Matthew 28
28
Jesus Aŋiruq Tuqqunmiñ
(Mark 16.1-10; Luke 24.1-12; John 20.1-10)
1Tavra Jew-guruat Itchaksriġmata Savaiññiŋat qaaŋiġman, qausaġataaqsimman, Mary Magdalene allalu Mary tautugiaŋagaak iḷuvvivik. 2Tavra tavrani nuna aulaqpaŋaruq, qanuq isaġulgata Atanġum atqaqłuni qiḷaŋmiñ aksraktinŋagaa uyaġagruaq, aasii aquppiutchiutivlugu. 3Ilaan qiññaŋa inŋaruq igniġuuqpatittuatun, annuġaaŋiḷu qatiqtigivlutiŋ aputitun. 4Tavra iqsigivlugu aŋuyaktit munaqsrich uuliksiŋarut aasii irrusiñikłutiŋ tuquŋaratun iñuktun.
5Tavra isaġulik uqallaŋaruq aġnagnun, Iqsiñatik, qanuq iḷisimaruŋa ivaġiktik Jesus kikiaktuurrauŋaruaq aŋarrauramun. 6Uvaniinŋitchuq, qanuq aŋiŋaruq uqausiġmisun. Qaisitchik, tautugiatku ini nallavia. 7Tavraasii aullaġitchik qilamik, aasii uqallautilugich iḷitchitquraŋi aŋiñiḷugu tuqqunmiñ. Aasiuvva, ilaa ayuniaqtuq sivuvsiññi Galilee-mun. Taamani tautugniaġiksi. Uvva, uqallautigivsi. 8Tavra aullaqsaaluŋaruk qilamik iḷuvviviŋmiñ iqsisigillaan quviasukpakłutiglu, aasii aqpamik uqallautiyaqtuŋagaich iḷitchitqurat.
9Tavrasuli Jesus kasuŋagik aasii uqallautivlugik, Tutqiutiqaġitchik. Tavra ullakługu tiguŋagaak isigaŋigun aasii aŋaiyyuvigivlugu. 10Tavrani Jesus uqallautiŋagik, Iqsiñatik. Aullaġlutik uqallautiyaqtutkik aniqatiitka aullaqulugich Galilee-mun. Taamani tautugniaġaanŋa.
Quliaqtuaqtut Munaqsrich
11Tavrali aġnak igliqtillugik, iḷaŋich aŋuyaktit munaqsrich aullaġniqsut iniqpaŋmun aasii quliaqtuaġutivlugich aŋaiyyuliqsiqpaich iluqaiññik piruanik. 12Tavra aŋaiyyuliqsiqpaich katinnamik atautchimun piqatigivlugich Jew-guruat umialiŋnat suli sivunniuganikłutiŋ, aitchuŋagaich manisalagnik aŋuyaktit, 13aasii uqallautivlugich, Uqautiyumagisi iñuich iḷitchitquraŋiñun qaivḷutiŋ unnuami tigligniḷugu timaa, aullautivlugu siñiktillusi. 14Taamnaasii kavanauruam tusaaniqpagu, iviġaumapkaġniaġikput aasii qanuqtinŋiḷḷusi. 15Tavra aŋuyaktit munaqsrich akuqtuŋagaich maniich aasii pivḷutiŋ piraksriusiamiktun. Aasii taamna quliaqtuaq siaminŋaruq Jew-guruani uvlupaŋmunaglaan.
Jesus Niptaqtuq Iḷitchitquramiñun
(Mark 16.14-18; Luke 24.36-49; John 20.19-23; Acts 1.6-8)
16 #
Mt 26.32; Mk 14.28. Tavra qulit atautchimik iḷitchitqurat aullaŋarut Galilee-mun, iġġimun Jesus nalunaiqsaġiŋaraŋanun inmiŋnun. 17Tavra tautukamirruŋ Jesus, aŋaiyyuvigiŋagaat, aglaan iḷaŋich nalupqisuŋarut. 18Tavra Jesus qalliḷaaqługich uqallautiŋagai, Ataniġnaqusiqsauŋaruŋa aŋalataġiyumiñaqsivḷugich qiḷaŋmiittuat nunamiittuallu. 19#Ac 1.8.Tavraasii aullaġitchi aasii iḷitchitquraliuġlusi nunapayaaniñ, paptaiġḷugich atqagun Aapam Iġñiġuvlu Ilitqusiġiksuavlu, 20iḷisautilugich kamaksritqulugich iluqaiññik piraksriutigiŋaramnik ilivsiññun. Aasiuvva, itqatigigivsi ataramik, isuanunaglaan nunam.
ទើបបានជ្រើសរើសហើយ៖
Matthew 28: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
