1 Korinto 5
5
Sabab aꞌa magjinahin
1Na, niyaꞌ suwi-suwi meꞌ aꞌahin takaleku weꞌ niyaꞌ koꞌ luꞌu si kaꞌam maghinang laꞌat lella duk dende. Bisan meꞌ aꞌa manggaꞌi manuhut Tuhanin gaꞌi makatawakkal maghinangan kuweꞌ hininangne iyan. Aꞌa iyan koꞌ magdambuwaꞌ duk siꞌitnen, iye bakas anda samanen. 2Bu langkew pe ateybin. Subey siꞌ kaꞌam suse sabab hinangan aꞌa masumbang iyan duk subey iye patahalaꞌbi amban pagtipunanbin. 3Aku, bisan ku tala amban kaꞌam, saguwaꞌ kuweꞌ du ku luꞌu si kaꞌam, peggeꞌ luwal kaꞌam tapikilku. Peggeꞌ kaꞌurungan ku kapatut weꞌ Isa Almasi hangkan kalaboꞌanku ne hukuman aꞌa magduse iyan, kuweꞌ asal luꞌu du ku si kaꞌam. 4Inin subey hininangbin. Magtipun kaꞌam luꞌu duk kimmatanun bi weꞌ luꞌu du ku isab magtuhut duk kaꞌam. Duk kimmatanun bi isab weꞌ kapatut Panuhutanten bi, si Isa, luꞌu du si kaꞌam. 5Ubus amban kapatut Panuhutanten bi sōnganun bi aꞌa magduse iyan si antanan nakuraꞌ seyitanin duk barannen bininasa, supaya timbul du niyawanen bang pitu ne Panuhutanten bi Isa Almasi, ngahukum meꞌ manusiyaꞌin.
6Gaꞌi tewwaꞌ bang kaꞌam malangkew dibi. Kataꞌuhanbi hep eliꞌan inin, pinaꞌin, “Da puddut pasulig makapasulig tibuꞌukan addunin.” Meꞌ maghinangan malaꞌatin kuweꞌ pasulig miyaꞌan peggeꞌ bang niyaꞌ bisan dangan hadja maghinangan laꞌat ujud katimboꞌohan sinduwehin. 7Hangkan subey ne ānanbi pasulig maꞌandang miyaꞌan, hātinen meꞌ malaꞌat hininangbin duk ne gaꞌ niyaꞌ laꞌat luꞌu si kaꞌam. Bang hinangbi inin, kuweꞌ ne kaꞌam dalil addun baꞌahu gaꞌ sinagetan pasulig. Kataꞌuhanku weꞌ asal sutsi ne kaꞌam peggeꞌ sandel ne kaꞌam pu si Isa Almasi. Si Isa Almasi hep matey pamuwas meꞌ duseten bi, duk iye dalil bili-bili sinumbaliꞌ meꞌ Yahudihin bang baytu Kādjaꞌan Pangesseban Palabey Tuhanin. 8Hangkan hep peggeꞌ sandel kite pu si Isa Almasi, subey ne lebbahante addatte malaꞌatin duk meꞌ hinangante magdusehin. Duk subey ne hāp teꞌed addatten bi duk subey dambūs-būs ateyten nuhut toloꞌ mabennalin.
9Dem sulat bakas pinaboꞌohanku si kaꞌamin, paꞌinku laꞌi, “Daꞌa kaꞌam magbagay duk meꞌ aꞌa magjina.” 10Dumaꞌin hāti pinaꞌinkun weꞌ gaꞌi kaꞌam daꞌakku magtuhut duk meꞌ aꞌa manggaꞌi manuhut Almasihin, meꞌ magjinahin, meꞌ manapsuhanin, duk meꞌ panangkewin, atawa meꞌ manumba meꞌ tuhan-tuhanin. Peggeꞌ bang inin hātinen, na, subey ne kaꞌam gaꞌ tuꞌu dem dunya meke tahinangbi. 11Saguwaꞌ iye hāti pinaꞌinkun, daꞌa kaꞌam magtuhut-tuhut duk aꞌa magpaꞌin weꞌ pagkasibi iye sandel pu si Isa Almasi bu hinangannen magjina, atawa magnapsuhan alataꞌ saweꞌnen atawa magsumba tuhan-tuhan, atawa ngalimut-limutan saweꞌne, atawa maglangohan, atawa nangkew. Daꞌa kaꞌam bisan pasumbayaꞌ mangan si meꞌ aꞌa sa iyan. 12-13Bang meꞌ aꞌa manggaꞌi masandel pu Isa Almasihin, dumaꞌin sukuꞌku ngaliling siye. Tuhanin mangahukum siyehin. Saguwaꞌ pagkasibi masandel pu si Isa Almasi magtipunin, sukuꞌbi ngaliling siye. Peggeꞌ tasulat hep dem kitab, pinaꞌin, “Patahalaꞌun bi amban kaꞌam aꞌa maghinangan malaꞌatin.”
ទើបបានជ្រើសរើសហើយ៖
1 Korinto 5: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.