Daa 42
42
Yosɛfu vĩiɔ mɔa blɛ lui Egipi
1Kɛ́ Yakɔbu mà pɔwɛna ku Egipi, a ò a nɛɔnɛ: Áɔ kalɛ la pã yã? 2Má mà pɔwɛna ku Egipi. À gɛ́, à luwɛ̃ɛ we, kɛ́ wásu gagao, wíɔ ku aafia.#Zĩn 7.12 3Ɔ̃ Yosɛfu vĩi gbɛ̃ɔn kwiɔ gɛ̀ Egipi pɔwɛna lui. 4Yakɔbu i Yosɛfu dãuna Bɛ̃yãmɛ zĩńnɔo, asa à mɛ̀: Wìliɔ dɔ̃o tó yãvãi sù aà lè sɔ̃ bɛ. 5Ɔ̃ Isaili nɛpiɔ gɛ̀ pɔwɛna lui ń gbɛ̃pãleɔ, asa iminapi kà Kanaa busuu sɔ̃ɛ.
6Yosɛfu mɛ́ busupi gbɛ̃zɔ̃ɔ ũ. Ɔ̃mɛ ì pɔwɛna yia gbɛ̃piiwa. Ɔ̃ aà vĩiɔ mɔ̀ kùlɛkulɛɛ̀, aa mipɛ̀lɛpɛlɛ. 7Kɛ́ à a vĩiɔ è, à ń dɔ̃́, ɔ̃ à azĩa kɛ̀nɛ́ lan nibɔwa. Ɔ̃ à yã'ònɛ́ pãsĩpãsĩ à ń lá à mɛ̀: A bɔ má ni? Aa wèwà aa mɛ̀: Wa bɔ Kanaa busuu, wa mɔ blɛ luiɛ.
8Yosɛfu a vĩiɔ dɔ̃̀, ãma aai aà dɔ̃o. 9Nana pɔ a ò an yãmusu#Daa 37.5-10 yãa dɔ̀aagu, ɔ̃ a ònɛ́: Zãmadeɔn á ũ, a mɔ wá busu asiigwaiɛ. 10Aa wèwà aa mɛ̀: Aawo Baa! N zɔblenaɔn wá ũ, wa mɔ blɛ luiɛ. 11Dedoũdeɔn wá ũ wapii. Naaideɔn wá ũ. Wapiɔ n zɔblenaɔ, zãmadeɔn wá ũo. 12Ɔ̃ a ònɛ́: Ɛgɛɛ! A mɔ wá busu asiigwaiɛ. 13Aa mɛ̀: Wapiɔ n zɔblenaɔ, dedoũdeɔn wá ũ, wá gbɛ̃ɔn kuɛplaɛ. Kanaa busu gbɛ̃ɔn wá ũ. Wá dãuna gɔ̃̀ bɛ ń wá maeo, wá gbɛ̃do sɔ̃, a kuo. 14Ɔ̃ Yosɛfu ònɛ́: Lá má òɛ́wa, zãmadeɔn á ũ. 15Pɔ pɔ a to mà á yã sĩana dɔ̃n kɛ: Ń Falaɔ̃ baaao á bɔlɛ lao, sema á dãunapi mɔ̀ la baasio. 16À á gbɛ̃do zĩ á dãunapi sɛi, á gbɛ̃kĩniɔ gɔ̃ dakpɛunaɔ ũ laɛ, mí dɔ̃ tó á yãá sĩanaɛ. Tó màa no, ń Falaɔ̃ baaao zãmadeɔn á ũ. 17Ɔ̃ à ń ká kpɛ́u e gɔɔ aaɔ̃.
18A gɔɔ aaɔ̃depizĩ a ònɛ́: Má Lua vĩa vĩ. À yã pɔ má òɛ́ kɛ, í bɔ aafia. 19Tó naaideɔn á ũ, à á gbɛ̃do to da kpɛ́u la, á gbɛ̃kĩniɔ í ta ń pɔwɛnao á bɛde nɔandɛnaɔnɛ, 20í ɛa mɔmɛɛ ń á dãunapio, mí dɔ̃ sa kɛ́ á yãá sĩanaɛ, mɛ́ wa á dɛdɛ lɔo. Ɔ̃ aa wèi màa.
21Aa òkɔ̃ɛ: Sĩanaɛ taaedeɔn wá ũ yã pɔ wá kɛ̀ wá dãunaɛ yãa yãi. Wá è gɔɔ pɔ àlɛ awakpawɛ̃ɛ wɛ̃nannɔ, ɔ̃ wi aà awa mao. Bee yãi yãɛ bee wá léi. 22Ɔ̃ Lubɛni ònɛ́: Kɛ́ má òɛ́ ásu yãe kɛ nɛpiɛo, a gi ma yãmai, aà au tɔ ɔ̃ Lua lɛ́ siwá kɛ. 23Aa dɔ̃ Yosɛfu lɛ́ mao, asa kɛ́ à yã'ònɛ́, wa sɛ̀lɛ wa sìunɛ́ɛ. 24Ɔ̃ à gòńla à gɛ̀ ɔɔlɔ̀. Kɛ́ à sù, à yã'ònɛ́, ɔ̃ à Simɛɔ bɔ̀ ń guu, à mɔkàwà ń wáa. 25Yosɛfu mɛ̀ wà pɔwɛna kanɛ́ ń sakiliɔ pai, wi ń baade ɔ̃a dauɛ̀, wi zɛ́ kũsũa kɛnɛ́. Kɛ́ wa kɛ̀nɛ́ màa, 26aa ń pɔwɛnaɔ dì ń zaa'ĩnaɔnɛ, ɔ̃ aa dà zɛ́u.
27Kɛ́ aa kà gu pɔ aalɛ iu, kɛ́ an gbɛ̃do a sakili pòlo à pɔ kpá a zaa'ĩnawa, ɔ̃ à a ɔ̃a è a sakiliu. 28Ɔ̃ a ò a gbɛ̃́ɔnɛ: À ma sakili guu gwa, wà ma ɔ̃a sɔ̀aamɛɛe! Ɔ̃ sɔ̃ kɛ̃̀ńgu, aa òkɔ̃ɛ ń lualuao: Bɔ́ yã Lua kɛ̀wɛ̃ɛ màai? 29Kɛ́ aa kà ń mae kĩi Kanaa busuu, aa yã pɔ ń lé sɛ̀lɛ aa sìuɛ̀ pii aa mɛ̀: 30Busu gbɛ̃zɔ̃ɔpi yã'òwɛ̃ɛ pãsĩpãsĩ, à wá dilɛ zãmadeɔ ũɛ. 31Wá òɛ̀ naaideɔn wá ũ, zãmadeɔn wá ũo. 32Dedoũdeɔn wá ũ, wá gbɛ̃ɔn kuɛplaɛ, wá gbɛ̃do kuo, wá dãuna gɔ̃̀ Kanaa busuu ń wá maeo. 33Ɔ̃ busu gbɛ̃zɔ̃ɔpi òwɛ̃ɛ à mɛ̀, pɔ pɔ a to à wá dɔ̃ naaideɔ ũn kɛ: À mɛ̀ wà wá gbɛ̃do toanɔ, wí blɛwɛna sɛ́ wà taò wá bɛde nɔandɛnaɔnɛ, 34wí ɛa mɔɛ ń wá dãunao, í dɔ̃ sa kɛ́ zãmadeɔn wá ũo, naaideɔn wá ũ, í wá gbɛ̃do kpawá, wíɔ laata busupiu.
35Kɛ́ aalɛ pɔwɛna bɔlɛ ń sakiliɔ guu, an baade a ɔsɔ̃ɔ è a pɔ guu. Kɛ́ aa ń ɔ̃aɔ è màa, vĩa ń kṹ mpii ń ń maeo. 36Ɔ̃ an mae ònɛ́: Á ye mà gɔ̃ nɛsai yã? Yosɛfu kuo, Simɛɔ kuo, ɔ̃ á ye à Bɛ̃yãmɛ sia lɔa? Yãpii lɛ́ wí ma musuɛ. 37Ɔ̃ Lubɛni ò a maeɛ: Tó mi sunɛaanɔo, ma nɛgɔ̃ɛ plaaɔ dɛdɛ. Ǹ aà kpaa, má sunɛaanɔɛ. 38Ɔ̃ Yakɔbu mɛ̀: Ma nɛ a gɛ́ánɔo, asa aà vĩi dadoũde gàɛ, ɔ̃mɛ gɔ̃̀ ado. Ma zikũ̀. Tó yãe sù aà lè tá pɔ álɛ o guu, a to mà ta miau ń pɔsiaoɛ.
ទើបបានជ្រើសរើសហើយ៖
Daa 42: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.