Daa 43
43
Yosɛfu vĩiɔ ɛa gɛa Egipi ń Bɛ̃yãmɛo
1Imina pãsĩkũ̀ Kanaa busuu. 2Kɛ́ aa pɔwɛna pɔ aa bɔ̀ò Egipi blè, à làa, an mae ònɛ́: À ɛa gɛ́ pɔwɛna lui yɔɔ lɔ. 3Ɔ̃ Yuda òɛ̀: Gbɛ̃́pi òwɛ̃ɛ sãasãɛ à mɛ̀, tó wá dãuna kuwanɔo, wásu to wà wɛsikɔ̃lɛo. 4Tó ńyɔ̃ wei wá dãuna gɛ́wanɔ lé, wá gɛ́ blɛ luinɛ. 5Tó ni wei sɔ̃o, wá gɛ́o, asa gbɛ̃́pi òwɛ̃ɛ, tó wá dãuna kuwanɔo, wásu to wà wɛsikɔ̃lɛoɛ. 6Ɔ̃ Isaili mɛ̀: Bɔyãi a ĩadàa á ò gbɛ̃́piɛ á dãuna vĩi? 7Aa wèwà aa mɛ̀: Aapi mɛ́ yãlàlawá ń wá bɛdeɔ yãɔ. À mɛ̀: Á mae ku e tiaa? Á dãuna vĩa? Yã beeɔ musu ɔ̃ wá wèwà. Wá dɔ̃ yãa a mɛ wà mɔ ń wá dãunao yã?
8Ɔ̃ Yuda ò a maeɛ: To nɛpi gɛ́manɔ. Wá fɛlɛ wà gɛ́ gɔ̃̀ɔɛ kɛ́ wapiɔ ń mpio ń wá nɛɔ wásu gagao yãi, wíɔ ku aafia. 9À gɔ̃̀ ma yã ũɛ. Ma azĩa wɛ̃ni dìlɛ aà pɔ gbɛu. Tó mi sunɛaanɔ aafiao, má gɔ̃ n taaede ũɛ. 10Tó wi seakɛ yãao, dɔ̃ wa gɛ a gɛ̃n plaadei, wa ɛa wa su. 11Ɔ̃ an mae ònɛ́: Lá màaɛ, à yãɛ bee kɛ. À wá busu pɔmaaɔ sɛ́, à ka á sakiliɔ guu, í gɛ à gbɛ̃́pi gba. À nisidɔɔma sɛ́ yɔɔ ń zɔ'io yɔɔ ń li'ɔo ń tulaletio ń gɔɔɔo ń sĩo. 12À gɛ́ ń ɔ̃ao lɛɛ pla, í ɔ̃a pɔ wa dàɛ́ á sakiliɔ guu sɔaanɛ́. Tó wà zã̀wàn nò, á dɔ̃o. 13À á dãuna sɛ́, í ɛa gɛ́ gbɛ̃́pi kĩi. 14Lua Gbãapiide to gbɛ̃́pi wɛ̃nadɔ̃ɛ́, i á gbɛ̃do ń Bɛ̃yãmɛo gbaɛ aa suánɔ. Mapi sɔ̃, tó Lua ma nɛɔ sìaɛ, a sìan we.
15Aa pɔ pɔ wa gɛ wà aà gbapi sɛ̀lɛ ń ɔ̃ao lɛɛ pla ń Bɛ̃yãmɛo, aa fɛ̀lɛ gɛ̀ Egipi, ɔ̃ aa gɛ̀ Yosɛfu kĩi. 16Kɛ́ Yosɛfu Bɛ̃yãmɛ è ń guu, a ò a bɛ ziiaɛ: Gɛ́ ń gbɛ̃́ɛ beeɔ ma bɛ. Nɔ̀ɔ dɛ ǹ kɛkɛ, asa aa pɔblemanɔ fãanɛaɛ. 17Ziiapi yã pɔ Yosɛfu dàɛ kɛ̀, àlɛ gɛńnɔ aà bɛ. 18Kɛ́ wàlɛ gɛńnɔ Yosɛfu bɛ màa, vĩa ń kṹ aa mɛ̀: Ɔ̃a pɔ wa dà wá sakiliɔ guu yãa yã mɛ́ tò wà mɔ̀wanɔ la. Wa ye kusiwá wa wá nɛ́, wi wá kũkũ zɔɔ ũ, wi wá zaa'ĩnaɔ sɛlɛɛ. 19Kɛ́ aa kà Yosɛfu bɛ kpɛɛlɛ, aa sɔ̃̀ aà ziiapizi aa mɛ̀: 20Mae, n yã na! Wa mɔ la káau blɛ luiɛ. 21Kɛ́ wa ka gu pɔ wálɛ iu, wa wá sakiliɔ pòlo, ɔ̃ wá baade a ɔ̃a è a sakiliu kyaukyau. Ɔ̃ wa suò kɛ. 22Wa mɔ ń a pãleo kɛ́ wà blɛ luò. Wá dɔ̃ demɛ wá ɔ̃apiɔ sɔ̀aawɛ̃ɛ wá sakiliɔ guuo. 23Ziiapi mɛ̀: Ásu bilikɛo, ásu to vĩa á kṹo. Á Lua, á mae Lua mɛ́ ɔ̃api dàdaɛ́ á sakiliɔ guu. Á ɔ̃a ma kĩi lè. Ɔ̃ à Simɛɔ bɔ̀nɛ́. 24Ziiapi gɛ̃̀ńnɔ Yosɛfu ua, à ikpàmá aa zu'oò, ɔ̃ à sɛ̃ kpà an zaa'ĩnaɔwa. 25Ɔ̃ aa pɔ pɔ wa Yosɛfu gbapi yãkɛ̀kɛ e aàɔ gɛ́ sui fãanɛ, asa aa mà wà mɛ̀ wa pɔble weɛ.
26Kɛ́ Yosɛfu sù bɛ, aa aà gbà pɔ pɔ aa mɔ̀òɛ̀pi, aa wùlɛwulɛ tɔɔlɛ aà aɛ. 27À ń aafia gbɛ̀a, ɔ̃ à mɛ̀: Á maezi pɔ a aà yã'òpi gbãaó? A ku e gbãa? 28Aa wèwà aa mɛ̀: Wá mae n zɔblena gbãa, a ku e tia. Ɔ̃ aa kùlɛkulɛɛ̀, aa wùlɛ ń gbɛɛu. 29Yosɛfu wɛsɛ̀, à a dãuna dadoũde Bɛ̃yãmɛ gwà à mɛ̀: Á dãuna pɔ a aà yã'òmɛɛpin laa? Ɔ̃ a ò Bɛ̃yãmɛɛ à mɛ̀: Lua baaadangu. 30Kɛ́ à a dãuna gwà, aà pɔ kɛ̀ na zɔ̃ɔ, a ye ɔɔlɔ, ɔ̃ à gɛ̃̀ kpɛa kpakpa, à ɔɔlɔ̀ we. 31Kɛ́ à oopì, ɔ̃ à bɔ̀, à azĩa kũkũa, à mɛ̀ wà mɔ ń blɛo.
32Wà blɛ dìlɛɛ̀ adoa, ampiɔ ńdoa, Egipi pɔ aa kuaanɔɔ ńdoa lɔ, asa Egipiɔ lí pɔble ń Hɛbɛluɔo, aali yãalɛńnɔo. 33Wà ń zɔ̃lɛzɔ̃lɛ aà aɛ lá an ia tɛ̀tɛkɔ̃iwa, za nɛgɔ̃ɛ sɛ̃iawa e an gɔ̃zãnawa, ɔ̃ aa lɛ'ɛ̀lɛ, aa kɔ̃ gwàgwa. 34Ɔ̃ wà blɛ pɔ ku Yosɛfu aɛ kpaalɛ̀nɛ́. Bɛ̃yãmɛ pɔ zɔ̃ɔ dɛ gbɛ̃kĩniɔ pɔla lɛɛ sɔo. Ɔ̃ aa pɔblè aa imìaanɔ e wà kã̀.
ទើបបានជ្រើសរើសហើយ៖
Daa 43: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.