1 Corinthians 2
2
Tusaayugaaġiksuat Christ-kun Aŋarraurami
1Aniqatiit, tikiññama ilivsiññun, alġaqsruiŋaitchuŋa God-im uqaluanik uqayupiaġataqtuam uqaluŋiñik atuġluŋa iñugruiññauvlu isumattutaagun, 2qanuq sivunniŋavluŋa alġaqsruutigisukługu kisian Jesus Christ tuquŋaniŋalu aŋarraurami. 3#Ac 18.9.Alġaqsruiŋaruŋa ilivsiññun suaŋaił̣ł̣uŋa iqsipiaqłuŋalu uuliksivḷuŋalu iviġaumasukługu God. 4Suli alġaqsruikama, maliksuguksaaŋitkivsi iñugruiññaum isumattutaagun, aglaan uvapkuaqługu Ilitqusiġiksuam iḷitchuġipkaŋagaa suaŋŋatini. 5Tainna alġaqsruiŋaruŋa God-im suaŋŋataanun ukpiliqsitquvlusi, iñuum isumattutiŋił̣aaŋanun.
God-im Isumattutaa
6Aasiivsauq aulayaiġḷuataŋavlutiŋ ukpiġunmiŋni ukpiqtuaguruanun, iḷisaurrisuugaluaġmiugut isumattunmik, aglaan isumattutauŋił̣ł̣uni isummatiqausiatitun ukpiŋaitchuat naagga atanaurauruat nunami, suksraunġiqsauyumaaqtuat. 7Aglaan iḷisaurrutigigikput God-im isumattutaa iriqsimaŋaruaq, kaŋiqsiḷaisaŋat iŋiḷġaan taimani. God savaŋaiñŋaġmiunnii nunamik, sivunniŋaniqsuq taavrumuŋa isumattunmun piqataullasiñiaġnivḷuta ilaan kamanaunmiñun. 8Nalliataunnii atanauraŋisa mattuma nunam taamna kaŋiqsiŋaitkaat, qanuq kaŋiqsiŋagumirruŋ, kikiaktuutinayaitkaat Atanġa qaumaniqpaum. 9#Is 64.4.Taapkua iñuich kaŋiqsiŋaitkaat aglautiŋaruaq Bible-ni inna,
“Iñuum qaŋaunnii tautuŋaitkai
naagga tusaayugaaġiŋaitkai,
isumagiqqayalaitkai unnii quviasaaġusiaksrautit
God-im itqanaiyaŋakkaŋi tamatkunuŋa piviuttaqsriruanun inmiñik.”
10Aasii tamatkua quviasaaġusiat, God-im satqummiŋagai uvaptiŋnun Ilitqusiġiksuamigun. Sunapayaaq iriqsimaŋitchuq Ilitqusiġiksuamiñ, taamnaunnii God-im kamanapiaġataqtuaq isumattutaa. 11Allaptauq iñuk nalummatun iñuum allam isumaŋanik ilitqusiata ilaan kisimi iḷisimakkaŋanik, tainnatun kialiqaa kaŋiqsiḷaiñmigai isumaŋi God-im aglaan Ilitqusiġiksuam kisimi. 12Aasii taamna Ilitqusiġiksuaq God-im aitchuutigiŋagaa uvaptiŋnun, iñugruiññaum isumattutigiŋisaŋa, uvagut iḷitchuġitquvluta iluqaiññik anniqsuusianik God-im akiiḷaanik aitchuutiŋiñik uvaptiŋnun.
13Aasii taamna iḷisaurrutigigikput uqaluktigun iḷisausiaptigun Ilitqusiġiksuamiñ, iñugruiññaich isumattutiŋił̣aaŋatigun, sivuniqsiñaqsiñiaqługich iḷumun ittuat, satqummiŋaraŋi Ilitqusiġiksuam iñuŋnun piqaqtuanun Ilitqusiġiksuamik. 14Iñuum piqaŋitchuam Ilitqusiġiksuamik aitchuusiaġiyumiñaitkai sut God-im Ilitqusiġiksuaŋan aitchuutiŋi, qanuq asiḷiqqutaurut ilaanun iñuŋmun. Kaŋiqsiyuminaitkai qanuq qanuqitilaaġumiñatualukkaich kisimiŋ iñuich puttuqsripkairiqaqtuat Ilitqusiġiksuamik. 15Iñuum puttuqsripkairiqaqtuam Ilitqusiġiksuamik qanuqitilaaġai supayaat, aasii ilaa qanuqitilaaqtiqaġumiñaitchuq allanik kaŋiqsisiqaŋitchuanik inmisun. 16#Is 40.13.Qanuq,
“Iñugruiññaq kaŋiqsiḷḷasiyumiñaitchuq God-im isumaŋanik.
Tainnainman kimigliqaa iḷisaurriqaġumiñaitchuq God.”
Aglaan uvagut piqaqtuaguut Ilitqusiġiksuamik isummasiqaqtugut Christ isummasiatun.
ទើបបានជ្រើសរើសហើយ៖
1 Corinthians 2: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)