Bɔa 18
18
Yetolo gɛa Mɔizi gwai
1Mɔizi ãnsue Yetolo, Madiã sa'ona, yã pɔ Lua kɛ̀ Mɔiziɛ ń a gbɛ̃́ Isailiɔ mà, lá Dii ń bɔlɛ Egipi. 2Mɔizi a na Sefola gbàɛ bɛ yãa 3ń a nɛgɔ̃ɛɔ gbɛ̃ɔn pla.#Zĩn 7.29 Ado tɔ́n Geesoũ,#18.3 Bee mɛ̀ bɔmɔ asa Mɔizi mɛ̀ busu pãleu la bɔmɔn a ũ. 4Ado tɔ́n Ɛliɛzɛɛ,#18.4 Bee mɛ̀ Lua ma dɔnlɛde asa Mɔizi mɛ̀ a mae Lua dɔ̀alɛɛ, à a bɔ Falaɔ̃ fɛ̃nda lɛzĩ. 5Ɔ̃ Yetolo fɛ̀lɛ àlɛ mɔ́ Mɔizi kĩi ń aà nɛɔ ń aà nao gu pɔ à bookpàu Lua gbɛ saɛ gbáau. 6À lɛkpãsãkɛ̀ Mɔiziɛ à mɛ̀: Malɛ mɔ́ n kĩi ń n nao ń n nɛ plaaɔ. 7Mɔizi bɔ̀ dà a ãnsuelɛ, à kùlɛ à lɛpɛ̀wà. Aa kɔ̃ aafia gbɛ̀a, ɔ̃ aa gɛ̃̀ kpɛ́u. 8Mɔizi yã pɔ Dii kɛ̀ Falaɔ̃ɛ ń Egipiɔ Isailiɔ yãi dàu a sìuɛ̀ pii ń taasi pɔ ń le zɛ́uɔ pii ń lá Dii ń bɔuo. 9Yetolo pɔ kɛ̀ na yãmaa pɔ Dii kɛ̀ Isailiɔnɛwa pii ń lá à ń bɔlɛ Egipiɔ ɔzĩo. 10Ɔ̃ à mɛ̀: Wà Dii saaukpa, lá à á bɔlɛ Falaɔ̃ ń Egipiɔ ɔzĩ. 11Má dɔ̃̀ sa kɛ́ Dii zɔ̃ɔ dɛ dii kĩniɔla piiɛ. Kɛ́ Egipiɔ bãnkũ̀wá, a ɔlɔ̀nɛ́. 12Ɔ̃ Yetolo sa pɔ wì a pɔ katɛu à tɛkũ ò Luawa ń sa pãleɔ lɔ. Ɔ̃ Aalona ń Isaili gbɛ̃zɔ̃ɔɔ mɔ̀ aa pɔblèaanɔ Lua aɛ mpii.
Yãgɔ̃gɔ̃naɔ dilɛa
(Iko 1.9-18)
13Kɛ́ gu dɔ̀ Mɔizi zɔ̃̀lɛ àlɛ yãgɔ̃gɔ̃nɛ́, aa kalɛaaazi za kɔɔ e oosi. 14Kɛ́ Mɔizi ãnsue yã pɔ àlɛ kɛnɛ́ è pii, ɔ̃ à aà là à mɛ̀: Bɔ́ nlɛ kɛ ń gbɛ̃́ɛ beeɔ màai? Bɔyãi nlɛ yãkpalɛkɛnɛ́ ndo, gbɛ̃pii kalɛanzi za kɔɔ e oosii? 15Mɔizi wèwà à mɛ̀: Gbɛ̃́ɔ ì mɔ ma kĩi Lua lɛdama maiɛ. 16Tó aa yãkele vĩ, aaì mɔ ma kĩi mà yãpi gɔ̃gɔ̃nɛ́, mí Lua ikoyã pɔ a dìlɛɔ onɛ́.
17Mɔizi ãnsue òɛ̀: Yã pɔ nlɛ kɛpi maao. 18Ńyɔ̃ kpasa, gbɛ̃́ pɔ kunnɔɔ i kpasa lɔ, asa zĩpi dɛnlaɛ, ńyɔ̃ fɔ̃ ǹ kɛ ndoo. 19Ma yãma sa, má lɛdama, Lua iɔ kunnɔ. Ǹyɔ̃ dɛnɛ́ kɔ́ɔ ũ, níɔ gɛ́ ń ń yãɔ Lua kĩi, 20níɔ ikoyã pɔ Lua dìlɛɔ danɛ́, níɔ zɛ́ pɔ dɛ aa sɛ ɔlɔnɛ́ ń yã pɔ aali kɛɔ. 21Gbɛ̃́ laaide naaide pɔ aa Lua vĩa vĩ mɛ́ aali gbagusaɛ síoɔ plɛ ń guu, ní ń dilɛ gbɛ̃ɔn ɔaasɔoɔ dɔaanaɔ ũ ń gbɛ̃ɔn basɔoɔ pɔo ń gbɛ̃ɔn blakwiɔ pɔo ń gbɛ̃ɔn kwiɔ pɔo 22aaɔ yãgɔ̃gɔ̃nɛ́ gɔɔpii. Aali mɔma ń yã zĩ'ũɔ pii, ãma aali yã yɔɔnaɔ gɔ̃gɔ̃ ńzĩa. Beewa ɔ̃ aa n aso laonɛ. 23Tó Lua wèinɛ mɛ́ ń kɛ̀ màa, ńyɔ̃ fuo, gbɛ̃́piɔ i ta bɛ aafia.
24Mɔizi a ãnsue yãmà, a kɛ̀ lá a òɛwa pii. 25À gbɛ̃́ laaideɔ plɛ̀ Isaili buiɔ guu pii, à ń dilɛ gbɛ̃ɔn ɔaasɔoɔ dɔaanaɔ ũ ń gbɛ̃ɔn basɔoɔ pɔo ń gbɛ̃ɔn blakwiɔ pɔo ń gbɛ̃ɔn kwiɔ pɔo. 26Ɔ̃ aaìɔ yãgɔ̃gɔ̃nɛ́ gɔɔpii. Yã zĩ'ũɔ ɔ̃ aaì mɔò Mɔiziwa, ɔ̃ aaì yã yɔɔnaɔ gɔ̃gɔ̃ ńzĩa. 27Mɔizi gɛ̀ zɛ̀ a ãnsueɛ, ɔ̃ à tà a busuu.
ទើបបានជ្រើសរើសហើយ៖
Bɔa 18: Boo2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Boko Bible © SIM International, 2024.