Isa 27
27
Re' i rehtesjiik chaloq panti' k'axik i tinamit Israel
1Eh chupaam i q'iij re' re', re' i QaJaaw Dios
ruuk' nimlaj ch'ihch' xiik' naah q'asiil
naa rukansam taqe aj ixowaal,
i je' kikab' i qamaan k'ap, je' wo' hoq
qamaan k'ap, i je' josq'laj aaq'. Eh je' wo' hoq i je' qamaam
josq'laj chikop wilik pam palaw.
2Eh je' wili i naa ruq'orom i Dios:
Re' taq i hat aj Israel cha tz'uyej taq wach aatinamiit,
re' i je' taqe suq laj uuva.
3Re' hin i Dios, hin naa nucha'jiniik keh
chi q'iij chi aq'ab',
reh chi ma' xta naakik'ulum
je' naa nukojom kiha'iil je' rukab' imb'aan reh i tik.
4Re' hin naa wesam i nujosq'iil chikinaah.
Eh wila' wilik i xi chalik chub'aan i ti' k'axik keh
jumehq'iil neenusach kiwach
je' rukab' noq ink'ahtik i k'iix, noq ink'ahtik i ch'ahn.
5Eh ¿Mi wilik re' i ki-ixowanik wach i nutinamiit
inkaaj chi naa nuko'leem taqe i ruk'ul naq chi nee kinkisik'?
eh nee naq kiokik wuuk' panotob'il, inki i Dios.
6Eh chupaam i q'iij re' re' naa ruk'amam wach i kik'achariik i aj Israel,
naa wo' chik ruwihiik kitoxl kixmak'al,
korehtaal inkinujisaj i wach ak'al ruuk' i kak'uun kixq'uun.
7Re' QaJaaw Dios ma' xuyeew
ta taqe chutojariik i kimahk i aj Israel,
je' rukab' xub'an keh inixowanik kiwach.
Eh ma' xukansaj ta wo' taqe i aj Israel je' rukab' i xb'aan kekeh.
8Eh xa re' wo' noq xuyeew taqe chutojariik i kimahk
noq xi k'amarik reje pan tokoom tinamit.
Eh xa junhuup i xub'an reje keh
je' rukab' i rub'an i teew inchalik parelb'aal q'iij.
9Re' QaJaaw Dios naa rukuyum
i kimahk taqe i riih rumaam i Jacob,
wila' kisachib'eej wach chu'nchel
i kiartaal inkiloq'ej wii' taqe tiyoox.
Eh wila' xkesaj chu'nchel i tiyoox Asera,
eh wix kituhb'aaj chu'nchel ab'aj
inkik'at wii' i kimayiij
chuwach taqe i tiyoox.
10Re' i tinamit kow naq riib'
naa rukahniik chi ma' xta chik kamaj,
Eh naa rukahniik chi je' rukab' i ye'aab' chiq yuuq',
Eh xa wakax chik i naa kianam kiwa' chuwach,
re' chik taqe i xaq i q'ab' i chee' naa kik'uxum ar, naakokiik chi hi'lik chi ri'sil.
11Re' taqe i q'ab' i chee' kiq'ehb'ik chaloq i kichiqiik,
eh re' taqe ixoq inkisik' chi kisii'.
Je' wo' re' i naakik'ulum i ma' xta kina'ojb'al.
Ruum aj re', re' i QaJaaw Dios
xtz'uhkrisanik cho keh, ma' naa ta rub'anam otob'il keh,
eh ni xata naa ruketeljiik kiwach.
12Eh chupaam i q'iij re' re', re' i QaJaaw Dios naa rumolom kiwach i rutinamiit.
Ar naa rutoq'aam chaloq i wilik wii' nim ha' Éufrates,
korehtaal imponik chi chii' i nim ha' Egipto.
Re' taqe i aj Israel naa rumolariik kiwach chi kiju'junaal
13Eh chupaam q'iij re' re',
kow naa ruxuljiik chaloq i tuun.
Eh re' taqe i rutinamiit i Dios k'amooj taqe reje Asiria,
je' wo' taqe i k'amooj reje Egipto
naakichaliik chi loq'oonjiik i QaJaaw Dios
chinaah i yuuq' Sión, re' i wilik ar Jerusaleem.
Currently Selected:
Isa 27: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
