Acts 18
18
Corinth-mi
1Taavruma aquagun Paul aullaŋaruq Athens-miñ aasii Corinth-mukłuni. 2Tavra ilaan kasuŋagaa Jew-guruaq atiqaqtuaq Aquila-mik, aniŋaruaq Pontus-mi, qaiqqammiqsuaq Italy-miñ piqatigivlugu nuliani Priscilla, qanuq umialik Claudius pitqurriiŋaruq Jew-payaurat aullaquvlugich Rome-miñ. Tavra Paul-gum tautugiaŋagik. 3Aasii atiruamik savaaqaġniqamiŋ tuppiuqtauvlutiŋ, ilaan nayuŋagik. 4Tavra Paul uqaaġaqtuq Jew-guruat aŋaiyyuvianni Savaiññipayaani, ukpiliqsinniaqługich Jew-guruallu Greek-giḷḷu.
5Tavra Silas-lu Timothy-lu tikiñŋaruk Macedonia-miñ, Paul aptatiqaŋaruq alġaqsruiñiġmik, uqaluktuaġivlugu Jew-guruanun Jesus Christ-gunivḷugu. 6Tavraasii akiḷḷiḷiqsuġmanni uqamaqłuutivluniḷu, ilaan ivsuktuŋagai annuġaani aasii uqallautivlugich, Annaurrauŋitkuvsi ilivsiññik pasiruksraurusi. Uvaŋa patchisauŋitchuŋa. Paŋmapaŋmiñ alġaqsruiñiaqtuŋa Jew-guŋitchuanun. 7Tavra Paul qimaŋagai aasii aullaqłuni igluanun Jew-guŋitchuam atiqaqtuam Titus Justus-mik, aŋaiyyusuuruaq God-mun. Ilaan iglua siḷalliuŋaruq Jew-guruat aŋaiyyuviannun. 8Crispus umialiŋnauruaq aŋaiyyuviŋmi ukpiliŋaruq Ataniġmun, piqatigivlugich igluqatipayaani. Suli iñugiaktuat allat iñuich Corinth-miittuat tusaavlugu uqaluk, ukpiliŋarut suli paptaiqsauvlutiŋ.
9Unnuat iḷaŋanni, Paul qiñiqtuuraaŋaruq. Tavrani Atanġum uqallautiŋagaa, Iqsiñak, aglaan alġaqsruivsaaġiñ, nikatchaŋnak, 10qanuq itqatigigikpiñ, iñuum kialiqaa anniaqsaayumiñaitkaatin, qanuq ittut iñugiaktuat iñutka uumani iniqpaŋmi. 11Tavra Paul tavraniinŋaruq ukiuq iḷavlugu avvaġmik, iḷisautivlugich iñuich God-im uqaluanik.
12Tavra Gallio kavanaupkaqtillugu Greece-mi, Jew-guruat katinŋarut, aasii tigguġlukługu Paul qaġġisiŋagaat uqaqsitaaġviŋmun, 13uqaqłutiŋ, Iñuk una maliksuktitchiñiaqsaaruq iñuŋnik aŋaiyyutquvlugich God-mun, paaqłaglugich pitqurat. 14Tavra Paul uqallaksaaqsimmiuġlu, Gallio-m uqallautiŋagai Jew-guruat, Iñuk taamna piŋakpan sumik pigiitchuamik pitqurallu kamagiŋiḷḷugich, uvaŋa manimmiyumiñaġaluaġivsi Jew-guruasii. 15Aglaan pasiñiqavsiuŋ uqaluktigullu iñuiḷḷu atiŋisigun ilivsiḷu pitquravsigun, ilivsiññik iłuaqsruġumiñaġiksi. Tamatkunuuna isivġiqsauniaŋitchuŋa. 16Tavra ilaan aninŋagai uqaqsitaaġviŋmiñ. 17Tavra iluqaġmiŋ tigguġluŋagaat Sosthenes, umialiŋnaŋa Jew-guruat aŋaiyyuviata, aasii anaumiaqsivḷugu sivuġaani uqaqsitaaġvium. Taamna suliqutigiŋiñmigaa Gallio-m suuramikunnii.
Utiqtuq Antioch-mun
18 #
Nu 6.18. Taavruma aquagun Paul iñugiaktuanik uvliuqqaaqłuni Corinth-mi, qimaŋagai aniqatit tiŋilġaivḷuni Cyria-mun, piqatigivlugik Priscilla-lu Aquila-lu. Cenchreae-miinŋaġmi, niaquni mitquiŋagaa piḷġusiatitun Jew-guruat unniqsuqłiivḷuni God-mun. 19Tavra tikiñŋarut Ephesus-mun, aasii Paul-gum qimaŋagik Priscilla-lu Aquila-lu tavruŋa. Ilaa aŋaiyyuliaŋaruq Jew-guruat aŋaiyyuviannun, aasii tavrani uqavaaqatigiŋagai Jew-guruat. 20Iliŋisa apiġimmanni nayuqtuallaquvlutiŋ sivisuuraqtuami, ilaa pisuŋiñŋaruq. 21Aglaan qimaksaqamigich uqallautiŋagai, Pisuutigikpagu God-im, utaqqiñiaġmigivsi. Tavra tiŋinnaaqsaŋaruq Ephesus-miñ.
22Tavra tikiññami Caesarea-mun, aullaŋaruq Jerusalem-mun, aasii paġlaŋagai aŋaiyyuliqiruat, aasii aullalgił̣ł̣uni Antioch-mun. 23Tavraniittuallaqqaaqłuni aullaŋaruq aasii kukiḷukłuni nunaaqqiñun Galatia-mi Phrygia-miḷu, suaŋasiḷiqługich ukpiġutiŋich ukpiqtuat.
Apollos Ephesus-miḷu Corinth-miḷu
24Tavra Jew-guruaq atiqaqtuaq Apollos-mik, iñuguŋaruaq Alexandria-mi, tikiñŋaruq Ephesus-mun. Ilaa uqaqtuayuruaq iḷisimmaġikł̣uni Bible uqaluŋiññik. 25Iḷisausiaqaŋaniqsuq Atanikun, aasii qapiŋaił̣ł̣uni uqaŋaruq iḷisaurrivḷuniḷu nalaupiaqługich sut sivuniqaqtuat Jesus-mik. Aglaan iḷisimatualuŋniqsuq paptaiġutaanik John. 26Ilaa uqarraqsiŋaruq taluqsrautaił̣ł̣uni Jew-guruat aŋaiyyuvianni. Tavra Priscilla-vlu Aquila-vlu naalaktuaqqaaqługu aggisiŋagaak, aasii iḷisautimmaġiksaagaqsivḷugu God-im annaurriḷḷatilaaŋanik iñuŋnik. 27Tavra Apollos sivunniġman aullaġukłuni Greece-mun aniqatit Ephesus-mi ikayuŋagaat, tuyuqłutiŋ aniqatimiŋnun Greece-miittuanun paġlatquvlugu tikitpan. Tikiññami, Apollos ikayuŋagai tamatkua ukpiliŋaruat God-im nagliktuutiqpaŋagun. 28Qanuq ilaan qapiġnaił̣ł̣uni, suaŋavlutiŋ uqaluŋi, Jew-guruat qapiqtaŋagai kasimaruani qapiqtautikamiŋ nalupqinaiyaqługu Bible uqaluŋiññiñ Jesus Christ-guniŋa.
ទើបបានជ្រើសរើសហើយ៖
Acts 18: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
