Nūmela 13
13
Nā Tino Tautuku Munimuni na Uga ki Kanana
1Na vāgana mai te Aliki kia Mohe, 2“Filifili ni takitaki taki tau toka tahi mai nā puikāiga e hefulu lua o Ihalaelu, ma uga ke tautuku munimuni te fenua ko Kanana, tēia e fōki e au mo nā tino Ihalaelu.” 3Oi na uga ai kilātou e Mohe mai te Toafa ko Palana, ma e tuha ai ma te fakatonuga a te Aliki, ko kilātou uma iēnei ni takitaki o tagata Ihalaelu. 4Ko nā igoa iēnei o kilātou:
mai te puikāiga o Leupena, ko Hamua te ataliki o Hakulu;
5mai te puikāiga o Himeona, ko Hafata te ataliki o Holi;
6mai te puikāiga o Iuta, ko Kalepo te ataliki o Iepune;
7mai te puikāiga o Ihakala, ko Ikala te ataliki o Iohefa;
8mai te puikāiga o Efalaima, ko Hohea#13.8 Kikila ki te fuaikupu 16 te ataliki o Nuno;
9mai te puikāiga o Peniamina, ko Paleti te ataliki o Lafu;
10mai te puikāiga o Hepulona, ko Katieli te ataliki o Hoti;
11mai te puikāiga o Manahe, (he puikāiga o Iohefa), ko Kaiti te ataliki o Huhi;
12mai te puikāiga o Tanu, ko Amielu te ataliki o Kemali;
13mai te puikāiga o Ahela, ko Hetulu te ataliki o Mikaele;
14mai te puikāiga o Nafatali, ko Nahapi te ataliki o Vopihi;
15mai te puikāiga o Kato, ko Keuelu te ataliki o Maki.
16Ko nā igoa iēnei o nā tino nā uga e Mohe, ke tautuku munimuni te fenua ko Kanana. Na hui e ia te igoa o Hohea te ataliki o Nuno, kia Iohua.
17I te uga atuga e Mohe o kilātou ke tautuku munimuni te fenua ko Kanana, na lea vēnei atu ia ki ei, “Kāfai e teka ia te koutou te Toafa i Haute o Kanana, oi fakaauau lava āgai ki mātū ki te fenua maugā. 18Kikila pe ni itūkāiga kelekele vēhea te i kinā, ma pe ni tino mākekeke pe hēai te nonofo ai, ma pe tokalahi foki kilātou pe hēai. 19Kikila ki te kelekele e nonofo ai pe lelei pe kino, ma pe fai ni pāpuipui o nā tamā kakai o kilātou pe hēai, ma pe fai foki ni olo mākekeke. 20Kikila pe lelei te fenua ke totō ai ni fātoaga, ma kikila pe ola ai ni lākau i kinā. Ma ke mautinoa e ōmamai koutou ma kaumai ni fua o nā lākau iēnā.” (Ko nā aho tonu iēnā o te tau e pula ai nā fuāvine muamua o te fuata.)
21Oi na olo ai nā tāulelea e toka hefulu lua iēnei ke tautuku munimuni ia Kanana, mai te Toafa o Hini i te itū ki haute, ke tau lele ki te kakai ko Lehopo e pili ki te Alahopo ko Hamata, i te itū ki mātū. 22I te kui atuga o kilātou i te toafa i haute, na tau atu kilātou ki te kakai ko Hepelona, te mea nae nonofo ai nā kaukāiga o Ahimani, o Hehai, ma o Talamai; na tupuga uma mai kilātou i nā tino Anakima.#13.22 Anakima Ātonu ni tagata tino kekehe ma loloa (kikila ki te Teu 2.10,11,20,21) (Ko te kakai ko Hepelona e fitu ia tauhaga na fakavae ai ka ko hēki iei ai te kakai ko Hoana i Aikupito.) 23Na taunuku atu kilātou ki te Vanu ko Ehekolo, oi na tipi ai e kilātou ki lalo he lālā vine nae iei ai he fuifui fuāvine lahi lele, ma ko tona mamafa lahi na toka lua ai ni tāulelea na tau hikia i he amo. Na kave foki e kilātou ma ni līmoni#13.23 Kikila ki te Ehoto 28.33 ma ni mati. 24Ko te koga tēnā na fakaigoa ko te Vanu o Ehekolo,#13.24 Ehekolo Ko te uiga o te igoa tēnei i te gagana Epelu fuifui vine ona ko te fuifui vine na tipi ki lalo e nā tino Ihalaelu i kinā.
Te Līpoti a nā Tino na Olo oi Tautuku Munimuni
25Kua uma te tautuku munimuni e kilātou o te fenua i ni aho e fa hefulu, oi na toe liliu mai ai kilātou.
26Na toe foki mai kilātou kia Mohe ma Alona, ma te fakapotopotoga uma a Ihalaelu i Kateha, i te Toafa o Palana. Na līpoti e kilātou kia te kilāua ma te fakapotopotoga uma lele nā mea na kilātou kitea, ma fakaali ki ei nā fua o te fenua na ōmamai ma kilātou. 27Na lea vē atu kilātou kia Mohe, “Na olo kimātou ki te fenua na uga e koe kimātou ki ei; ko te fenua e tafe ai te huhu ma te meli! Kikila, iēnei nā fua o te fenua! 28Kae ko nā tino e nonofo ai ni tagata tino mākekeke, ma ko o lātou kakai e lalahi lele ma fai nā pāpuipui. Kae ko te mea na hili ai to mātou popole, ona na kimātou kitea i kinā nā lāpuna o nā tino Anaka. 29E hē gata i tēnā, ko nā tino ha-Amalekā e nonofo i te Toafa i Haute; ko nā tino ha-Hitē, ha-Iepuhī ma ha-Amolī, e nonofo i nā fenua maugā; ka ko nā tino ha-Kananā, e nonofo pili ki te Tai Metitelani, ma ki te Vaitafe ko te Iolitana.”
30Kae na fakatokatoka e Kalepo te fakapotopotoga i mua o Mohe, ma lea vē atu, “Tātou olo loa oi fai te fenua tēnā mo kitātou, auā e mafai lele e kitātou oi puke fakamālohi!”
31Ka kua lea vēnei atu ona hoa na olo kilātou, “E hē mafai e kitātou oi ohofaki nā tino iēnei, auā e hili atu to lātou mālolohi ia te kitātou!” 32Oi na fakahalalau ai e kilātou ni tala ke loto vāivai ai nā tino Ihalaelu e uiga ki te fenua na olo kilātou ki ei, ma na lea vē atu ai kilātou, “Ko nā tino i te fenua na olo kimātou oi tautuku munimuni, e lamatia pea lava o lātou ola i nā taua, ma e aloā foki e tino lalahi! 33#Ken 6.4Na kitea foki e kimātou i kinā nā tino loloa ma tino kekehe, nā lāpuna o nā tino Anakima. Ko kimātou e vē ni hē-hahili#13.33 He iniheti e vē he hikuhikulauniu, e nofo i luga o te mutia kāfai e fakatuhatuha kia te kilātou, ma e vēnā foki te lātou kikila mai kia te kimātou.”
Currently Selected:
Nūmela 13: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
