Isa 26
26
Re' rutz'uyjiik wach i Dios ruum i ko'linik xub'an
1Chupaam ponoq i q'iij re' re',
je' wili i naa kiq'orom pankitz'uuy i aj Judá:
Xti korik wo' chi q'e' kow riib' i qatinamiit ruum xqa a'n ruko'ljiik qiib'.
Eh re' i QaJaaw Dios xyej-anik reh i tz'aq kotimaj wii' riij i qatinamiit.
2Yu'naak cha teh taq i ookb'al reh i tinamit,
reh chi neekiokik ar i korik wach kik'ux,
i kib'anik reh i korik.
3QaJaaw Dios, re' hat i nayeew keh
i suq kiil k'uxliis i kiye'em kik'ux awuuk',
ruum awuuk' i hat ch'iklik kik'ux.
4Je' re' noq eliik taq chayeew ak'ux
ruuk' i QaJaaw Dios, ruum xa re' wo' reh
neenko'linik taq aweh chi juneliik.
5Eh re' reh ineesanik i runimaal kiwach
inkinimb'isaj kiib'.
Eh xusach kiwach i tinamit ma' tiklik ta kib'anik,
xukut taqe wach ak'al i q'e' naq kow kiib.
6Eh re' chik taqe neb'aa'
naa rukojom pan kitinamiit,
naakiyeq'ariik panak'al kuum i neb'aa', inko'q taqe.
7QaJaaw Dios re' taqe i korik wach kik'ux re' i holohik b'eeh inkik'am,
ruum re' hat ti ye'wik keh chi naab'jik.
8QaJaaw Dios, re' hoj q'e' suq qak'ux
chuk'amariik i b'eeh i ruq'or qeh taqe aak'uhb'aal.
Re' i wilik panqanima i hoj re' chi xa re' wo' hat
naa kaat qakapaam chi juneliik.
9Re' hin rajlaal aq'ab' inusik' awotob'il, chu'nchel i wánima,
je' wo' pantaq wahq'eq.
Je' re' i naa nub'anam nik' pa' chik najtiil i nuk'achariik ayu' wach ak'al.
Ruum re' hat naa a'nam i q'ataj q'orik wach ak'al,
re' tinamit inchol kisik'im i korik.
10Re' hat naa wo' naq aketelaam kiwach i yiib' wach kina'ojb'al,
xama' naa ta wo' kireqem chi riij, i korik.
Eh xa re' i yiib' wach inki a'n chupaam i kiye'aab' i korik wach kik'ux,
xama' inkiyohleej ta wo' awach i hat.
11QaJaaw Dios re' hat ayejaam chik wach i ti' k'axik chi keh,
eh re' keh xama' inkikoj ta wo' rehtaal.
Eh noq naakilom i chi naa ak'axam aatinamiit,
re' keh naa kikahniik chi xa se'lb'al taqe.
Jaaw chasach kiwach ruuk' aajosq'iil.
12QaJaaw Dios, re' hoj qeht'al chi re' hat ti ye'wik
qeh i suq laj k'acharik.
Eh re' hat ti k'amwik qab'eeh chub'anariik aakamaj.
13QaJaaw Dios, re' hoj noq xub'an k'ih naq taqe
inchopwik qanaah chi ehchan qeh.
Eh yu'naak xa re' chik i hat qeht'al awach chi hat ehchan qeh,
eh chi hat QaJaaw chi manlik.
14Re' taqe i kichopwik naq qanaah, xikimik chik reje,
eh ma' naa ta chik kik'aach chaloq.
Ruum re' hat xat ye'wik keh panti' k'axik,
xasach kiwach chi jumpech.
15QaJaaw Dios, re' hat xat
k'ihaaxb'isanik reh i qatinamiit,
ma' xata chik je' nimaal noq xwihik cho najtir.
Re' nawaaj i hat chi naa ruye'ariik runimaal awach.
16QaJaaw Dios, noq xoj ayeew chutojariik i qamahk,
xqa'an qatiij chawach.
Eh noq k'ahchi' qik'iik chi ti' k'axik,
qapahqaaj awotob'il.
17Eh ruum chi xat sahchik panqak'ux xqak'ul i ti' k'axik, xama' inqakuy ta chik,
xan qab'ak'ej chik qiib' ruum i ruti'kiil.
Xa je' chik rukab' i ruti'kiil ixoq noq nk'ulik ruk'ux.
18Re' hoj xqak'ul i ti' k'axik je' rukab' i ruk'ul ixoq noq ink'ulik ruk'ux,
xa re' la' xama' xta wo' xuk'am chaloq.
Xa ma' xqak'am ta wo' chaloq i ko'lemb'al reh i qatinamiit,
eh xama' xqak'ihaaxb'isaj ta wo' hoq i tinamit.
19Eh re' hat
naa wo' chik kik'aach chaloq aatinamiit,
re' taqe i je' muqulkeeb' panjul.
Eh naakik'erem kichii' chi tz'uuy
ruum naa wo' chik aye'em kik'achariik je' rukab' noq
inqajik chaloq i mus jab' chinaah i tik.
20Hat taq nutinamiit
okeen pee taq i koq panapaat
chatz'ap taq chaloq aapuerta
chakeb'aa' pee taq awiib' jarub'-oq q'iij.
Ar taq naa awihiik korehtaal irik'saj i rujosq'iil i QaJaaw Dios.
21Re' QaJaaw Dios naa ruqajiik chaloq
chikinaah chu'nchel i tinamit.
Eh naa taqe ruye'em chutojariik i kimahk,
ma' naa ta rub'anam chi naa kipoyom
ikaansanik kianam,
naa la' reliik wach saqum nik' nimaal i mahk kianam.
Currently Selected:
Isa 26: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
