1 Ohinọyị 17

Erija ộ za orihi jẹẹ

1 # Ije 5.17 Ịnị ụmẹ ọnya, â nyị ọnọrụ ọnya aanị ana aā hị́ Erija. Erija ọnọọ vị Anitisibi ana ra ịnị ẹtẹ Anigiriyadi. Ẹkụhị ọnya dị ọ na kà a yị Ahabị dị ọ ka, “mâ sị Ẹnẹyịmavara ana vị Ohomorihi Anisirẹrị ọnị maa hẹkẹ hị́ eku ka eguhi ọ yị hyakụ vee chire di o ve si tù ka orihi ọ̀ zụ̀ pooro dị ọ̀ mẹ ịrayị chee aanị. Ẹ yị yaa nyị orihi à yị vị mị kà a ka orihi ọ̀ zụ̀.”

2Erija mẹ̀ vavọọ sị kà kẹnẹ, dị Ẹnẹyịmavara va kà a yọ dị ọ ka 3“Hụụ ịzẹnị wa na, dị wa yá ịzị oze ọnị ọyịị̄ zịị̄ hụrẹ dị wa na tẹ̀ ini orosi ana aā hị́ Ikiriti. Orosi ọnọọ yà akẹnẹ Okuha Ịjọdanị. 4Wèe tù ịzọọ di weē hú enyi ini orosi ọnọọ. Mị vaa mẹ ọda yị ọrụ nịnị, dị ẹ̀ẹ sị ịsọyịrị vaa yị wụ ịzọọ”. 5Ịzẹyịza di Erija si hu aa na, dị ọ na mẹ̀ ịsa ẹnị Ẹnẹyịmavara kà nị. Ọ mẹ̀ na, dị ọ na yà ini orosi ana aā hị́ Ikeriti ana yà akẹnẹ Okuha Ịjọdanị nị. 6Dị ọrụ nịnị aa sị ịsọyịrị ọnịrị uye vaa yọ ẹnẹnẹ ọnịrị oruva nị. Dị ahịka enyi ini orosi ọnọọ ee hú nị.

7Ẹkụhị ọnya orosi eni Erija yàā hú enyi aanị, ọ sị wụ agụvị ka orihi ọ yị zụ̀ ịnị ẹtẹ ọnọọ.

Erija ộ mẹ̀ ọgụvọ osoku Ịzarẹhwatị

8Dị Ẹnẹyịmavara rẹ na kà a yi Erija dị ọ ka 9#Irk 4.25,26“kwẹẹtẹ dị waa nọ Ịzarẹhwatị ịnị ẹtẹ Ịsịdọnị, dị wa na yà ịzọọ. Ma raà mẹ ọda yị ọnẹẹ ọnya aanị ana vị osoku ana yà ịzọọ ka ọ̀ọ sị ịsọyịrị va yị wụ.”

10Ịzẹyịza di Erija kwẹẹtẹ di o si hu aa nọ Ịzarẹhwatị nị. Erija mẹ̀ na ngụ enoze ẹkụra ọnọọ kẹnẹ, ọnị yị osoku ọnọọ yị. Osoku ọnọọ vị ana aa tọ̀ọ́ ọkụ. Di Erija hị́ ọ nị dị ọ kà, “Aarịhịnị sị ẹnya awụ ọnọọ ká enyi chee va mị me hú dê!” 11Dị ọnẹẹ ọnọọ si hu ka ọnị ọ̀ na kà enyi ọnọọ vẹ nị. Di Erija rẹ hị́ ọ nị dị ọ ka, “Aarịhịnị sị ịsọyịrị chee rị ụvọ va mi dê!”

12Dị ọnẹẹ ọnọọ ka, “Mâ sị Ẹnẹyịmavara Ohomorihi awụ hị́ eku, mẹ yị hyakụ nyị akara. Ịsị mị nyị o yi huna ayị ohihi ụvọ ọnya kẹnẹ beri angwẹ chee aanị ana yà ini apoti. Vị ẹmị ka ma tọ̀ọ́ ọkụ chee dị ma va mẹ̀ ẹ, yị ẹmịrị ozi emi, dị ya rị ọ di ye ve sú nị.”

13Di Erija rẹ kà a yọ dị ọ ka, “Asị u hí angwa, vẹ, dị wa na mẹ ịsị mị kà. Na sị ịnị anị dị wa sị mẹ Ịbụrẹẹdị chee, dị wa sị ọ va mị da, dị wa va na mẹ̀ ẹ ẹwụrị ozi ewu. 14Ẹnẹyịmavara Ohomorihi Anisirẹrị ka ọnị ka ụnọkọ ayị ọnọọ ọ mā vana tụ́ osusu, apoti angwẹ ọnọọ ọnị ọ mā rẹ vana tụ́ osusu pooro dị ọnị ọ̀ zụ̀ orihi hi ẹtẹ.”

15Ịzẹyịza dị ọnẹẹ ọnọọ na, dị ọ na mẹ̀ ịsa eni Erija kà nị. Ọnịrị ozi anị na vaka aneehi anị ê re ịsa rị gọdọ pooro. 16Ayị ọ yị ta hụụnị ụnọkọ ayị ọnọọ, angwẹ ọ yị rẹ ta hụụnị apoti angwẹ ọnọọ. Avọọ Ẹnẹyịmavara mẹ̀ tụ́ Erija ka ọ̀ kà a nị.

Erija ộ ha ozi osoku ene su kwẹẹtẹ

17Ịrẹma ịrẹyị ẹnẹnị, ẹkụhị ọnya kẹnẹ dị ẹngụ aa zị ozi ọnẹẹ ọnọọ ana vị onyirehi ịzị Erija chi nị. Ẹngụ ọnọọ ộ zị ọ ẹtẹẹtẹrẹ ne tù ka ô wusu. 18Dị ọnẹẹ ọnọọ va hị́ Erija dị ọ ka, “Sị ẹ na jị gẹ ẹmịrị ẹwụ kẹ, ẹwụ ọza Ohomorihi? Vị ụ vẹ ịda amị ka wa va mẹ ka à tamayị ebira odivi ọnị mị vịdị mẹ, dị à wụ ozi emi nii?”

19Di Erija ka, “Si ozi ewu ọnọọ mị.” Di Erija dọ ọ hụụnị ahụ anị dị ọ sị ọ hịrẹ nọ ini eehi ẹbẹẹba ịzị ọọ̄ yà, dị ọ sị ọ hụtụ ịnị ịbẹẹdị anị nị. 20Di Erija nowu hị́ Ẹnẹyịmavara dị ọ ka, “Ẹnẹyịmavara Ohomorihi amị Osoku oni mi chi ịda anị bẹẹ, wa raà kụ́ ịrẹyị odivi ve tù o, wa sị ozi anị wụ̀ụ?” 21#2 Ohi 4.34,35Di Erija hụtụ va kú ozi ọnọọ ụpẹ ẹẹta, di o nowu hị́ Ẹnẹyịmavara, dị ọ ka, “Ẹnẹyịmavara Ohomorihi amị, navọ wa và ụhwẹ ozi ọnọnị vavẹ ịnị ẹngụ anị.” 22Ẹnẹyịmavara ộ wụ́ ịrẹyị Erija, dị ọ sị ụhwẹ ozi ọnọọ vavẹ va tụ́ ọ ẹngụ, di ozi ọnọọ varẹma yàra nị. 23Di Erija si ozi ọnọọ chi hụụnị eehi ẹbẹẹba chi vẹ, dị ọ sị ọ yị ọnyị anị nị. Di Erija ka, “Re ozi ewu o, ka ọ sị ha vavẹ.” 24Dị ọnẹẹ ọnọọ kà a yi Erija dị ọ ka, “Booro aanị ẹmị va yẹ ka ọza Ohomorihi ụ vị nị. Ma rẹ sị yẹ ka ịrẹyị Ẹnẹyịmavara ụ waa kà ịzẹyịza nị.”

Currently Selected:

1 Ohinọyị 17: EBTP

Highlight

Copy

Compare