1 Korinto 6
6
Sabab meꞌ palkalaꞌ
1Na, inin sabab meꞌ palkalaꞌbin. Weꞌey teꞌ bang niyaꞌ pagsaggaꞌanbi duk pagkasibi masandel pu si Isa Almasihin, pī kaꞌam maghukum si aꞌa gaꞌi sandel pu si Isa Almasi? Weꞌey gaꞌi boꞌobi pī si meꞌ aꞌa sukuꞌ si Tuhanin duk siye mangahukum kaꞌamin? 2Gaꞌi ke kataꞌuhanbi weꞌ si ellew dambuli, kite bi meꞌ sukuꞌ si Tuhanin mangahukum manusiyaꞌin? Na, bang kite bi mangahukum meꞌ aꞌahin si ellew dambuli, makajari ne kaꞌam ngahukum meꞌ palkalaꞌbi madikiꞌin. 3Kataꞌuhanbi ke isab weꞌ bisan meꞌ malaꞌikatin hukumte bi du si pasōngan? Na, lagiꞌ ne bang meꞌ palkalaꞌ si dunya kuweꞌitu inin subey hukumte. 4Hangkan bang niyaꞌ meꞌ palkalaꞌbi duk meꞌ pagkasibin, weꞌey pe boꞌobi pī hinukum si meꞌ aꞌa gaꞌ niyaꞌ lamudde si kite bi meꞌ masandel pu si Isa Almasihin? 5Subey kaꞌam iyaꞌ! Weꞌ gaꞌ ne teꞌed niyaꞌ luꞌu si kaꞌam meꞌ masandel pu si Isahin bisan dambuwaꞌ taꞌu ngahukum kaꞌam bang niyaꞌ pagsaggaꞌanbi? 6Saguwaꞌ kaꞌam, iye bahanbin moꞌo meꞌ palkalaꞌbin dinaꞌak hinukum si meꞌ aꞌa gaꞌi bisan sandel pu si Isa Almasi.
7Weꞌey teꞌ kaꞌam pī mabayaꞌ hinukum? Iye ne iyan salaꞌbin! Hāp pe siꞌ imananbi hadja bang niyaꞌ ngalaꞌat kaꞌam atawa ngaliba kaꞌam. 8Saguwaꞌ kaꞌam ne iye mangahinang laꞌatin duk mangalibahin, bu hinangbi pe inin si meꞌ pagkasibi masandel pu si Isahin. 9Gaꞌi ke kataꞌuhanbi weꞌ meꞌ aꞌa maghinangan malaꞌatin gaꞌi sumakup dem pagbayaꞌan Tuhanin? Hangkan hep pikil-pikilun bi teꞌed inin duk kaꞌam gaꞌi salaꞌ. Sasuku magjina atawa numba meꞌ tuhan-tuhan atawa ngabayaꞌan anda saweꞌne atawa maghinangan laꞌat duk pagkasine lella atawa dende, gaꞌi siye sumakup dem pagbayaꞌan Tuhanin. 10Damikkiyan meꞌ manangkewin atawa manapsuhanin atawa palalangohin atawa mamissā-missāhan saweꞌnen atawa mangalaꞌugan saweꞌnen supaya taꞌeddoꞌne panyapnen, gaꞌi siye sumakup dem pagbayaꞌan Tuhanin. 11Matuꞌuhin niyaꞌ kaꞌam kuweꞌ miyaꞌan hinanganbin. Saguwaꞌ kuweꞌitu sinutsi ne kaꞌam, inānan ne dusebin. Tahinang ne kaꞌam meꞌ aꞌa Tuhanin. Kinimmatan ne kaꞌam bentel weꞌ Tuhanin sabab tahinang Panuhutanten bi Isa Almasi duk sabab balakat Niyawa Tuhanten bi.
Subey gunabi baranbin pamahadjebi Tuhanin
12Na, inin sabab napsu baranten. Kaw niyaꞌ luꞌu magpaꞌin, “Makajari hinangku ine-ine kabayaꞌanku basta gaꞌi ku ngalanggalan saraꞌ.” Toꞌo iyan, saguwaꞌ gaꞌi kēmon kinabayaꞌanbi hininangin makahāp kaꞌam. Bang paꞌinku, “Makajari hinangku ine-ine kabayaꞌanku,” toꞌo iyan, saguwaꞌ gaꞌi ku mabayaꞌ tinagi si hinangkun. 13Kaw isab niyaꞌ seddili luꞌu magpaꞌin, “Kinakanin hininang para inisi dem betteng duk bettengin hininang para pangisihan kinakan.” Toꞌo iyan, saguwaꞌ gaꞌi subey tapikilte weꞌ subey duhulante napsu baranten. Si pasōngan gaꞌ ne niyaꞌ kagunahan bettengin duk kinakanin hangkan pinakaꞌatan weꞌ Tuhanin du kaduwe. Daꞌa kaꞌam magpaꞌin weꞌ magjina hadja kite peggeꞌ iye iyan kabayaꞌan baranten. Peggeꞌ dumaꞌin hangkan hinang Tuhanin baranten duk tagunate pagjina saguwaꞌ duk tapudjite bi Isa Almasi duk tapaghinang kite si iye. Duk ipat Isa Almasi isab baranten. 14Pinakellum weꞌ Tuhanin Panuhutanten bi Isa Almasi amban kamateynen duk si pasōngan pakellumne du isab kite bi balik weꞌ balakatne mahadjehin.
15Kataꞌuhanbi du weꞌ kite bi meꞌ masandel pu si Isa Almasihin, meꞌ baranten bi dalil panyap baran Almasihin. Gaꞌi tewwaꞌ bang aꞌa kinimmatan panyap baran Almasihin ne paꞌulid pī si dende dupang. 16Gaꞌi ke kataꞌuhanbi weꞌ bang lellahin paꞌulid pī si dende dupang magdambuwaꞌ baran ne siye? Tasulat hep dem kitab, pinaꞌin, “Bang lellahin duk dendehin magulid, magdambuwaꞌ baran ne siye.” 17Saguwaꞌ bang patuhut kite pu si Isa Almasi, magdambuwaꞌ ateyten duk ateynen.
18Amey-amey pakalehun bi, daꞌa teꞌed kaꞌam magjina peggeꞌ laꞌatan teꞌed duse iyan. Sinduwe dusehin gaꞌi du makaꞌine baran aꞌahin, saguwaꞌ bang aꞌahin magjina magduse iye si di barannen. 19Weꞌ gaꞌi ke kataꞌuhanbi weꞌ baranbin dalil lumaꞌ patennaꞌan Niyawa Sutsihin, iye pinangurung Tuhan si kaꞌamin duk mapatennaꞌ dem baranbin? Dumaꞌin kaꞌam dapuꞌ baranbin saguwaꞌ Tuhanin. 20Kuweꞌ binelli kaꞌam weꞌ ne duk hunit pamayedannen supaya kapuwasan dusebin. Hangkan subey gunabi baranbin pamahadjebi Tuhanin.
ទើបបានជ្រើសរើសហើយ៖
1 Korinto 6: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.