Acts 17
17
Thessalonica-mi
1Tavra Paul-lu Silas-lu iglauŋaruk nalaułługik Amphipolis-lu Apollonia-lu, aasii tikił̣ł̣utik Thessalonica-mun, aŋaiyyuviqaġniqsuanun Jew-nun. 2Tavra Paul isiŋaruq aŋaiyyuviŋmun piḷġusikaamisun. Suli piŋasuni Savaiññiġni ilaan uqaaqatigiŋagai iñuich Bible uqaluŋiññiñ, 3sivunniuġutivlugich, iḷumun itilaaġutivlugiḷḷu, Christ nagliksaaqtuksraupiaġnivḷugu suli aŋiluni tuqqunmiñ, uqaqłuniḷu, Taamna Jesus quliaqtuaġikkaġa ilivsiññun Christ-guruq. 4Tavra iḷaŋich maliksuktitauŋarut, aasii iḷḷativlutiŋ Paul-mullu Silas-mullu, iñugiaktuallu Greek-gich ukpiliŋaruat God-mun, suli iñugiaktuat naumaruat aġnat iḷḷatiŋammiut.
5Tavra Jew-guruat killuqsraliŋarut, aasii iñuksraqłutiŋ anniqsuutauŋitchuanik iḷatchiqsiñik iñugiaksiŋagaich. Tavra iniqpaum iñuŋi tuavaallaktinŋagaich aasii piyuksraġiŋagaat iglua Jason, Paul-lu Silas-lu paqinniatakługik iñuŋnuutisukługik. 6Tavra paqinŋiññamisigik, kaliksraŋagaat Jason aniqatillu iḷaŋich sivuġaannun iniqpaum atanauraŋisa, pasivḷugik Paul-lu Silas-lu uqaqłutiŋ, Taipkuak iññuk tuavaalatchiññiktuk iñuŋnik sumiḷḷiqaa, aasiuvva iniqpaptiŋnuŋmiuk. 7Aasii Jason tukkuliŋagik iglumiñun. Iluqaġmiŋ piḷġusiqaqtut paaqłakługich pitquraŋi Caesar-m, Rome-miut umialgata, uqaqłutiŋ umialiqaġnivḷugu allamik, atiqaqtuamik Jesus-mik. 8Tamatkuniŋa uqaqłutiŋ iñusalaiḷḷu atanauraŋiḷḷu iniqpaum tuavaallaktinŋagaich. 9Tavra atanaurat akiḷiipkaŋagaich Jason-lu allallu maniŋñik annisiqsiłługich, aasii aullaqtinŋagaich.
Berea-mi
10Unnupqauraġman, aniqatit tavrauvvaa aullaqtinŋagaich Paul-lu Silas-lu Berea-mun, aasii tikiññamik aŋaiyyuliaŋaruk Jew-guruat aŋaiyyuviannun. 11Iñuich tavrani uqautisuġnapayaaŋarut iñuŋniñ Thessalonica-miittuaniñ, qanuq ilaisa naalaġniŋagaat uqaluk kipiġniuqłutiŋ. Aasii uvlutuaġman iḷisaŋagaich Bible uqaluŋich iḷitchuġiniaqłutiŋ Paul-gum uqaluŋi iḷumun itilaapiaŋannik. 12Iñugiaktuat tavrani ukpiliŋarut, suli iñugiaktuat Greek-guruat aġnat naumaruat, allallu iñugiaktuat Greek-guruat aŋutit, ukpiliŋammiut. 13Tavra Jew-guruat Thessalonica-mi tusaakamiŋ Paul alġaqsruiñivḷugu uqaluanik God-im Berea-mi tavruŋaŋarut, aasii tuavaalatchiññikłutiŋ iñuŋnik tavrani. 14Tavra aniqatit tavrauvvaa aullaqtinŋagaat Paul iglauyaaksraŋanun taġiukun, aglaan Silas-lu Timothy-lu qimaktinŋaruk Berea-mun. 15Taapkua aullaqtitchiruat Paul-mik qaniŋagaat Athens-munaglaan, aasii utiqłutiŋ Berea-mun. Paul-miñ piraksriusiaqaŋaruk Silas-lu Timothy-lu qaiñasuaquvlugik inmiñun.
Athens-mi
16Tavra Paul utaqqiḷḷaagnik Silas-lu Timothy-lu Athens-mi, tautukłuni iñugiaktuanik iñuuraqpaŋnik isumaalutchaŋaruq atqunaqłuni. 17Tavra ilaan uqaaqatigiŋagai Jew-guruat aŋaiyyuvianni, Jew-guruallu Jew-guŋitchuallu ukpiliŋaruat God-mun, suli uvlutuaġman kasimmaviŋñi uqaqatigivlugich iñuich nalaurrutiruat. 18Iñuitchauq iḷaŋich Epicurean-guruat Stoic-guruallu iḷisaurrit qapiqtaŋagaat Paul. Aasii iḷaŋich uqallaŋarut, Sumik una uqavalari uqaġniḷuksaava? Allalli uqaŋarut, Ilaa qiññaqaqtuq alġaqsruirisun allayuqqanik god-tinik. Tainna uqaŋarut pisigivlugu Paul alġaqsruimman Jesus-mik aŋŋiñmiglu. 19Tavra ilaisa Paul tiguŋagaat aasii qaġġisivlugu sivuġaannun kasimaruat Areopagus-mi uqaqłutiŋ, Iḷisimasukkaluaqtugut taavrumuuna nutauruakun iḷisaurrutigikkapkun. 20Qanuq uvva tusaakkapta iḷaŋich allayuaġigivut, aasii iḷitchuġisukkaluaqtugut sumik tamatkua sivuniqaqtilaaŋannik. 21Tavra iluqaġmiŋ Athens-miut, imaŋŋaqtallu iñuuruat tavrani, atuġaġniġaat piviksraqtiŋ suuŋiḷanun, quliaqtuaqsiññaqłutiŋ naagga tusaaniaqłutiŋ sunik nutauruanik.
22Tavra Paul, makiłłuni sivuġaannun kasimaruat Areopagus-mi uqallaŋaruq, Iñuich Athen-miut, puttuqsriruŋa ilivsi qanusipayaakun piraġausikun ukpiqtauniqsusi. 23Qanuq pisuaqtuallaġma qiñiqtuaqługich init iñuuraqpaŋnun aŋaiyyuvigikkasi, paqinŋammiuŋa ikipkaiviŋmik ukuniŋa aglaqaqtuamik, Nalukkaptiŋnun god-mun. Taamnaasii aŋaiyyuvigikkaqsi nalullaan quliaqtuaġiniaġiga paŋmapak ilivsiññun. 24#1 K 8.27; Is 42.5; Ac 7.48.God savaŋaruaq nunamik suli supayaanik imaġikkaŋiñik, Atanġuruq qiḷaŋmullu nunamullu, iñuuviqapiaġniaqtuksrauŋitchuq ininik iñuich savaaŋiññik. 25Naaggaunnii ilaa piqaqtuksraupiaġniaŋitchuq iñuich piḷiuġumiñakkaŋiññik ilaa savautilugu, qanuq ilaan inmiñik aitchuutigigai iñuggullu aniġniġlu supayaallu iñupayaanun. 26Suli ilaan savaŋagai atautchimiñ iñuŋmiñ, iñupayaurat nunami iñuutquvlugich iluqaani nunami. Ilaan sivunniutiŋagai sivuani iñuullaaniksraŋich suli killiksraŋich iñuuniaġviḷḷaaŋisa. 27Tainna God piŋaruq iñuŋnun ivaquyumagaluaqłuni, iḷaanni paqinnasugaluni ivaqtuiññaqpanni, God qanitkaluaqtuq iluqaptiŋnun. 28Qanuq ilaa kaŋiutauruq iñuusipayauraptiŋnun. Iḷaŋitchauq taigualirivsi uqallaŋammiut,
“Uvaguttauq ilaan miqłiqtuġigaatigut.”
29Tavra God-im miqłiqtuġiniġmatigut, isumaruksrauŋitchugut God-im irrusia innasugalugu iñuuraqpaktun kaviqsuamiñ maniŋmiñ, naagga qatiqtuamiñ maniŋmiñ, naagga uyaġagmiñ, savaaŋisun sanaturuat iñuich. 30Qaŋapak taimani God-im iḷatchiŋagai iñuich naluŋŋaisa, aglaan paŋmapak ilaa pitqurriiŋaruq iñupayaat sumipayaaq isumalitqiquvlugich. 31Qanuq ilaa nalunaiqsiŋaruq uvlumik, taivrumani ilaan isivġiġñiaqługich nunam iñupayauraŋi nalaunŋaruakun, piriqaġluni iñuŋnik ilaan piksraqtaamiñik. Ilaan nalupqinaiyaŋagaa iñupayaanun piksraqtaani aŋipkaqługu tuqqunmiñ.
32Tavra tusaakamirruŋ Paul uqaġman aŋŋisikun tuqqunmiñ, iḷaŋisa kipagiŋagaat. Aglaalli allat uqallakłutiŋ, Naalaktuavsaaġukkiptigiñ taavrumiŋa iḷaannigu. 33Tavra Paul aniŋaruq kasimaruaniñ. 34Aasiivsauq iñuich iḷaŋich iḷḷatiŋarut ilaanun ukpiliqł̣utiŋ, iḷagiŋagaat Dionysius iḷauruaq Ariopagus-nun, aġnaġlu atiqaqtuaq Damaris-mik, allallu iñuich.
ទើបបានជ្រើសរើសហើយ៖
Acts 17: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
