1 Ohinọyị 18

Erija ọnịrị ọnịsẹ Ịbaarị nịnị

1Ộ dà kù eni Erija maanị hụrẹ yà ịda ọnẹẹ ọnọọ, ẹkụhị ọnya dị Ẹnẹyịmavara va kà ịrẹyị yị Erija nị. Ịnị ụmẹ ọnọọ ọ sị mẹ ịrayị ẹẹta ọnị ọyị hụrẹ jị. Dị Ẹnẹyịmavara kà a yi Erija dị ọ ka, “Na, dị wa sị ẹngụ awụ na zụ̀ Ahabị, ka mị vaa zụ̀ orihi hi ẹtẹ.”

2Ịzẹyịza di Erija si hu aa sị ẹngụ anị naa zụ̀ Ahabị nị. Ịnị ụmẹ ọnọọ ụngwẹ aa kụ̀ ẹtẹẹtẹrẹ Ísamariya. 3Di Ahabị va tụ́ na hị́ Ọbadaya ana sị eyi pè irehi ohinọyị nị. Ọbadaya ọnọọ ọnị ộ nyị angwahi Ẹnẹyịmavara ẹtẹẹtẹrẹ. 4Ịnị ụmẹ oni Ijezebẹrị hyakụ aa sị wụ ọnịsẹ Ẹnẹyịmavara, Ọbadaya ộ kụ́ ọnịsẹ ẹchẹhị, dị ọ gà wa ẹvarẹwụ-ẹvarẹwụ dị ọ vavọọ kụ́ wa hi ịzọọ, dị aa sị ịsọyịrị naa yị wa nị. 5Dị Ahabị kà a yị Ọbadaya dị ọ ka, “Nọ ịnị avaba ẹtẹ ọnọnị, avaba ịzị enyi ẹtẹ hị́ ọnịrị ịnị avaba orosi, ịsavọọ ye re avị dị asị umaata ọnịrị ịkẹrịkẹtẹ ẹnẹnị sú, dị asị ịsụpa ana vọ ẹnị re sú.” 6Ịzẹyịza dị ẹ gà ẹtẹ ọnọọ hi ẹngụ ụvọ ka eni che e na para hu nị. Ahabị ọnị ịnya ọnị ộ zi oze anị, di Ọbadaya ọnị ịnya ọnị rẹ zi oze anị nị.

7Ọbadaya ọnị mẹ̀ zi oze anị aa na, di ọnịrị Erija vana na pasụ nị. Di Ọbadaya kú ẹtẹ, dị ọ tana tụra ẹtẹ ọvịdị Erija dị ọ kà, “Nda, ẹwụ wáá yị?” 8Di Erija tụ́ ohi dị ọ ka, “Ẹmị yọ! Na kà a yị ọga awụ ka emi Erija yà ịzẹnị.” 9Di Ọbadaya ka, “Ada ayị, sị ẹ vị ịsa odivi ọnị mị na mẹ, dị waa sị mị naa yị Ahabị ka ọ̀ wụ̀ mị? 10Mâ sị Ẹnẹyịmavara Ohomorihi awụ hị́ eku ịnị ịrẹyị ọnị maa vaa kà aanị. Ẹ yị nyị ẹkụra ọnịrị ịnị ẹtẹ ohinọyị ọnị ọga amị, ọ̀ yị tụ́ ka è ne sì wụ. Ẹ̀ẹ ka ẹnị e yi re wụ, dị ọ ka ẹ̀ hị́ eku ka ịzẹyịza ẹnị ẹ yi re wụ. 11Ụ wáá ka dị ụ va ka ma na kà a yọ ka mê re Erija nị? 12Màa sị huu ịda awụ kẹnẹ, dị ụhwẹ Ẹnẹyịmavara va raà sị wụ nọ ịzị mẹ̀ yị yẹ. Màa na sị ọ kà yị Ahabị, di ò yi rè vee re wu nị, dị ọ za mị dị ọ wụ̀ mị. Wâ yẹ ka hụụnị ozweyi amị mị hụrẹẹ̄ hí angwa Ẹnẹyịmavara nị. 13Aanị ka ọza ọ yị kà a wụ ịsị mị mẹ ịnị ụmẹ oni Ijezebẹrị aa sị wụ ọnịsẹ Ẹnẹyịmavara. Mâ kụ́ ọnịsẹ Ẹnẹyịmavara ẹnị ẹchẹhị, dị mị gà hi oze ẹvarẹwụ-ẹvarẹwụ, dị mị kụ́ wa na tẹ̀ ịnị ụtẹha anị. Dị ma sị ịsa naa yị wa ịzọọ nị. 14Ụ mẹ̀ va ka ma na kà a yị ọga amị ka mê re ẹwụ Erija aanị, vị ọ vaa wụ̀ mị nọ!”

15Di Erija kà, “Ma sị Ẹnẹyịmavara Ochẹtẹẹngụ ọnị mị jẹẹ ọvịdị hị́ eku ka ajịnị ọnọnị m maa sị ẹngụ amị naa zụ̀ Ahabị nị.”

Erija ịrẹsụ ataba Ịkamẹrị

16Ịzẹyịza dị Ọbadaya si hu ee nee tù Ahabị nị. O mè ne si tù ọ, dị ọ kà a yọ nị. Di Ahabị si hu ee nee tù Erija nị. 17Ahabị mè re Erija, dị ọ ka, “Te! Erija, ẹwụ ana maanị aa kụ́ ẹngụkata tù Anisirẹrị wáá yị?”

18Di Erija ka, “Eyiye de, mẹ yị kụ́ ẹngụkata tù Anisirẹrị, ẹwụrị aneehi ada awụ ẹ vị ana aa kụ́ ẹngụkata tù Anisirẹrị nị. Ẹwụ nịnị o yi ọda Ẹnẹyịmavara tịtẹ, dị ụ kụkụ aa hẹkẹ Ịbaarị nịnị nị. 19Booro aanị, tụ́ na hị́ avaba Anisirẹrị, dị ẹ̀ wara ve tù mị ịrẹsụ ataba Ịkamẹrị. Rẹ hị́ ọnịsẹ Ịbaarị ana vị ẹnị akava tụra ẹvarẹwụ ne beri ọnịsẹ Asẹra ẹnị vi akava. Avaba ẹnịnị ẹnẹẹ anaā rị ịsa ịda Ijezebẹrị.” 20Ịzẹyịza dị Ahabị tụ́ na hị́ avaba Anisirẹrị dị ẹnịnị kụ́ ọnịsẹ ẹnẹẹ gụ tụ́ ịrẹsụ ataba Ịkamẹrị nị. 21Di Erija tere pè avaba aza ẹnẹẹ dị ọ ka Ị́zị ụ maanị vaa mẹ ayị ẹẹva nee tù nịnị? Àa vị Ẹnẹyịmavara ọ vị Ohomorihi nị, waā saasa a nịnị! Àa rẹ va vị Ịbaarị yọ nị, waā saasa a nịnị! Aza ẹnẹẹ e yi tụ́ Erija ohi vụrụ-vụrụ. 22Di Erija rẹ kà, “Ẹmị ịnyara kẹnẹ ọ vị ọnịsẹ Ẹnẹyịmavara ana vọ nị. Ama ọnịsẹ Ịbaarị ẹnị vị ẹnị akava tụra ẹvarẹwụ. 23Jẹẹ dị à sị imaaru ẹẹva yị. À sị imaaru ọnya yị wa, dị ẹ̀ vọ ọ, dị ẹ̀ kụ́ ọ hi ịrẹsụ ọkụ. Ama asị ẹ sị ịra tụ́ ọ. Ẹmị rẹ vaa sị imaaru ọsa dị ẹmị rẹ vọ ọ, dị ẹmị rẹ kụ́ ọ hi ịrẹsụ ọkụ. Ẹmị ẹ̀ yị rẹ vaa sị ịra tụ́ ọ. 24Di u nowu hí ori awụ nịnị, dị ẹmị rẹ hị́ Ẹnẹyịmavara. Eni èe ne tụ́ ohi dị ọ sị ịra vẹ nị, dị a yẹ ka ọnọọ ọ vị Ohomorihi obooro nị.” Dị avaba aza ẹnẹẹ tụ́ ohi dị ẹ ka ịrẹyị eni Erija kà ô zoza nị.

25Di Erija hị́ ọnịsẹ Ịbaarị ẹnẹẹ dị ọ ka, “Sị ọnya ini imaaru ẹnẹẹ dị wa vịdị mẹ̀ ẹ nịnị, agụvị ka ẹwụ nịnị ọ rụrụ hu nị. Wàa sị ọ mẹ di wa hị́ ori awụ nịnị ama asị ụ sị ịra tụ́ ọ nịnị.”

26Ịzẹyịza dị ẹ sị imaaru ana a sị yị wa, dị ẹ mẹ̀ ẹ nị. Dị ẹnịnị hí Ịbaarị pooro hụrẹ ẹnẹnẹ ne tù oruva nị, ẹ yaa hí Ịbaarị, tụ́ ohi dê, ama Ịbaarị o yi zụ tụ́ ohi ọnyọọnyị. Dị ẹnịnị ee jii jịnẹ ụta ịsọvọ ẹnị ẹ mẹ nị. 27Ịjị ọọdụ si tù, di Erija aa sị waa mẹ enyinyi nị, dị ọ kà, “We rè nowu hị́ ọ nịnị! Áa vị ụ ka Ohomorihi ọ vị nị. Ọ nyẹngụ aa sụ ara, à yị vị avọọ ahịka vị a nyị ịsị aa mẹ ịnị ụvọ nị. Ộ hyakụ nyẹngụ sị jịnẹ, à vị ka aa sụ ara. Hị́ ọ ka ọ vaa kwẹẹtẹ.” 28Ẹnịnị ê nowu hị́ Ịbaarị, di ẹ yaa sị ọha ọnịrị ụhwọ na ẹngụ ẹnịnị anka ẹ mẹ̀ yịị mẹ nị. Ệ na ẹngụ ẹnịnị ne tù ka aa vàa kú wa ẹngụ. 29Ịjị ọọdụ aa parahu, di e nyima dị ẹ yaa kà ịsẹ nị. Ệ kà ịsẹ ọnọọ pooro ne tù ụmẹ ana a sịị̄ mẹ̀ ịsọvọ ụmẹ ọọdụ, ama Ịbaarị o yi tụ́ ohi vụrụ-vụrụ.

30Di Erija va hị́ avaba aza ẹnẹẹ dị ọ ka ẹ̀ kà pè ọnị nị. Ịzẹyịza di avaba aza ẹnẹẹ kà pè e nị. Di Erija tenyi atakuji ịzị a yàā mẹ̀ ịsọvọ yị Ẹnẹyịmavara ene vịdị wu hi ẹtẹ nị. 31#Oyn 32.28; 35.10Dị ọ kụ́ ịrẹta ẹwụrẹva anka ịrịka ịrẹsụ ezi Ijekọvụ nị. Ijekọvụ ọnọọ Ẹnẹyịmavara vịdị kà a yị ka Isirẹrị ịrẹha anị vaa rị nị. 32Di Erija kụ́ ịrẹta ọnọọ dị ọ sị hi ụta ịsọvọ ịzị a yàā mẹ̀ ịsọvọ ịzị a zụ yà aa hẹkẹ Ẹnẹyịmavara nị. Dị ọ chị ahata kara atakuji ọnọọ nị. Ahata ọnọọ ộ nyịnẹ, ọ zụ dọ ayị ẹnya ẹẹva. 33Di o tenyi ọkụ hi ịrẹsụ atakuji ọnọọ, dị ọ vọ imaaru ọnọọ, dị ọ kụ́ ọ hi ịrẹsụ ọkụ ọnọọ nị. 34Di Erija ka ẹ̀ dà enyi ụnọkọ ẹbẹẹva dị ẹ̀ vaa a kú ịsa ịsọvọ ọnọọ ọnịrị ọkụ ana a kụ́ ọ tụra. Ịjị ẹ vavọọ sị ọ mẹ, dị Erija ka ọ̀ rẹ mẹ̀ ẹ ụpẹ ọhụva, dị ẹ mẹ̀ ẹ ụpẹ ọhụva nị. Ọ kà ẹ̀ rẹ mẹ ụpẹ ọhụta, dị ẹ mẹ̀ ẹ ụpẹ ọhụta nị. 35Enyi ọnọọ vị ene hi ahata dị ọ vavọọ kara ụta ịsọvọ ọnọọ nị.

36Ịjị o si tù ụmẹ ana a sịị̄ mẹ̀ ịsọvọ ụmẹ ọọdụ, di Erija ana vị ọnịsẹ kà tụ́ ọvịdị dị ọ ka, “Ẹnẹyịmavara ana vị Ohomorihi ana Abụrahamị ọnịrị Ayiziiki ne beri Isirẹrị hẹkẹ navọ aza ẹ̀ yẹ ajịnị ka ẹwụ Ẹnẹyịmavara, ẹwa vị Ohomorihi tụ́ ịnị ẹtẹ Anisirẹrị nị. Navọ à rẹ yẹ ka ẹma vị ozi ahụ awụ nị, ka ẹwa kà a ka ma mẹ avaba ịsị maa mẹ̀ aanị nị. 37Ẹnẹyịmavara, navọ we tụ́ mi ohi, navọ we tụ́ mi ohi dị aza ẹnẹnị ẹ̀ yẹ ka ẹwụ Ẹnẹyịmavara ẹwa vị Ohomorihi nị. Dị ẹ̀ rẹ yẹ ka waa vara wa ayị vàa ká ẹngụ awụ vẹ.” 38Dị ịra vana hụrẹ ịda Ẹnẹyịmavara vẹ, dị ọ rị ịsa ịsọvọ ọnọọ ọnịrị ọkụ anị ịra nị. Ịrẹta ọnịrị ezi ne beri enyi ene hi ini ahata vị ọnị ịra ọnọọ rị saka-saka. 39Ịjị avaba aza ẹnẹẹ vavọọ re e, dị ẹ tana tụra ẹtẹ dị ẹ kà, “Ẹnẹyịmavara ọnị ọ vị Ohomorihi nị, Ẹnẹyịmavara ọnị ọ vị Ohomorihi nị.” 40Di Erija ka ẹ̀ za ọnịsẹ Ịbaarị ẹnẹẹ, asị a nyị ana zẹẹ ka ò zwe. Ịzẹyịza dị a za wa di Erija kụ́ wa chi nọ ini orosi Ikisoni dị ọ na wụ̀ wa ịzọọ nị.

Ọyọjị ộ ta

41Ịjị Erija vavọọ sị wa wụ, dị ọ va kà a yi Ahabị dị ọ kà, “Kwẹẹtẹ wa rị ịsa, di we sì ịsa hú, ka maa wụ́ ka orihi ọbanyị aa karutu.” 42#Ije 5.18Ịzẹyịza di Ahabị kwẹẹtẹ, dị ọ rị ịsa, di o sì ịsa hú nị. Ahabị màa rị ịsa, di Erija si hu aa hịrẹ nọ ịrẹsụ ataba Ịkamẹrị nị. O mè tù ịzọọ, di o kú ẹtẹ ini idinku anị, dị ọ và eyi chi nị. 43Dị ọ kà a yi ozi ọnọrụ ana yà pè e, dị ọ ka ọ̀ hịrẹ na, dị ọ̀ na kana eyi ózee eyi oku nị. Ịzẹyịza di ozi ọnọrụ ọnọọ na kana eyi, dị ọ ka ẹ yị nyị ịsọnyị-ịsọnyị nị. Erija ộ tụ́ ọ varẹma ka ọ̀ vavọọ na kana eyi tù ụpẹ ịhịmba.

44Ozi ọnọrụ ọnọọ mẹ̀ na ịnị ana tụ́ ọ ụpẹ ịhịmba, dị ọ ka, “Â nyị eguhi chee aanị, ọ sị sị yà anka ụvọ ọza avọọ, ộ maanị dà tụ́ oze oku.” Di Erija kà a yị ozi ọnọrụ ọnọọ ka ọ̀ na, dị ọ̀ na ka ẹ yị Ahabị ka ò tenyi umaata anị, di òo chi nọ ini eehi, ka orihi va za a jẹẹ. 45Chee aanị kẹnẹ, eguhi ee mine jịjịjị, ahịị aa tụ́, di orihi ọrata aa zụ̀ nị. Di Ahabị tụra umaata anị di o si hu aa nọ Ijezirẹẹrị nị. 46Ẹnẹyịmavara ộ sị ụkata yi Erija, di o tenyi awuru anị di o zwe dọ ọvịdị Ahabị na ngụ Ijezirẹẹrị nị.

Currently Selected:

1 Ohinọyị 18: EBTP

Highlight

Copy

Compare