaiyyuliqsiqpaich qaukłiata, atiqaqtuam Caiaphas-mik. 4Aasii sivunniugaqsivḷutiŋ atautchimi tigutaallasiñiaqsaqługu Jesus nalunautchiḷutiŋ, aasii tuqullugu. 5Tavra uqallaŋarut, Niqinaqiŋŋaisaaglaan piññagu, tuavaallakpiaqtut iñuich.
Jesus Tivraġiksaġaa Bethany-mi
(Mark 14.3-9; John 12.1-8)
6Tavra Jesus Bethany-miinman isiġmiupkaqługu igluani Simon kiḷḷiġruaqtuqtuam, 7#Lk 7.37, 38.aġnaq ullautiŋaruq ilaanun piqaqłuni misuġuqtuunmik uyaġagmik akisupiaġataqtuamik tivraġiksaunmik. Aasii kuviŋagaa Jesus niaquanun, niġipkaqtillugu. 8Tavra iḷitchitqurat tautukamirruŋ, piavsaŋarut uqaqłutiŋ, Summan asiñun tivraġiksaun atuqpa? 9Qanuq una tivraġiksaun tuniyumiñaŋagaluaqtuq manisalaŋnun, aasii aitchuutigilugich maniich iḷiappauruanun. 10Tavra Jesus, nalunaigivlugu taamna uqallautiŋagai, Summan isumaaluksaaqpisiuŋ aġnaq? Qanuq savaaqaŋaruq savaalluatapiamik uvamnun. 11#Dt 15.11.Ataramik nayuqtigigisi iḷiappauruat, aglaan uvaŋa nayuqtiginiaŋitkivsiŋa ataramik. 12Kuvikamiuŋ una tivraġiksaun timimnun savaaġigaa itqanaiyautauvlugu iḷuvġuniksramnun. 13Iḷumun uqallautigivsi, sumipayaaq manna tusaayugaaġiksuaq alġaqsruutaukpan nunapayaani, aġnam savaaġiŋaraa quliaqtuaguniaqtuq itqaummatauluni ilaanun.
Judas Aŋiqtuq Aitchuutigisukługu Jesus
(Mark 14.10-11; Luke 22.3-6)
14Tavra iḷaŋat qulit malġuk iḷitchitqurat, atiqaqtuaq Judas Iscariot-mik, aŋaiyyuliqsiqpaŋnuŋaruq 15#Zec 11.12.aasii uqallakłuni, Sumik aitchuġniaqpisiŋa aitchuutigigupku Jesus ilivsiññun? Tavra akiḷiñŋagaat iñuiññaq qulitun maniŋñik. 16Tavra tavraŋŋaaglaan Judas ivaqłiaŋaruq piviksramik aitchuutigisukługu Jesus.
Jesus-lu Iḷitchitquraniḷu Niġirut Itqautim Qulaurrusiqiviŋmun Niqinaqiviani
(Mark 14.12-21; Luke 22.7-14, 21-23; John 13.21-30)
17Sivullianni uvluŋisa Niqinaqivium Puvlaksautaitchuamik punniġmik, iḷitchitqurat ullaŋagaat Jesus apiġivlugu, Sumi itqanaiyaquvisigut qulaurrusiqiviŋmi nullautchiġviksraġnik? 18Ilaan kiuŋagai, Aullaġitchi nalaagun iñuŋmun iniqpaŋmiittuamun, aasii uqallautilugu, Iḷisaurri uqallaktuaq, Ikarraġa tikitchuq, qulaurrusiqiniq niġisukkiga uvaŋalu iḷitchitquratkalu igluŋni. 19Tavra iḷitchitqurat piŋarut Jesus piraksriutaatun inmiŋnun, aasii itqanaiyaqługu qulaurrusiqiniġmi nullautchiġviksraqtiŋ.
20Unnuksraaġmagu, Jesus aquvinŋaruq niġġiviŋñun piqatigivlugich qulit malġuk iḷitchitqurani. 21Tavra niġiñiallaġmiŋ, Jesus uqallaŋaruq, Iḷumun uqallautigivsi, iḷavsi aitchuutiginiaġaaŋa. 22Tavra iliŋich isumaalipiaġataŋarut, aasii uqallallaagaqsivḷutiŋ ilaanun, Ataniiq, sivuniġiviŋa uvaŋa? 23#Ps 41.9.Jesus kiuŋagai, Ilaaguruq taamna misuksiqatauruaq punniġmik uvamnun puggutauramun, ilaan aitchuutiginiaġaaŋa. 24Iġñiŋa Iñuum tuquniaqtuq taŋŋiġḷugich aglausimaruat inmigun Bible-ni. Aglaan isumaaġutiqpaqaġli taamna iñuk aitchuutiginniktuaq Iġñiŋanik Iñuum. Iłuałhaaŋanayaqtuq taamna iñuk iñuuŋaitkumi. 25Judas, aitchuutigiriksrautaa, uqallaŋaruq, Iḷisaurrii, Uvaŋauva? Jesus uqallautiŋagaa, Tainna uqallaaniktutin.
Atanġum Nullautchiġvia
(Mark 14.22-26; Luke 22.14-20; 1 Corinthians 11.23-25)
26Tavra niġiḷḷaġmiŋ Jesus tiguŋagaa punniq, aasii aŋaiyyuvluni quyyatigivlugu aviŋagaa, aasii aitchuutigivlugu iḷitchitquranun uqallakłuni, Tigulugu niġġisiuŋ, tavra timiga. 27Suli tiguŋagaa qallugauraq, aasii quyaanikami God-mun, qaiñŋagaa ilaiññun, uqallakłuni, Imiġitchi tavraŋŋa, iluqasi. 28#Ex 24.8; Jr 31.31-34.Tavra taamna auga maqipkaqtauyumaaqtuaq iñugiaktuanun. Taavrumuuna God-im nalupqinaiġñiaġaa sivunniuġutini iñuŋnun suliqutigiŋaiġḷugich itqaumayumiñaiġḷugich piḷuutiŋich. 29Uqallautigivsi imitqigñiaŋitchuŋa uumaŋŋa napaaqtuayaam siiġñaŋan ivsaŋaniñ, tikiḷġataqtillugu taamna uvluq imiġniksraq nutaulugu piqatigilusi Aapama atanniqsimaviani. 30Tavra atuanikamiŋ aŋaiyyunmik aniŋarut, Iġġimuksaqłutiŋ Olives-mun.
Jesus Uqautigigaa Piŋaiñŋaan Peter-m Piiḷaaġniksraŋa
(Mark 14.27-31; Luke 22.31-34; John 13.36-38)
31 #
Zec 13.7. Tavra Jesus uqallautiŋagai, Iluqasi qimaŋniaġivsiŋa suksraaġluŋa uumani unnuami, qanuq aglausimaruq Bible-ni God uqallagnivḷugu inna, “Uvaŋa tuqunniaġiga imnaiḷiqiri, aasii imnaich siaminniaqtut.” 32#Mt 28.16.Aglaan aŋipkaqtauganikkuma aullaġniaqtuŋa sivuvsiññi Galilee-mun. 33Peter uqallaŋaruq Jesus-mun, Iluqaġmiŋ qimakkaluaqpatin suksraaġlutin, uvaŋa sumikunnii qimakkumiñaitkikpiñ. 34Jesus uqallautiŋagaa, Iḷumun uqallautigikpiñ, Anaqapak uvva piiḷaaġiniaġiŋma piŋasuni naluniḷuŋa tiŋmiaq nipatkaluaqtinnagu. 35Peter-m kiuŋagaa, Tuquqatigiraksraġigupkiñunnii, piiḷaaġiyumiñaitkikpiñ sumikunnii. Tainnaptauq uqallagaŋammiut iluqaġmiŋ iḷitchitqurat.
Jesus Aŋaiyyuruq Gethsemane-mi
(Mark 14.32-42; Luke 22.39-46)
36Tavra Jesus aullaqatigiŋagai iḷitchitqurani inimun atiqaqtuamun Gethsemane-mik, aasii ilaan uqallautiŋagai iḷitchitqurani, Aquvittitchi uvuŋa, ikuŋa aŋaiyyuyaqtuġniaqtuŋa. 37Aasii piqasiutivlugich ilimiñun Peter-lu malġuglu iġñiŋik Zebedee-m, ilaa ipiqtutcharraqsiŋaruq iłuiḷḷiurraqsivḷuniḷu. 38Tavrani uqallaŋaruq ilaiññun, Isumaaliqpaił̣ł̣uŋa tuquaqsiruatununnii iḷiruŋa, tavraniittitchi, aasii quviqtaiḷiqasiġḷuŋa. 39Aasii taikuŋaqtaallakłuni isumaaqpaił̣ł̣uni ulġuŋaruq nunamun, aasii aŋaiyyuvluni inna, Aapaaŋ, piyumiñaqpan, piiġuŋ nagliksaaġutiqpak uvamniñ, aglaattauq uvaŋa pisuutiŋił̣aaptun, aglaan ilivich pisuutiptun.
40Tavra Jesus utiŋaruq piŋasunun iḷitchitquramiñun aasii tautuŋagai siñiktuat. Tavra uqallautiŋagaa Peter, quviqtaiḷiyumiñaiñŋavich atautchimiunnii ikarraġmi? 41Quviqtaiḷisitchi aŋaiyyusitchiḷu, iḷaanni payaripkaqpiaqtusi ikł̣igutchaktinniaġunmun. Iḷumun ilitqusisi piyummatiqaġaluaqtut, timisi sayaitchut.
42Tavra Jesus aullavsaaŋaruq igḷuvlugu aasii aŋaiyyuvluni, Aapaaŋ, pisuutigigupku nagliksaaqpaktuksrauluŋa, pisuutin piḷi. 43Tavra utaqqikamigich, tautuvsaaŋagai siñiktillugich, qanuq iriŋich pillitchiŋarut.
44Tavra Jesus qimatqiŋagai, aullaqłuni aŋaiyyuvsaaŋaruq piŋatchiqł̣ugik, uqalugivlugich taapkuasuli uqaluich. 45Tavra uttaqiŋagai iḷitchitqurani, aasii uqallautivlugich, Tavrasuli siñikpisi piḷaiŋaiqsiaqłusi. Uvva, aitchuutauniksraŋa Iġñiŋan Iñuum tikitchuq aŋalataġiyumiñaqsivḷugu piḷuktuanun iñuŋnun. 46Makittitchi. Aullaqta. Tautuksiuŋ uvva aitchuutigiriga uvaniittuq.
Tigurauruq Jesus
(Mark 14.43-50; Luke 22.47-53; John 18.3-12)
47Jesus uqaġniaqtillugusuli Judas qaiŋaruq, iḷaŋat qulit malġuk, piqatiqaqłuni iñusalaŋnik savikpiraqtuanik anautchiraqtuaniglu, qairuanik aŋaiyyuliqsiqpaŋniñ umialiŋnaŋiññiḷḷu Jew-guruat. 48Tavra aitchuutiginniktuam piqatini nalunaiñŋutaksriñŋagai, uqallakłuni, Tavrauniaqtuq iñuk kisu kunikkupku, tigusaġiksi. 49Tavra Judas qaiŋaruq Jesus-mun tavrauvvaa aasii uqallakłuni, Tutqigiñ Iḷisaurrii, aasii kunikł̣ugu. 50Jesus uqallaŋaruq ilaanun, Avilaitqaan, piñasuaġuŋ piyaqtukkan. Tavra iliŋich qaivḷutiŋ tigguġluŋagaat Jesus. 51Tavrali iḷaŋata taapkua tuvaaqatauruat Jesus-mun amuŋagaa savikpani, aasii anauvlugu kivgaŋa aŋaiyyuliqsiqpaich qaukłiata, aasii siutaiqł̣ugu. 52Tavrani Jesus uqallautiŋagaa, Utiqtirruŋ savikpaiñ puuŋanun, qanuq tamatkua iluqaġmiŋ savikpagaqtuat tuquniaqtut savikpakun. 53Isumavich ikayuqtaiḷiqiyumiñaiññasugaluŋa Aapamnun, aasii ilaa tavrauvvaa tilisiḷuni uvamnun qulit malġugnik 6,000-gullaaruanik isaġulignik. 54Aglaan taamna tainna pigaluaqpan qanuġlutiŋ Bible uqaluŋich taŋŋiġñiaqpat, uqaluqaqtuat aitchuutauniaġnivḷuŋa.
55 #
Lk 19.47; 21.37. Tavrani Jesus uqallautiŋagai iñusalaich, Qaiŋavisi tigligayuktimik pisaġmatun, savikpagnik anauttaniglu satkuqaqłusi tigusaqtuqłuŋa? Uvlumiñ uvlumun aquppigaluaġaqtuŋa aŋaiyyuvikpaŋmi iḷisaurrivḷuŋa, aasii tigguġlulaitkivsiŋa. 56Aglaan tamarra tamatkua pirraqsirut Bible uqaluŋich uqaqtiŋigun God-im taŋŋiqsautquvlugich. Tavrani iluqaġmiŋ iḷitchitqurat qimaŋagaat aasii pigruqłutiŋ.
Jesus Apiqsruqtuġaat Uqaqsitaaġviŋmi
(Mark 14.53-65; Luke 22.54-55, 63-71; John 18.13-14, 19-24)
57Tavrani taapkua tiguriruat Jesus-mik aullautiŋagaat Caiaphas-mun, aŋaiyyuliqsiqpaich qaukłiannun, iḷisaurriḷḷu pitquranik, umialiŋnallu katirviannun. 58Tavra Peter-m maliŋagaa uŋasiuraaqługu, siḷalliġuaŋanunaglaan inaanun aŋaiyyuliqsiqpaich qaukłiata aasii isiqłuni ilaan aquptaaqatigiŋagai munaqsrich qiñiġukłuni isuanunaglaan. 59Tavra aŋaiyyuliqsiqpaiḷḷu iluqaġmiglu uqaqsitaaqtitchirit ivaqłiaŋarut patchisiksranik saglutigilugu uqautigisukługu Jesus, tuqutchukługu. 60Tavra paqillaiġutiŋarut pasikkutiksranik, qanutun iñugiaktigigaluaqtut saglutikun uqautiginniktuat ilaanik. Kiisaimmaa malġuk saavitpuk, 61#Jn 2.19.aasii uqallakłutiŋ, Uvvauna iñuk uqallaŋaruaq, Uvaŋa suksraunġiġumiñaġiga God-im aŋaiyyuvikpaŋa, aasii nappatqigḷugu uvluni piŋasuni.
62Tavra aŋaiyyuliqsiqpaich qaukłiat makiłłuni uqallaŋaruq Jesus-mun, Kiggutiksraitpich sumik ukuak iññuk uqautikkutaagnik ilipkun? 63Tavra Jesus nipaiñŋaruq. Tavra aŋaiyyuliqsiqpaich qaukłiata uqallautiŋagaa, Apiġipiaġikpiñ sivuġaani iñuuruam God-im, uqallauttutigut Christ-guvich, Iġñiŋa God-im? 64#Dn 7.13.Jesus kiuŋagaa, Uqallaaniktutin tainna. Aglaan uqallautigivsi qakugukpan tautugniaġiksi Iġñiŋa Iñuum aquppiruaq taliqpiata tuŋaani Sapiġñaqtuam, aasii qaimmiḷuni nuvuyaŋigun qiḷaum. 65#Lv 24.16.Tavrani aŋaiyyuliqsiqpaum aligaaŋagaa annuġaani, aasii uqallakłuni, Inmiñik iḷiuqtuq God-itun. Iñuvsaanik pasiññiktuksranik ilaanik piqaqtuksrauŋaiqsugut. Ilivsi paŋmapak tusaaganikkiksi uqamaqłuutaa. 66Qanuq sivunniivisi? Ilaisa kiuŋagaat, Tuquruksraġuqtuq.
67 #
Is 50.6. Tavrani tivvuaqturraqsiŋagaat kiiñaŋagun, qakiqsimmaan, suli iḷaŋisa iqsraaqsimmaan, 68uqaqłutiŋ, Nalautchaġiñ, Christ-guruatiin, kia qakiqpatin?
Peter-m Piiḷaaġigaa Jesus
(Mark 14.66-72; Luke 22.56-62; John 18.15-18, 25-27)
69Tavrali Peter aquppiŋaruq siḷalliġmi. Aasii aŋaiyyuliqsiqpaich qaukłiata niviaqsiaq kivgaŋa ullakługu Peter uqallautiŋagaa, Itqatigiŋammigiñ Jesus Galilee-ġmiu. 70Peter piiḷaaŋaruq takkuanni iluqaġmiŋ, uqallakłuni, Naluruŋa sumik uqautiqaqtilaavsiññik. 71Tavra ilaa animman qanitchaġuanun, allam niviaqsiam kivgam tautuŋagaa, aasii uqallautivlugich tamaani makitaruat, Uvvauna iñuk piqatauruaq Jesus-mun Nazareth-miumun. 72Tavra Peter piiḷaatqiŋaruq suaŋasivḷugu, Nalugiga iñuk. 73Akkulivsaallagman tamaani makitaruat ullakługu uqallautilgitkaat Peter, Nalupqinaitchuamik iḷagigaatin taapkua, qanuq uvva uqausipkun iḷisimanaqtutin. 74Tavra Peter suammakłuni uqallaŋaruq, God-im tatavsaġliŋa uqaŋitkuma iḷumun ittuamik. Nalugiga kiutilaaŋa iñuk uqautigikkaqsi. Aasii tavrauvvaa tiŋmiaq nipanŋaruq. 75Tavra Peter itqaiŋaruq Jesus uqallautiŋiñik inmiñun inna, Tiŋmiaq nipanŋaunnagu, piiḷaaġiniaġiŋma piŋasuni. Tavra anivḷuni qiaqpaŋaruq.
ទើបបានជ្រើសរើសហើយ៖
Matthew 26: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
