Isa 17
17
Re' i ti' k'axik xchalik chinaah i tinamit Damasco
1Re' Isaías je' wili i xuq'or:
Re' i tinamit Damasco naa rukahniik chi ma' re' ta chik tinamit.
Naa rusachariik wach chu'nchel i wilkeeb' chupaam.
2Eh re' tinamit Aroer naa rukahniik chi ma' xta
chik i wilik chupaam ch'ahn chik i naa rupoq'iik ar,
re' chik taqe tentzun naa kianam kiwa' ar,
ma' xta naa ruyohb'isaniik keh.
3Re' taqe aj Efraín naa rehtesjiik i runimaal kiwach,
je' wo' taqe i aj Damasco.
Eh re' taqe aj Siria i ma' naa ta rusachariik kiwach,
naa kikahniik pank'ixb'ilaal, je' wo' taqe i aj Israel,
inki QaJaaw Dios nim rajaawriik.
Re' ti' k'axik chalik chinaah i tinamit Israel
4Eh chupaam i q'iij re' re', naa rehtesjiik i runimaal kiwach i aj Israel,
re' taqe i riih rumaam i Jacob, naa wo' rusachariik wach i kib'ehomal.
5Re' i tinamit Israel, naa rukahniik chi ma' xta chik i wilik ar
xan tz'irik chik paam, je' rukab' noq injacharik i tik
wach k'ixkaab' Refaím,
noq xa re' chik taqe i rooq kikahnik ar.
6Ach kiib' ixib' i patineel naa kikahniik chupaam,
je' rukab' noq inkahnik kiib' ixib'-oq
wach i olivo noq sik'ooj chik i wach.
Je' rukab' noq xa ju'jun chik i wach i chee' inkahnik ju' taq q'ab',
inki i Dios, qaDios i hoj aj Israel.
7Eh ruum taqe re', naa wo' chik kipahqaam kitoob'jiik reh i QaJaaw Dios i aj Israel.
Re' ixtz'uhkrisanik cho keh, re' wilik ruSantohiil.
8Re' keh ma' naa ta chik kojiik loq'ineel
chuwach i artaal xakiyejaam ruuk' kiq'ab'.
Eh ma' naa ta kojiik loq'ineel
chuwach i tiyoox kiyejaam chi rujalwaach i Asera,
chuwach kiyejaam chi rujalwaach i q'iij.
9Eh chupaam i q'iij re' re', naa rukahniik chi ma' xta chik ko'lb'al kiib' i kitinamiit.
Naa kikahniik je' rukab' noq xkahnik chi ma' xta chik
i wilik chupaam i kitinamiit i aj heveo,
i kitinamiit i aj amorreo, noq xkimol chi elik chikiwach i aj Israel.
10Ruum re' taq i hat xsahchik taq panak'ux i Dios inko'linik taq aweh,
i je' paat ab'aj i ko'lemb'al iib' taq cha weh.
Eh xa tik taq atik q'e' holohaq, xatik taq i uhtz'ub',
ye'b'al kiloq'il i tiyoox.
11Re' taq i hat noq i naa tik taq i re' xa nacha'jeej taq chik,
re' taq inawaaj chi naa rupoq'iik cho chi jumehq'iil.
Xa re' la' re' taq atik re' re', naa rusachariik wach
noq naa ruchaliik i ti' k'axik chinaah,
xama' xta wo' taq i wach naa amolom.
12Eh ma' k'isiin i ti' k'axik naakik'ulum taqe i k'ih seht chi tinamit.
Naakik'erem kichii' kochinajt naa rib'irjiik chaloq.
Xa je' chik rukab' i choqik i rub'an i palaw,
i choqik inki a'n i nim ha'.
13Xa re' la' noq naakiq'ilariik ruum i QaJaaw Dios,
naakimolom chi elik naa kojiik chi najt yuuq',
je' rukab' noq ink'amarik reje
chi najt i rutuus ixiim ruum i kowlaj teew,
eh noq ink'amarik reje i pooq ruum i kaq suut teew.
14Eh noq inokik i q'iij, re' taqe i aj Israel naakiye'ariik panti' k'axik.
Eh noq naa ruchaliik rusaq'iik, naa rusachariik kiwach taqe inixowanik kiwach.
Je' wili i ti' k'axik i naakik'ulum taqe i
ki-ixowanik wach i rutinamiit i QaJaaw Dios.
Currently Selected:
Isa 17: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
