1 Korinto 4
4
Meꞌ kawakilan Almasihin
1Kami duk Apollos subey kami kimmatanbi meꞌ daraꞌakan Isa Almasi. Pinasukuꞌ si kami weꞌ Tuhanin magpahāti meꞌ toloꞌne manggaꞌ pinakataꞌune matuꞌuhin. 2Aꞌa bakas pinasukuꞌan hinang weꞌ amunen, subey teꞌed iye kapangandelan weꞌ hinangne du hinang pangandaꞌakan iyehin. 3Aku gaꞌi ku gagal bang paꞌinbi weꞌ kapangandelan ku atawa gaꞌi. Gaꞌi ku gagal bang ine paꞌin meꞌ aꞌa sinduwehin. Bisan aku, gaꞌi ku magpaꞌin bang kapangandelan ke ku atawa gaꞌi. 4Bisan gaꞌ niyaꞌ kataꞌuhanku sāꞌku, dumaꞌin inin pureba weꞌ gaꞌ niyaꞌ sāꞌku. Almasihin ngalaboꞌan aku hukumanin. 5Hangkan daꞌa sallaꞌun bi saweꞌbin samantaꞌan gaꞌi pe tekka waktu pangahukumin. Bang tekka ne balik Panuhutanten bi Isa Almasi ngahukum du iye. Akane du meꞌ bakas hinangan meꞌ aꞌa tinapukanden. Akane du isab meꞌ sinakap meꞌ aꞌa dem ateyden. Manjari sanglitan Tuhanin du meꞌ aꞌahin sabab tahinangden dangan-dangan.
6Meꞌ kapungtinaꞌihanku, tinaꞌat weꞌ ku dikun duk Apollos, supaya kaꞌam mintang si kami duk taꞌayabi bang ine hāti pinaꞌin inin, “Daꞌa kaꞌam palabi amban tasulat dem kitabin.” Gaꞌi hāp bang palangkewbi dambuwaꞌin bu diyawaꞌanbi dambuwaꞌin. 7Weꞌey paꞌinbi weꞌ langkew kaꞌam amban meꞌ sinduwehin? Weꞌ dumaꞌin ke Tuhanin mangurungan kaꞌam meꞌ maniyaꞌ si kaꞌamin? Na, weꞌey kaꞌam magabbu kuweꞌ asal di si kaꞌam, bu paꞌin pangurung Tuhan du hatiꞌ hadja si kaꞌam.
8Kannalbi weꞌ gaꞌi ne kaꞌam subey māku ine-ine amban Tuhanin peggeꞌ paꞌinbi weꞌ luꞌu ne si kaꞌam kēmon-kēmonin. Kannalbi weꞌ basag ne teꞌed sandelbi si Tuhanin duk kaꞌam meꞌ nakuraꞌ ne dem pagbayaꞌan Tuhanin, bu kami, meꞌ kawakilanin, gaꞌ pe. Hāp siꞌ bang toꞌo weꞌ asal nakuraꞌ ne kaꞌam supaya isab kami tumuhut si kaꞌam magnakuraꞌ. 9Hangkan inin paꞌinku peggeꞌ tapikilku weꞌ kami meꞌ kawakilanin pinadiyawaꞌ teꞌed weꞌ Tuhanin amban kēmon meꞌ aꞌahin. Kuweꞌ kami meꞌ aꞌa hinukum pinapatey dem kaꞌekkahan aꞌa duk kēmon aꞌahin duk sampay meꞌ malaꞌikatin takitede kami. 10Asal makaꞌulaliꞌ. Kami meꞌ kawakilanin, babbal koꞌ kami peggeꞌ nuhut kami Isa Almasi. Bu kaꞌam, taꞌu koꞌ teꞌed kaꞌam peggeꞌ nuhut kaꞌam pu si Isa Almasi. Paꞌinde gaꞌ koꞌ niyaꞌ basag kami bu kaꞌam basag koꞌ. Udjiꞌde kami, saguwaꞌ kaꞌam pudjide. 11Bisan sampay kuweꞌitu, luwal kami magsandal inusan duk lekkakan. Andang ne meꞌ semmek kamihin. Daran kami pinapeddiꞌan duk gaꞌ niyaꞌ patetegan kami. 12Lubagan kami maghinang duk niyaꞌ kaꞌelluman kami. Bang kami suknaꞌan aꞌa, pākuhan kami siye ledjikiꞌ si Tuhan. Bang kami binasade, sandalan kami hadja. 13Bang kami bissā-bissāhande, hāp panambung kami si siyehin. Sampay maꞌin pangimmatde kamihin kuweꞌ hadja kami seggik diyawaꞌ bettisde.
14Dumaꞌin hangkan sulatku inin pamaꞌiyaꞌku kaꞌam, saguwaꞌ panoloꞌku kaꞌam peggeꞌ kuweꞌ ne kaꞌam meꞌ anakku kalasahanku manamal. 15Peggeꞌ bisan pe ibuhan meꞌ guru manoloꞌan kaꞌam sabab Isa Almasihin, dambuwaꞌ du hadja samabin. Kemuwebi magdambuwaꞌ duk si Isa Almasi, aku ne kuweꞌ samabin sabab aku tagnaꞌ mangakahan kaꞌam sabab aka-aka mahāpin. 16Hangkan hep peggeꞌ aku samabin, junjungku si kaꞌam, lekkatun bi addatkun. 17Iye inin sababnen hangkan daꞌakku ne piyu si Timoteo supaya kaꞌam taꞌu ngalekkat addatkun. Kalasahanku iye duk kuweꞌ ne iye anakku peggeꞌ taboꞌoku iye sandel pu si Isa Almasi. Kapangandelan teꞌed iye. Paꞌessebanne du kaꞌam bang subey saꞌingge kawul-piꞌil meꞌ aꞌa manuhut Isa Almasihin. Kuweꞌ iyan isab kawul-piꞌilkun kemuwe nuhut ku Isa Almasi. Duk iye isab iyan panoloꞌku si meꞌ masandel pu si Isa si meꞌ kalahatan papīhankun.
18Na, niyaꞌ kaꞌam luꞌu langkew ateybin peggeꞌ kannalbi weꞌ gaꞌi ne ku piyu nindew kaꞌam. 19Saguwaꞌ piyu du ku si kaꞌam mura bang amban bayaꞌ Tuhan du, duk kataꞌuhanku du iyan bang bennal luꞌu balakat Tuhanin si meꞌ aꞌa malangkew ateyne iyan atawa bang ekka hadja bissāde. 20Peggeꞌ bang aꞌahin asal pagbayaꞌan Tuhanin, kataꞌuhan du weꞌ bennal inin dumaꞌin hadja sabab bissānen, saguwaꞌ sabab meꞌ hinanganne mahāpin takite balakat Tuhanin. 21Na, inggehin kabayaꞌanbi? Bang gaꞌi pindahanbi hinanganbin, piyu ku ngalegga kaꞌam. Saguwaꞌ bang pindahanbi du, hāp du ku si kaꞌam duk pakitehanku lasakun si kaꞌam.
ទើបបានជ្រើសរើសហើយ៖
1 Korinto 4: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.