Isa 25
25
Re' i rutz'uyjiik wach i Dios ruum i rotob'il xub'an
1WaJaaw hat nuDios, re' hin i nuyeew aloq'il,
i nuyeew runimaal wach aab'ihnaal,
ruum xa a'n taqe i sahchb'al k'uxliis, ayejaam cho wach najtir.
Eh korik wo' hoq chi xooj eloq wach.
2Re' hat xasach kiwach i tinamit,
xatuhb'aaj wach ak'al i tz'aq kotimaj naq wii' kiij.
Eh xasach kiwach i paat imb'aan wii' q'ataj q'orik,
re' i kiyejaam i ki-ixowanik qawach, eh ma' jaruuj chik naakikorjiik.
3Re' i jinaj chi tinamit kow i rub'an riib' i ruyeew aloq'il.
Re' taqe i tinamit xiik' naah kijosq'iil inkiyohleej awach.
4Ruum re' hat xatoob'eej taqe i neb'aa',
je' wo' taqe i toob'jik inkaaj
xako'leej taqe chikiwach imb'anik ti' k'axik keh.
Re' taqe i yohb'aal wach kijosq'iil,
xa je' chik kaq suut teew jab',
eh xa je' chik rukab' i tz'a'laj q'iij i kijosq'iil.
5Re' hat naa awesam i runimaal kiwach i nimaq kiwach,
je' rukab' i rutz'a'iil i q'iij chupaam i ye'aab'
chiq yuuq' naa aye'em chikinaah i aj ixowaal.
Je' rukab' noq imuujrik wach i rutz'a'iil i q'iij
ruum i suutz' noq naa atz'apam kichii' i xiik' naah kijosq'iil.
6Eh re' i QaJaaw Dios nim rajaawriik,
chinaah i yuuq' Sión naa rub'anam jinaj i ninq'iij
chi keh chu'nchel i nimaq taq tinamit.
Eh naa kik'uxum i suq laj wi'k,
eh suq laj k'uxb'al wi'k,
naa kuk'em i sik'oj wach riis uuva.
7Eh chinaah i yuuq' re' re' naa reliik reje
i naa resaniik reh i ti' k'axik chikinaah i tinamit.
Eh naa resam i ruti'kiil kik'ux
naa risam chikinaah i je' q'eq laj itz'ihy b'otooj taqe wii'.
8Re' i QaJaaw Dios naa risam i rajaawriik
i kimik chikinaah chi jumpech.
Eh naa rujuxum i riis naq' kiwach i rutinamiit
naa resam i kik'ixb'ilaal,
re' wili re' i QaJaaw Dios inq'orik reh.
9Eh chupaam i q'iij re' re' je' wili i naa kiq'orom i tinamit:
Re' aj re' i wili i xti manlik qaDios,
korik wo' hoq chi ruuk' i reh inqach'ikaa' qak'ux, eh re' reh xoj ruko'leej.
Ruum aj re' i ruk'ul chi naa rusuuqb'iik qak'ux,
ruum korik chi xoj ruko'leej chik, inko'q taqe.
10Re' i QaJaaw Dios naa ruko'liniik keh i naa kiwihiik chinaah i yuuq' Sión.
Eh re' tinamit Moab naa rusacham wach, na naa ruyeq'em kipaam,
je' rukab' imb'aan reh i sohk' panye'aab' reh.
11Eh re' taqe i aj Moab naa naq chik kiyub'um reje i kiq'ab' chi ko'lb'al kiib',
je' rukab' noq i ruyub' reje i q'ab' i aj mux panha'
xa re' la' xama' xta wo' chik naa rokiik wii',
ruum re' i QaJaaw Dios naa resaniik i kajaawriik.
12Eh re' i QaJaaw Dios naa rusachwiik kiwach inajt naah paat ko'lb'al kiib'.
Eh re' wo' reh naa rukutwiik wach ak'al i tz'aq
kotimaj wii' riij i tinamit re' re'.
Currently Selected:
Isa 25: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
