Matthew 25
25
Uuktuun Qulitigun Niviaqsiatigun
1 #
Lk 12.35. Taivrumani uvlumi, iñuich atanniqsimapkaqtuat Taavrumuŋa qiḷaŋmiittuamun inniaqtut qulitun niviaqsiatun, tiguvlugich qullisiŋ aullaqtuatun paaqsaqługu uiksraun. 2Tallimat taapkunani isumatupiaŋitchuat, aasii tallimattauq isumaturuaguvlutiŋ. 3Isumatupiaŋitchuat pikamisigiŋ qullisiŋ, uqsritqiutiksraiḷaġniqsut. 4Aglaan isumaturualli uqsritqiutiksraligaaġniġaich qullisiŋ. 5Tavra uiksraun qaiḷḷaiġutipkaqługu niviaqsiat nayaŋaġaluaqamiŋ siquŋarut.
6Tavra unnuaq qitiqqaġman nivliqsut, Marra uiksraun. Qaisitchi paaqsiuŋ. 7Tavra qulit niviaqsiat iluqaġmiŋ makinŋarut aasii tatqikł̣ugich qullisiŋ. 8Tavra isumatupiaŋitchuat uqallaŋarut isumaturuanun, uqsriutiksritchigut. Qullivut marra qamiaqsirut. 9Isumaturuagutiŋisa kiugiññaŋagaich, Iḷaanniuvagut naamaniaŋitkisiuraaġmiugut uvaptiŋnullu ilivsiññullu. Aullaqsiññaġitchi tuniaksraliŋnun aasii tauqsiġḷusi uqsruksravsiññik. 10Tavra isumatupiaŋitchuat niviaqsiat tauqsiġiaqtillugich uqsriutiksramiŋnik uiksraun qaiŋaruq, aasii taapkua tallimat itqanaitchuat isumaturuat isiqatigillaksiññaqługu katirrusiqinikun niqinaqiniaqtuanun, aasii upkuaq umikługu.
11 #
Lk 13.25. Aquvatigulli alġaiŋich niviaqsiat qaiŋammiut. Ququulaŋarut, Ataniiq, Ataniiq, upkuiġutisigut. 12Ilaan kiuŋagai, Nalupiaġivsi. 13Tavra Jesus uqallaŋaruq, Quviqtaiḷisitchi, qanuq nalugiksi uvluq naagga ikarraq Iġñiŋan Iñuum qaġġiviksraŋa.
Uuktuun Piŋasutigun Kivgatigun
(Luke 19.11-27)
14 #
Lk 19.11-27. Taivrumani uvlumi, iñuich atanniqsimapkaqtuat Taavrumuŋa qiḷaŋmiittuamun inniaqtut kivgaŋisun iñuum aullaaqsiruam. Qaitquŋagai kivgani aasii qaunaksriḷiutivlugich suġauttamiñun. 15Iñullaa aitchuŋagaa piḷḷatilaallaaŋatun. Atausiq kivgaq aitchuŋagaa 5,000 taalanik. Tuglia aitchuŋagaa 2,000 taalanik. Aasii allasuli 1,000 taalanik. Aasii aullaqłuni. 16Taamna kivgaq aitchuusiaqaqtuaq 5,000 taalanik aullaqłuni tavrauvvaa tauqsiġñiutigiŋagai manniusiani, aasii piññautigivlugich 5,000 taalavsaanik. 17Tainnatuttauq, taamna tugliuruaq kivgaq aitchuusiaqaqtuaq 2,000 taalanik piññaŋaruq 2,000 taalavsaanik. 18Aglaan taamna kivgaq aitchuusiaqaŋaruaq 1,000 taalanik aullaŋaruq, nivakługu nuna iriŋagai ataniġmi maniŋi.
19Tavra sulluataġman atanġat taapkua kivgat utiŋaruq aasii makpiġarriqutiaqsivḷugich. 20Tavra taamna kivgaq aitchuusiaqaŋaruaq 5,000 taalanik saavinŋaruq, qaitchivḷugu 5,000 taalavsaanik. Ataniiq, qaitchiŋakkaġma 5,000 taalanik, uvva piññavsaaqtuŋa 5,000 taalavsaanik. 21Ilaan atanġata uqallautiŋagaa, Piḷḷuataqtutin, nakuuruatiin ukpiġnaqtuatiillu kivgaaq. Ukpiġnaŋarutin aŋalatchiñipkun manił̣auranik, inillagniaġikpiñ aŋalatchiḷḷasiḷutin manisalagnik. Qaiḷutin quviasuqatigiyaqtuŋŋa. 22Aasiivsauq taamna kivgaq aitchuusiaqaŋaruaġli 2,000 taalanik saavinŋammiuq. Ataniiq, qaitchiŋagiŋma 2,000 taalanik. Uvva piññavsaaqtuŋa 2,000 taalavsaanik. 23Atanġata uqallautiŋagaa, Piḷḷuataġniqsutin, nakuuruatiin ukpiġnaqtuatiillu kivgaaq. Ukpiġnaŋarutin aŋalatchiñipkun manił̣auranik, inillagniaġikpiñ aŋalatchiḷḷasiḷutin manisalagnik. Qaiḷutin quviasuqatigiyaqtuŋŋa. 24Tavrali kivgaq aitchuusiaqaŋaruaq 1,000 taalanik saavinŋammiuq, aasii uqallakłuni, Ataniiq, iḷisimagikpiñ suamaruatiin iñuk, kivrisuuvlutin palauvaksranik nautchirriġvigiŋaisaġnun, katitchisuuvlutillu palauvaksranik kanġaqsruivigiŋisaġniñ. 25Tavraasii sivuuġavluŋa aullaŋaruŋa, aasii iriqługich manisalaktin nunamun. Uvva pisin pigigitin. 26Tavra atanġata kiuŋagaa, Piḷuktuatiin iqiasuuruatillu kivgaaq. Iḷisimaŋagaluaqtutin kivrisuutilaamnik nautchirriġvigiŋaisamnun, suli katitchisuutilaamnik palauvaksranik kanġaqsruivigiŋisamnun. 27Tavra ilivich manitka ikiyumiñaŋagaluaġitin naggutinnagnaqtuamun maniqaġviŋmun, aasii qaiguma aitchuusiaqaġluŋa taapkuniŋa uvaŋa pimñik, naggutiŋiññiglu. 28Tavra pisigik taapkua manisalaich ilaaniñ, aasii aitchuutigilugich taavrumuŋa maniqaqtuamun 10,000 taalanik. 29#Mt 13.12; Mk 4.25; Lk 8.18.Kiñaliqaa aŋalatchiḷḷuataqtuaq aitchuusiamiñik aitchuusiaqavsaaġniaqtuq, aasii sippaksraqaġmiḷuni. Aglaan taamna naurrutinnaŋitchuaq mikiruuraqunnii pigikkaŋa piiqsauniaqtuq ilaaniñ. 30#Mt 8.12; 22.13; Lk 13.28.Aasiiḷi una anniqsuutauŋitchuaq kivgaq igitchiuŋ taaġniqsramun. Tavrani iñuich qianiaqtut tiriqtinniaġaiḷḷu kigutitiŋ.
Nation-guruat Isivġiusiaksraŋat
31 #
Mt 16.27;
Mt 19.28. Tavra Iġñiŋa Iñuum qaikpan umialiguġluni, piqatigilugich iluqaisa isaġulgich, tavrani ilaa aquvinniaqtuq kamanaqtuani umialgunikun aquppiutamiñi. 32Nation-guruat iñupayaat sivuġaanun katinniaqtut, aasii ilaan aviŋniaġai imnaiḷiqiri avgiruatun imnaiñik imnaiñiñ nagruliŋniñ, 33Aasii ilaan inillagniaġai imnaich taliqpiŋmi tuŋaanun, aglaalli nagruqaqtuat saumiŋmi tuŋaanun. 34Tavrani Umialik uqallagniaqtuq taapkunuŋa taliqpiŋmi tuŋaaniittuanun, Qaisitchi, iviġaumakkusiaqaqtuasii Aapamniñ, kiŋuvaannaktaaġisiuŋ God-im atanniqsimavia ini itqanaiyaaguruaq ilivsiññun nunaqaŋa savaagumman. 35Qanuq kaaktuaguŋaruŋa aasii niqiksriñŋagivsiŋa. Imiġuksiuŋaruŋa aasii imiksriñŋagivsiŋa. Iglaaguŋammiuŋa aasii paġlaŋagivsiŋa aimaaġvivsiññun. 36Annuġaagiñŋaruŋa aasii annuġaaqtinŋagivsiŋa. Naŋinŋaruŋa aasii qaunagiŋagivsiŋa. Tigutaaġviŋmiinŋaruŋa aasii ullaŋagivsiŋa. 37Tavrani iñuich nalaunŋaruat kiuniaġaat, Ataniiq, qaŋa tautuŋavisigiñ kaakavich aasii niġipkaqłutin, naagga imiġuktillutin aasii imiqtiłłutin? 38Suli qaŋa tautuŋavisigiñ iglaagukavich aasii paġlavlutin aimaaġvivsiŋñun, naagga annuġaaksraiññavich aasii annuġaaqłutin? 39Suli qaŋa tautuŋavisigiñ naŋinnavich naagga tigutaaġviŋmi innavich, aasii takuvlutin? 40Tavrali Umialgum kiuniaġai, Iḷumun uqallautigivsi, savaaġikavsiuŋ atautchimununnii naglignaġniqsramun makua aniqatiima iḷaŋannun, ilivsi savaaġiŋagiksi uvamnun. 41Tavraliasii ilaan uqallautiniaġai taapkua saumiŋmi tuŋaanniittuat, Aullaġitchi uvamniñ, ilivsi suksraunġiqsauniaqtuasii isuitchuamun igniġmun itqanaiyaaguŋaruamun Tuunġaġmun, isaġuliŋiñullu. 42Qanuq kaaktuaguŋaruŋa aasii aitchuŋaitkivsiŋa niqimik, Imiġuksiuŋammiuŋa aasii aitchuŋaitkivsiŋa imiksramnik. 43Iglaaguŋagaluaqtuŋa paġlaŋaitkivsiŋa aimaaġvivsiññun. Annuġaagiḷḷiuŋaruŋa annuġaaksriñŋiñmigivsiŋa. Naŋinŋaruŋa, tigutaaġviŋmiinŋaruŋalu aasii takuŋaitkivsiŋa. 44Tavraptauq iliŋisa kiuniaġaat, Ataniiq, qaŋa tautuŋavisigiñ kaaktillutin naagga imiġuksiupkaqłutin naagga iglaagupkaqłutin annuġaaksraisillutin naagga naŋinnavich, naagga tigutaaġviŋmi innavich aasii ikayuŋił̣ł̣utin? 45Tavra umialgum kiuniaġai, Iḷumun uqallautigivsi, ikayuġuŋiññavsiuŋ atausiqunnii makua iḷaŋat naglignaqtuat, ikayuġuŋiñŋagivsiŋa. 46#Dn 12.2.Tavra iliŋich tatavsaqtauniaqtut isuitchuamun, aglaalli nalaunŋaruat isuitchuamun iñuuniaqtut.
ទើបបានជ្រើសរើសហើយ៖
Matthew 25: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
