Acts 16
16
Timothy-m Piqasiġik Paul-lu Silas-lu
1Tavra Paul-kut tikiñŋarut Derbe-mun Lystra-mullu. Ukpiqtuaq tavraniinŋaruq atiqaqtuaq Timothy-mik, iġñiŋa Jew-guruam aġnam ukpiqtuaguruam, aglaan aapaŋa Greek-guvluni. 2Ilaa uqautigilluataŋagaat iluqatiŋ aniqatit Lystra-mi Aichonia-miittuallu. 3Paul-gum Timothy maliquŋagaa inmigun. Tavra Paul-gum nalunaiñŋutchiŋagaa timaagun Timothy Jew-guqtirrunmik. Taamna piŋagaa pisigivlugich iluqaisa Jew-guruat iñuuruat tamaani iḷisimaruat Timothy-m aapaŋa Jew-guŋisilaaŋanik. 4Tavra iglaullaġmiŋ iniqpaktigun, aitchuutigiraġaŋagaich sivunniutit ukpiqtuanun inillakkaŋich tiliraunikun iḷitchitqurat umialiŋnallu Jerusalem-miittuat, uqautivlugich kamagitquvlugich tamatkua piraksriutit. 5Tavra aŋaiyyuliqiruat suaŋasiḷaaqtauŋarut ukpiġunmiŋni, suli iñugiaksisaiññaŋarut uvlutuaġman.
Troas-mi Paul Qiñiqtuuraaqtuq
6Tavra kukiḷuŋarut nunaŋigun Phrygia-m Galatia-vlu. Ilitqusiġiksuam alġaqsruitquŋaitkai tusaayugaaġiksuamik nunaaqqiŋiñi Asia-m. 7Tavra akiŋiqamirruŋ nuna Mysia, iglausaġaluaŋarut nunaaqqiŋiñun Bithynia-m, aasii Jesus Ilitqusiġiksuaŋata pipkaŋaitkai. 8Tavraasii qaaŋiqł̣ugu Mysia, Troas-muŋarut. 9Tavra Paul qiñiqtuuraaŋaruq unnuami, tautukługu Macedonia-ġmiu makitavluni qaitquuqłiqsuaq inmiñik, uqaqłuni, Qaiḷutin Macedonia-mun ikayuġiaqtigut. 10Tavra Paul qiñiqtuuraaganipqaġman, tavrauvvaa itqanaiyaŋarugut aullaġukłuta Macedonia-mun, sivunniqł̣ugu God-mun ququaġnivḷuta alġaqsruitquvluta tusaayugaaġiksuamik iñuŋnun taamani.
Philippi-mi Lydia Ukpiqtuaġuqtuq
11Umiaqpagaqłuta aullaŋarugut Troas-miñ, aasii tiŋinnaaqłuta nalimun ikaaqłuta Samothrace-mun, aasii uvlutqiŋman Neapolis-mun. 12Aasii tavraŋŋa aullaqłuta nunanmun Philippi-mun, naumaniqsrauruamun iniqpaŋiñi Macedonia-m, Rome-miunik iñuqaqtuaq. Taavrumani iniqpaŋmi uvliuŋarugut. 13Tavra Jew-guruat Savaiññiŋanni, siḷataanuŋarugut iniqpaum kuugum siñaanun, isumavluta Jew-guruat aŋaiyyuliaġuunasugalugich tavruŋa. Aasii aquptaaqłuta uqaqatigiŋagivut aġnat katittuat tavruŋa. 14Iñuich iḷaŋat tusaarikput aġnaq atiqaŋaruq Lydia-mik, iniqpaŋaniñ Thyatira-m, tuniuqqairi suŋauraammaġiksuanik ukił̣haanik, aŋaiyyurauruaq God-mun. Atanġum puttuqsripkaŋagaa akuqtuġumiñaqsivḷugich uqaluŋi Paul. 15Tavra ilaalu igluqatiniḷu paptaiqsauŋarut. Tavrani ilaan aiyugaaŋagaatigut uqaqłuni, Isummatigiguvsiŋa iḷumun ukpiqtuaġuġniḷuŋa Ataniġmun, qaisitchi iglumnun aasii tukkulusi. Tavra kamagiŋagikput.
Paul-lu Silas-lu Tigutaaġaich Philippi-mi
16Iḷaanni aullalgiññapta aŋaiyyuliaġvikaamun paaŋagaatigut kivgam niviaqsiam ilitqusiqł̣uqaġniqsuam nalautchaġuuvluni sunik piyumaaqtuanik. Ilaan pigirini maniññakpautisuunikkaŋi nalautchuġaqłuni. 17Ilaan maliġuaŋagaa Paul uvagullu nipałłuni, Uvvaukua aŋutit kivgaŋi kamanaġniqsrauruam God-im uqautigaasi qanuġlusi annallasiñiaqtilaavsiññik. 18Tainna nipanŋaruq uvluni iñugiaktuani. Tavra Paul-gum aġiuvlugu kiŋiaqługu uqallautiŋagaa ilitqusiqł̣uk, Ataniġnaqutaagun Jesus Christ piraksriġikpiñ anitquvlutin ilaaniñ. Tavrauvvaa ilitqusiqł̣uk aniŋaruq ilaaniñ. 19Tavra pigiriŋisa iḷitchuġikamiŋ maniññagniutigikkaqtiŋ piiġñiġman, tigguġluŋagaich Paul-lu Silas-lu, aasii kaliksraqługik kasimmaviŋmuutiŋagaich sivuġaannun atanaurat. 20Tavra qaġġisiŋagaich sivuġaannun Rome-miut atanauraŋisa, aasii uqallakłutiŋ, Ukua uvva aŋutit Jew-guruat aŋalayyakkaich iñuich iniqpaptiŋni. 21Iliŋich iḷisaurrirut paaqsaaŋaruanik pitquraptiŋnun. Uvagut Rome-miuguruaguut kamagiyumiñaitkivut tamatkua piḷġutchich iḷisaurrutiŋich. 22Iñusalaich tapiġiiksinŋarut piyuaqłiqł̣utiŋ iliŋiŋnik, suli atanaurauruat aliktuŋagaich annuġaaŋik Paul-lu Silas-lu, aasii piraksriivḷutiŋ anaumiquvlugik. 23Tavra anaumianisugruanikamisigik, tigutaaġviŋmuŋagaich piraksriqł̣ugu tigutaaqtanik munaqsri qaunagipiaġataquvlugik. 24Kamagivlugu taamna piraksriusiani, munaqsrim iḷulliġmun tigutaaġviŋmun isiŋagik, aasii payaŋaiyaqługik siŋiġñiŋikkun qiruŋnun tigutaaġutinun.
25Tavra unnuaq qitiqqaqpalliġman Paul-lu Silas-lu aŋaiyyuŋaruk, suli nanġautinik atuqłutik God-mun, aasii tigutaaqtat naalaktuaŋagaich. 26Tavra tavraŋŋatchiaq nuna aulaqpaŋaruq, maŋŋuŋiunnii tigutaaġvium aulayyaktaallaisa. Tavraŋŋatchiaq iluqaġmiŋ upkuat upkuiŋarut, suli iñupayaam tigutaaqsimmatiŋi kalimñat kataŋarut tigutaaqtaniñ. 27Tavrali tigutaaqtanik munaqsri itiqami, tautukamigich tigutaaġvium upkuaŋi aŋmaruat, isumaliŋaruq iluqaisa tigutaaqtat pigruġasugalugich, tavraasii amuŋagaa savikpani tuqutchaqsaqłuni inmiñik. 28Tavra Paul nivliŋaruq nipatutilaamisun, Anniaġnak iliŋnik, qanuq uvaniittugut iluqata. 29Tavra tigutaaqtanik munaqsri qaummatiksramik qiññuaŋaruq, suli isiniqłakłuni uullaġruaqtun iqsim punŋaruq sivuġaaŋnun Paul-lu Silas-lu. 30Tavra annisivlugik apiġiŋagik, Aŋutiik, sumik piruksrauvik annaurrausugluŋa? 31Iliŋik uqallaŋaruk, Ukpiġiñ Ataniġmun Jesus-mun aasii annaurrauniaqtutin, iliviḷḷu igluqatitillu. 32Tavra iliŋikta quliaqtuaġiŋagaak uqalua Atanġum ilaanun, iluqaiññullu igluaniittuanun. 33Tavra ilaan piŋagik taavrumani unnuam ikarraŋani, aasii iqaġivlugich kiḷḷiaġniŋik, suli ilaa qitunġaniḷu paptaiqsauŋarut tavrauvvaa. 34Tavra ilaan Paul-lu Silas-lu iglumiñuutiŋagik, aasii niqłiqsuqługik. Tavra ilaa igluqatiniḷu quviasupiaġataŋarut pisigivlugu ukpiliġñiqtiŋ God-mun.
35Tavra uvlaami Rome-miut atanauraŋisa tiliŋagaich piliisimat uqaqłutiŋ, Taamapkuak aŋutik aullaqtitchigik. 36Tavra tigutaaqtanik munaqsrim uqallautiŋagaa Paul, Atanaurat tilisiŋarut aullaqtitquvlutik, iliviḷḷu Silas-lu tigutaaqtauŋaiġḷutik. Aullaġumiñaqtutik tuaksruiḷaakun. 37Tavra Paul-gum uqallautiŋagai piliisimat atanauraŋich, Anaumiŋasugaaptiguk iñuich takkuanni, isivġiqsauŋaiḷaak patchisiqaqtilaaġlunuk, iññuk Rome-miunun iḷauruaguuk, suli isiqtaġivlunuk tigutaaġviŋmun. Paŋmapak aasiiñ aullaqtinniaqpatiguk nalunautchiḷutiŋ? Naumi, qaiḷutiŋ ilimiŋnik annisiyaqtuġlisiguk. 38Piliisimat quliaqtuaġiŋagaich taapkua uqaluich atanauranun, aasii tusaakamasigik Paul-lu Silas-lu Rome-miunun iḷautilaaŋaŋnik iqsiḷiŋarut. 39Tavra qaivḷutiŋ nunuuraġvigiŋagaik. Aasii annisivlugik apiġiŋagaich aullaquvlugik iniqpaŋmiñ. 40Tavra Paul-lu Silas-lu aniŋaruk tigutaaġviŋmiñ, aasii isiqłutik Lydia-m igluanun. Tavrani kasuŋagaich aniqatit, aasii uqautiqqaaqługich qapiŋaisaaġutinik, aullaŋaruk.
ទើបបានជ្រើសរើសហើយ៖
Acts 16: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
