Isa 16
16
1Re' taq i hat aj Moab i akeb'aam taq awiib' panchiq yuuq' Sela,
neerub'an chi nee taq i naataq'aaj
i rak'uun tentzun chi rukooch i reey wilik Sión.
2Re' taqe ixoq aj Moab naakikanab'jiik
chi chii' i nim ha' Arnón.
Eh naa kikahniik chi je' kikab'
i kok' tz'ikin ma' nkireq ta kisuuq'.
3Eh je' wili i neenkiq'or ponoq keh i aj Sión:
Cha a'n taq otob'il qeh,
chakoj taq qana'ojb'al,
qoh ako'leej taq je' rukab' i rub'an i muuj parutz'a'iil i q'iij.
Ruum re' hoj k'ahchi'kooj
kisik'im i aj ixowaal reh i qakanteesjiik.
4Eh nee ta tii nayeew
taq qapatal panatinamiit,
qoh ako'leej i hoj, hoj aj Moab
chikiwach inkaaj qakanteesjiik, inko'q taqe.
Re' taqe aj ixowaal naa wo' kikanteesjiik,
ma' naa ta chik rilariik kiwach chinaah wach ak'al.
5Eh jinaj i re' ruuk' i riih rumaam i reey David naa rokiik chi reyil.
Re' reh naa ruwihiik otob'il ruuk',
eh parukorkiil naa rub'anam i q'ataj q'orik,
eh naa ruye'em reh i ju'jun aha' wilik iraaj.
Eh re' rub'ehel naa rub'anam.
6Re' hoj qeht'al chi re' taqe aj
Moab ma' k'isiin ta inkinimb'isaj kiwach.
Eh xa q'et q'et taqe,
xa re' i yiib' wach na'ojb'al inki a'n ma' xta korik kuuk'.
7Ruum aj re' chu'nchel i aj Moab,
naa koq'iim ruum i ti' naakik'ulum.
Eh ruum chi ma' naa ta chik kinik'eem
wach kikaxlanwi'k inkorjik ruuk' i chiq uuva re' inkorjik cho ar Qir-hareset.
8Naa ruchiqiik i kiye'aab',
naa ruchiqiik wach i ki uuva
chupaam i ye'aab' Hesbón,
je' wo' chupaam i ye'aab' Sibna,
naa ruchiqiik kuum i tokoom tinamit.
Eh noq xub'an chaloq i uuva inkitik imponik ko chupaam i tinamit Jezer,
eh imponik wo' naq ko chupaam i chiq yuuq',
je' wo' chi chii' i palaw.
9Ruum aj re', re' hin xa je' chik kinoq'ik aj Jezer,
ruum naa rusachariik wach i ki uuva.
Eh ti' nuk'ux noq kinoq'ik chikiij i aj Hesbón, i aj Eleale.
Re' taqe re', ma' naa ta koqiim
noq naa rusachariik wach i kitik,
ko ruum chik i q'aq'inik naakik'erem kichii'.
10Eh ma' naa ta chik ruwihiik suq kiil k'uxliis chupaam i kiye'aab'.
Ma' awach ta chik i naa rutz'uyiniik
chupaam i ye'aab' intikarik wii' i uuva,
ma' naa ta chik kiyitz'im i riis.
Ma' awach ta chik naa rusuuqb'iik ruk'ux,
ruum re' hin naa wesam i rusuqkiil kik'ux.
11Re' hin naa rutib'iik nuk'ux ruum
i ti' k'axik naakik'ulum i aj Moab,
i naakik'ulum i aj Qir-hareset.
12Re' taqe i aj Moab naa wo' naq kojiik
chinaah taqe inajt naah yuuq'
chulooq'jiik taqe i tiyoox,
xa re' la' xama' xta wo' chik inaakesam ruuk' i re'.
13Re' i QaJaaw Dios re' taqe i ti' k'axik wili ruq'orom cho najtir chi naakik'ulum taqe i aj Moab. 14Eh yu'naak re' QaJaaw Dios je' wili i xuq'or:
Re' taqe i aj Moab ach ixib' haab' naa kik'achariik, xa nupajam chik i q'iij,
je' rukab' noq impajarik i q'iij reh i kamanoom.
Eh naa rehtesjiik i kajaawriik, atoob' ta kik'ihaal wo' naq,
xama' k'ih chik i naa kikahniik,
eh ma' kow ta chik kiib', inki.
Currently Selected:
Isa 16: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
