Nūmela 12
12
Kua Fakatuikehe ia Miliama ma Alona kia Mohe
1Ka koi i Hahelota kilātou, na fāitio ai ia Miliama ma Alona kia Mohe, ona kua nofo ki he fafine ha-Kuhī. 2Na lea vē kilāua, “Ko Mohe oioti nei te na kua kui mai ai he vāgana mai te Aliki? E hēki vāgana mai nei foki te Aliki kui mai ia te kitāua?” Ma na lagona mai e te Aliki kilāua. 3(Ko Mohe he tino loto maulalo, nae hili atu tona loto maulalo i lo ho hētahi tino i te lalolagi.)
4Oi na vāgana mai loa lava te Aliki kia Mohe, ma Alona ma Miliama, kua vē mai, “Koutou toka tolu, ōmamai ki fafo, ki te Falekie o te Aliki.” Ma na olo ai ki ei te toka tolu. 5Oi na afio ifo ai te Aliki i loto o he poutū ao, kua tū i te fāitotoka o te Falekie, ma kalaga vē atu, “Alona! Miliama!” ma na taufai laka mai ai te toka lua ki mua. 6Ma na vāgana vē atu ai te Aliki, “Fakalogo mai ki aku kupu iēnei:
“Kāfai e iei ni pelofeta ia te koutou,
ko au, te Aliki,
e kō fakailoa au kia te kilātou i ni fakaaliga;
e tautala kia te kilātou i ni miti.
7 #
Epe 3.2
Kae e hē vēnā taku kaukauna ko Mohe;
o tagata uma o oku, ko ia ko toku fakamoemoe.
8E tautala hako au ki ona mata ma te manino,
kae hē i he gagana e fai munimuni;
ma e ia kitea te tino mai o te Aliki.
Heā la te hē mātataku ai koulua
oi fāitio ki taku kaukauna ko Mohe?”
9Na kakaha te tōkahā o te Aliki kia Alona ma Miliama, oi na fano kehe ai ma kilāua. 10I te fano kehega o te ao mai luga o te Falekie Tapu, oi na fakafuaheki lele oi tatao te tino o Miliama i he tauale kino o te kili, ma tona kili kua paepae e vē ko te kiona. Na liliu atu ia Alona kia Miliama, ma na ia kitea ai ko tona tuafafine kua maua i he tauale e hē mamā ai i nā tu tau tāpuakiga. 11Oi na lea vē atu ai ia Alona kia Mohe, “Fakamolemole toku matai! Nahe fakahalā kō kimāua ona ko te valea o te mea tēnei kua fai e kimāua. 12Nahe tukua kō ia Miliama ke vē he pepe na fānau hē au, ma tona tino kua kāmata pala i te pakū maiga ki fafo mai te manava o tona mātua.”
13Oi na kalaga ake ai ia Mohe ki te Aliki, kua lea vē atu, “Te Atua e, fakamolemole kō fakamālōlō ia Miliama!”
14 #
Nūm 5.2, 3 Kae kua tali mai te Aliki kia Mohe, “Ānei ake tona tamana na feanu ki ona mata, ka hē taukavea moni nei e ia tona māhiahi mo ni aho e fitu? Ko te mea la ia, kave oi tuku i fafo o te api ke kātoa he vaiaho, oi kua toe kaumai ai ki loto.” 15Oi na tāofi ai ia Miliama i fafo o te api a Ihalaelu mo ni aho e fitu; ma na tāofi ai foki ma te malaga a tagata Ihalaelu ke pa ki te aho na toe hau ai ia Miliama ki loto o te api, oi fātoā toe kāmata ai te lātou malaga. 16Oi na olokehe ai kilātou mai Hahelota ma fakatū te lātou api i te toafa o Palana.
Currently Selected:
Nūmela 12: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
