Isa 24
24
Re' ruq'orariik chi naa ruk'ulum i ti' k'axik i tinamit wach ak'al
1Re' i QaJaaw Dios
naa rusacham wach i tinamit wach ak'al.
Eh naa ruyojom wach,
eh naa rutukem kiwach i rutinamiit.
2Eh eliik wach i ti' k'axik naakik'ulum chi kunchelaal. Chi
k'amal b'eeh aj tiij, chi tinamiit,
chi patroon, chi moso,
chi patroon ixoq, chi aj poh,
chi loq'ool, chi aj k'aay,
chi nye'wik i kemeel chi aj kemeel,
chi b'ehoom, chi neb'aa'.
3Eh naa rusachariik kiwach chu'nchel i wilkeeb' wach ak'al,
eh naa rukuxiik relq'jiik chu'nchel i chib'ih keh.
Re' wili re' i QaJaaw Dios xq'orik reh.
4Eh naa ruchiqiik i wach ak'al,
naa rusachariik wach i tinamit,
Re' taqe kow kiib' naa kikahniik chi ma' xta chik kaansil.
5Re' i wach ak'al naa rojiik chi re' chi ma' re',
kuum i naa kikanaam runimjiik
i ruk'uhb'aal i Dios.
Eh ma' naa ta chik ruponiik panaq'kiwach
i ruyejaam cho wach reh chi juneliik.
6Ruum aj re' ruuk' i runimaal ti' k'axik naa rusachariik wach chu'nchel i wach ak'al.
Eh re' taqe i k'achareel wilkeeb'
chuwach naakik'ulum i ti' k'axik,
ruum aj re' naa rusachariik kiwach, eh xama' k'ih ta chik i naa kikahniik.
7Re' i uuva naa rutikariik naa ruchiqiik,
ma' xta chik i riis naa rumolariik.
Eh re' taqe i tinamit xa eliik naq suq kik'ux naa rutib'iik kik'ux.
8Eh ma' naa ta chik rib'irjiik i q'ooj tambor, i rusuqkiil i ruq'or i arpa.
Ma' awach ta chik
naa ruye'wiik rusuqkiil kik'ux ma' naa ta chik rub'aan i ninq'iij.
9Ma' awach ta chik i naa kianam kitz'uuy noq uk'inik riis uuva inki a'n
Re' i ki' laj ha' k'ah chik naakik'raam.
10Re' i tinamit naa rukahniik
chi xama' ruq'or ta chik korik.
Re' taqe i paat naakitz'ahpiik
ma' awach ta chik i naa kokiik ar.
11Eh naakik'erem kichii' pantaq b'eeh,
ruum ma' naa ta chik kireqem i riis uuva.
Eh ma' naa ta chik kireqem rusuqkiil kik'ux chinaah i wach ak'al.
12Re' i tinamit naa rukahniik chi xan tz'irik chik paam.
Eh re' taqe i ru puertahiil i paat naakixereb'iik.
13Eh re' i tinamit wach ak'al
naa rukahniik chi ma' xta chik wilik chupaam.
Naa rukahniik chi je' rukab' noq inkuxik ruq'ehb'iik i wach i olivo,
je' rukab' noq inkuxik rusik'ariik i wach i uuva.
14Eh re' taqe i ma' naa ta kikanteesjiik haa'
naakik'erem kichii' chi tz'uuy
re' wilkeeb' chi chii' i palaw,
noq naakilom i runimaal wach i QaJaaw Dios.
15Eh je' wo' i wilkeeb' chi korkiil ireelb'aalq'iij,
taqe i wilkeeb' reje chi chii' i palaw,
naa wo' kiye'em ruloq'il i QaJaaw i keh, re' i qaDios i hoj, hoj aj Israel.
16Xa aha' naa rib'irjiik chi naa kitz'uyem wach
i QaJaaw Dios chi ye'b'al ruloq'il,
je' wili i naa kiq'orom:
Neeta naq inye'arik i ruloq'il i QaJaaw Dios.
Eh re' hin je' wili i naa nuq'orom:
Ma' k'isiin ta ti'kiil i naakik'ulum i kib'anik reh i yiib' wach na'ojb'al.
17Re' taqe i k'achareel wach ak'al, naa rub'aan keh je' rukab' imb'aan keh
i chikop ajimamaj taqe ruum inpuhb'anik keh, kiooj q'ehb'oq panjul, oon panxirob'.
18Eh naakik'ulum keh je' rukab' inkik'ul i chikop
noq ma' imb'aan ta keh ruum i k'ahchi' rupuhb'aniik keh panjul chik kiooj q'ehb'oq.
Eh re' taqe kielik cho panjul
panxirob' chik kiooj q'ehb'oq,
eh noq naa ruqajiik chee kowlaj jab'
naa ruk'uyu'jiik i ch'iklik wii' aak'al.
19Eh re' aak'al yohb'aal wach
noq naa ruk'uyu'jiik, naa rukahniik
chi xa kok' xeer chik i wach ak'al.
20Re' i wach ak'al naa rub'arb'otiik, chi je' jino'q i xohk'reel.
Eh naa ruk'uyu'jiik je' rukab' i rub'an i paat ruum i kowlaj teew,
naa rusachariik kiwach,
ruum re' mahk imb'aan chuwach, i xti xiik' wo' chik naah.
21Eh chupaam i q'iij re' re',
re' i QaJaaw Dios naa ruye'em taqe panti' k'axik
chu'nchel i wilkeeb' pan taxaaj,
je' wo' chu'nchel i reey wilkeeb' chinaah i wach ak'al.
22Re' reh naa rumolom kiwach, naa taqe rutz'apam pan jinaj ye'aab',
je' rukab' noq kitz'aparik i prexo nimaq wach kimahk.
Re' taqe re' najt naa kiwihiik ar,
korehtaal imponik i q'iij chi naa kiye'ariik chutojariik i kimahk.
23Eh noq re' i QaJaaw Dios
naa rokiik chi reyil chinaah i yuuq Sión ar Jerusaleem,
re' q'iij, re' i poh naa ruq'equumriik kiwach.
Re' taqe i k'amal rub'eeh tinamiit
ar naakilom wach i ruloq'il i Dios.
Currently Selected:
Isa 24: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
