1 Corinthians 1
1
1Ukua tuyuutit qairut ilivsiññun Paul-miñ, God-im ququaŋaraŋaniñ tilirautquvlugu Christ Jesus-mun, aniqatiptiŋniḷḷu Sosthenesmiñ. 2#Ac 18.1.Tuyuutaurut ilivsiññun Corinth-miittuanun, God-mun aŋaiyyuliqiruanun, ilaaguaqtauruanun God-mun ukpiqłutiŋ Christ Jesus-mun, God-im ququaqtaŋiñun iñugisukługich, iḷagivlugich iñupayaurat sumiḷiqaa aŋaiyyusuuruat Ataniptiŋnun Jesus Christ-mun, ilaisaptauq Ataniġikkaŋannun. 3Nagliktuusiaqpaqaġitchi tutqiunmiglu God-miñ Aapaptiŋniñ, Ataniptiŋniḷḷu Jesus Christ-miñ.
Ikayuusiasi Ukpiliqavsi Christ-mun
4Ataramik quyyavigisuugiga God pisigivlugich nagliktuutiqpakun ikayuusiasi ilaan aitchuutigikkaŋi ukpiliqavsiqaŋa Christ Jesus-mun. 5God-im savaŋagai iñuutchisi nakuusił̣haaqługich uqaqtuaġumiñaqsivḷusi ataramik inmigun, suli iḷitchuġiyumiñaqsivḷusi iluqaanik iḷumun ittuamiñik. 6Nutauruakun iñuuniaġusiḷiutikkavsigun iḷisimanaqsiŋagiksi nalupqinaiqł̣ugu akuqtuiŋatilaaqsi tusaayugaaġiksuamik Christ-kun. 7Suli ayuqsraŋił̣ł̣usi qanusipayaamik aitchuusiamik Ilitqusiġiksuam aitchuutaanik, utaqqiḷḷavsi qaiñiksraŋanik Atanipta Jesus Christ. 8Ilaan qaunaginiaġaasi tuniqsimalusi ukpiġutiqaġumiñaqsiḷusi isuanun-aglaan, pasirauyumiñaiqsaġlusi Ataniqput Jesus Christ qaikpan. 9God ukpiġnapiaqtuq, aasii ququaŋagaasi piqatautquvlusi allanun iḷauraaliutiniġmi Iġñiġmiñun Jesus Christ-mun Ataniptiŋnun.
Aŋaiyyuliqiruat Atiŋirrutiŋich
10Aniqatiit, iluqata atausiŋŋuqatauŋaruaguut Ataniptiŋnun Jesus Christ-mun, piviuttaġivlusi apiġigivsi atitquvlusi, ilivsiguaqtaŋaiġḷusi aglaan atiruamik isumaqaquvlusi, suli atiruamik isivġiutiqaġlusi. 11Qanuq quliaqtuaġutiŋagaanŋa Chloe-m iḷaŋisa qanaaġutisuunivḷusi, aniqatiitkaa. 12#Ac 18.24.Uvvauna sivuniġigiga. Atausiullaavlusi uqaġuumavlusi uvaŋa Paul-kuayaaguruŋa naagga Apollos-kuayaaguruŋa naaggaqaa uvaŋa Cephas-kuayaaguruŋa naagga uvaŋa Christ-kuaqtuŋa. 13Tainna Christ avguqsiyumiñaitchuq. Iḷisimarusi uvaŋauŋitchuq Paul-guruaŋaa kikiaktuurrauŋaruaq aŋarrauramun pisivlusi. Iḷisimammiusi uvaŋa Paul-guruaŋaa atausiŋŋuqatigiŋaitkivsiŋa paptaiqsaukavsi. 14#Ac 18.8; Ac 19.29; Ro 16.23.Quyammiuŋa paptaiqsiŋaiññama iluqavsiññik aglaan Crispus-mik Gaius-miglu, 15iḷaanni iḷari uqallakkayaġugnaqtuaq atausiŋŋuqatauniḷuni uvamnun paptaiqsaukami. 16#1 Co 16.15.Paptaiqsiŋagaluaġmiuŋa igluqatiŋiñik Stephanas. Taavruma allaagun naluruŋa paptaiqsiŋatilaamnik kimik. 17Qanuq Christ tiliŋaitkaaŋa paptaiqsiyyaquluŋa aglaan alġaqsruitquvluŋa tusaayugaaġiksuamik. Aglaan alġaqsruikama uqayupiaġataġluŋa iñugruiññaich isumattutaatigun piḷaitchuŋa, iḷaanni iñuich uqayupiaġataġniġma maliksuktitpiaġai, iḷumun ittuałhaaŋiḷaam Christ tuqqutaata aŋarraurami.
Christ Suaŋŋatigigaa Isumattutigigaalu God-im
18Qanuq alġaqsruiñiq ilaan tuqqutaagun pisigivlugich iñuich piḷuutiŋich, qiññaqaqtuq asiḷiqqutauruatun iñuŋnun suksrauyumaaqtuanun. Aglaan uvaptiŋnun annaurrauruanun, suaŋŋatigigaa God-im. 19#Is 29.14.Bible-ni aglausimaruq inna.
“Iḷisimanaqsiñiaġiga anniqsuutauŋisilaaŋa
isumaturuat iñugruiññaich isumattutaat,
suli suunnauŋaiġḷugu
iñugruiññaich kaŋiqsisuġniŋat.”
20 #
Job 12.17; Is 19.12; 33.18;
Is 44.25. Taamna tainnainniġman, qanuġniaġniqpat isumaturuat iñuich? Qanuġniaġmiñiqpat pitquranik iḷisaurrit, tamatkualu qapiqsaiḷiralguruat? God-im qiññaniktinŋagai isumalluaġiitchuatun, iḷisimanaqsivḷugu ilaisa iñugruiññaich isumattutaat asiḷiqqutautilaaŋanik. 21Qanuq God iḷumun isumaturuaq sivuniqaŋaruq iñuŋnun iḷitchuġiyumiñaisilaamiñik iliŋisa nanmiñiq isumattunmikkun. Aglaan iviġaumagiŋagaa annautisukługich iñuich ukpiġikparruŋ tusaayugaaġiksuaq, qiññaqaqtuaq asiḷiqqutitun nunam iñuŋiñun. 22Jew-guruat apiqsrirut aliuġnaqtuanik aasiiḷi Greeks isumatusiñiatavsaaqtut. 23Aglaan alġaqsruutigigikput Christ, kikiaktuurrauŋaruaq annaurri, Jew-guruat piavsaktautaat aasiiḷi qiññaqaqłuni asiḷiqqutitun Jew-guŋitchuanun. 24Aglaattauq iñuich ququaqtauruat ukpiquvlugich Jew-gugaluaġmata Greek-gugaluaġmatalu Christ God-im suaŋŋatigigaa annaurriñiġmun isumattutigigaalu. 25Qanuq iñuich isummatiŋiññi God-mun asiḷiqqutiginasugikkaŋat, isumattutaułhaaqtuq iñuich isumattutiŋiññiñ, suli iñuich isummatiŋiññi God-mun suaŋairrutiginivḷugu Christ tuqqutaa, suaŋałhaaġmiuq iñuich piḷḷakkaŋanniñ.
26Isummatigisitchi ilivsiññun, aniqatiit, ilivsi ququaqtauŋaruasii ukpiquvlusi. Iñugiaŋitchusi isumaturuaguŋaruasii, iñuich naipiqtuutaatigun. Iñugiaŋiñmiusi atanaurauruat. Iñugiaŋiñmiusi aniŋaruasii suġalliruatigun. 27Qanuq God-im piksraqtaaġiŋagai iñuich isumakkusiaqaqtuat nunam iñuŋiñiñ isumalluaġiiññivḷugich, kanŋutchaksaqługich isumatunasugiruat inmiŋnun isummatigikamiŋ. Tainnatuttauq God-im piksraqtaaġiŋagai suaŋaitchualiaŋich iñuich naipiqtuunmikkun, kanŋutchaktitchaqługich suaŋanirauruat. 28Aasiisuli God-im piksraqtaaġiŋagai iñuich kamasaaŋitchuat, suuŋiḷaġirauruallu, isumakkusiaqaqtuallu suuŋiḷatun nunam iñuŋiñiñ, ilaan suuŋiḷaġuqtitchaqługich iñuich kamanaqtualirauruat. 29Tainna God piŋaruq, atausiuraq-unnii iñuk uqavigaaġumiñaiqsaqługu sivuqqamiñi. 30God-im aitchuŋagaasi iñuullasivḷusi isuitchuamun, qanuq atausiŋŋuqatigiŋagiksi Christ. Aasii atausiŋŋuqatigiŋakaptigu Christ, ilaan isumatusipkaŋagaatigut God-im isumattutaanik, suli nalaunŋasivḷuta, ilaaguaqłutalu God-mun, suli tasuqłuta. Tainna God sivunniuŋaniqsuq, 31#Jr 9.24.taŋŋiġumiñaqsisaqługu aglausimaruaq Bible-ni inna, “Iñuk uqavigaaġniaġumi uqavigaaġutiqaġli Atanġum iñiqtaŋiñik.”
ទើបបានជ្រើសរើសហើយ៖
1 Corinthians 1: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)