1 Ohinọyị 19

Erija ô zwe yị Ahabị ọnịrị Ijezebẹrị

1Ahabị mè tù ini eehi, dị ọ kà a yị Ijezebẹrị avaba ịsị Erija mẹ nị. Dị ọ kà a yọ ka Erija ọ raà sị ụ̀hwọ̀ wụ̀ avaba ọnịsẹ Ịbaarị nị. 2Di Ijezebẹrị va tù ozi ịda anị ka ọ̀ na kà a yi Erija kà, “Ụmẹ aanị ụhwọọ, àa vị ka mẹ yị sị wụ̀ wụ anka ẹwụ mẹ̀ rẹ wụ ọnịsẹ Ịbaarị ẹnẹẹ, mẹ̀ yị vavọọ wụ, asị ori nịnị zẹẹ ka ò zoza mị.” 3Erija mẹ̀ vavọọ wụ́, di ee hí angwa dị ọ sị kwẹẹtẹ di o si zwe ka asị a wụ̀ ọnị nị. Ọ mẹ̀ na sị ngụ Ịbẹẹsẹba ana yà ịnị ẹtẹ Ijuda, dị ọ navọ ozi ịda anị tụ́ ịzọọ, 4#Ijon 4.3di Erija ọnị si hu aa nọ ịnị ọpaapara nị. Ộ zị gọdọ ịnị ọpaapara ọnọọ tù ẹhụ ụsẹ ẹkụhị ọnya avọọ. O mè ne si tù iruvo ọchị ọnya aanị ana aā hi irotemi, dị ọ yaayịtẹ iruvo ọchị ọnọọ, dị ọ ka à kà ka oni ò sú nị. Dị ọ kà, “Ẹnẹyịmavara, ọsọnị ọ sị vị ẹnẹmẹhị, navọ wa sị ụhwẹ amị. Vị ẹmị wéé vene zoza huna ohiku amị nịnị nị?” 5Ịjị ọ vavọọ sị kà, dị ọ hụtụ iruvo ọchị irotemi ọnọọ, dị aa sụ́ ara nị. Dị anggẹẹrị ọnya vana vẹ, dị ọ sị ụvọ kanyị ọ dị ọ ka ọ̀ kwẹẹtẹ dị ọ̀ rị ịsa nị. 6Di Erija kana eyi, di o re ka Ịbụrẹẹdị yà ịrẹsụ akịna, di enyi rẹ yà ịnị agoro tụ́ ịzọọ nị. Di Erija kwẹẹtẹ dị ọ rị ịsa, di o hú enyi, dị ọ rẹ varẹma hụtụ nị. 7Dị anggẹẹrị Ẹnẹyịmavara ọnọọ rẹ vẹ ụpẹ ọhụva, dị ọ rẹ sị ụvọ kanyị Erija nị. Dị ọ rẹ ka, “Kwẹẹtẹ dị wa rị ịsa ka ụsẹ ọnọnị va sị gọdọ wụ baaba.” 8Ịzẹyịza di Erija kwẹẹtẹ dị ọ rẹ rị ịsa, di o re hú enyi nị. Ịsa ọnị ọ vavọọ rị avọọ ộ sị ụkata yọ ka ọ̀ zụ zị ụsẹ mẹ ẹkụhị ẹbẹẹva ọọdụ ọnịrị ịrahụ, pooro dọ ọ va na ngụ ịnị ataba Ohomorihi ana aā hị́ Ịhọrẹbị. 9O mè tù ịzọọ, dị ọ nọ ịnị ụtẹha ọnya aanị, dị ọ na sụ ịzọọ nị.

Ọ mẹ̀ vavọọ yà ịzọọ, dị Ẹnẹyịmavara vana kà ịrẹyị yọ, dị ọ kà, “Sị waa mẹ ịzẹnị, Erija?” 10#Iro 11.3Di Erija ka, “ụhị vị ọnị mị nyayịnẹ aa kụ̀ agụvị Ẹnẹyịmavara ana vị Ohomorihi anaā kụ̀ ịrẹkụ. Ịrẹyị ẹnị ẹmịrị Anisirẹrị kà tịtẹ, ẹ sị và hụụnị anị, atakuji ịzị a yàa mẹ̀ ịsọvọ wụ, e si o wú và ha, dị ẹ rẹ za ọnịsẹ awụ dị ẹ sị ụ̀hwọ̀ wụ̀ wa va ha nị. Ẹmị ịnyara kẹnẹ ọ kụkụ vọ nị, di e re yèe si ka ẹnị ẹ̀ hyakụ dọ mị ụhwẹ bẹẹ nị.”

Erija ọnịrị Ohomorihi ọ gẹ ataba Ịhọrẹbị

11Dị Ẹnẹyịmavara kà “Jịnẹ tụ́ ẹhẹ, dị wa na jẹẹ ịrẹsụ ataba zi Ẹnẹyịmavara. Ẹnẹyịmavara vaa para a hu. Opomi vaa tụ́ kukuku, dị aa chaka ataba ọnịrị ịrẹta ha dị Ẹnẹyịmavara ọ yà ịnị opomi ọnọọ. Opomi ọnọọ ọ̀ sị tụ́ kwooze, ẹtẹ rẹ vaa sụ́ ịrẹyị kukuku, ama Ẹnẹyịmavara ọ yà ịnị ẹtẹ ana vavọọ sụ́ avọọ. 12Ẹtẹ ọ̀ọ vavọọ raà sú kukuku, a vaa nyị ịra, ama Ẹnẹyịmavara ọ yị yà ịnị ịra ọnọọ. Ịjị ịra ọ̀ọ sị para hu, ụ vaa wụ́ ọngwẹ oweyi kiiki aanị.”

13Ịjị Ẹnẹyịmavara vavọọ sị kà yị Erija, dị ọ dà awuru anị kú eyi nị, dị ọ jịnẹ, dị ọ na jẹẹ ini irenu ụtẹha ọnọọ nị. Dị ọ vana wụ́ ka a kà a ka, “Sị waa mẹ ịzẹnị, Erija?” 14Di Erija ka, “Ụhị vị ọnị mị nyayịnẹ aa kụ̀ agụvị Ẹnẹyịmavara ana vi Ohomorihi anaā kụ̀ ịrẹkụ. Ịrẹyị ẹnị ẹwụrị Anisirẹrị kà tịtẹ, ẹ sị và hụụnị anị, atakuji ịzị a yàā mẹ̀ ịsọvọ wụ, e si o wú va ha, dị ẹ rẹ za ọnịsẹ awụ, dị ẹ sị ụ̀hwọ̀ wụ̀ wa va ha nị. Ẹmị ịnyara kẹnẹ ọ kụkụ vọ nị, di e re yee sì ka ẹnị ẹ̀ hyakụ dọ mị ụhwẹ bẹẹ nị.”

15 # 2 Ohi 8.7-13 Dị Ẹnẹyịmavara va kà a yọ dị ọ ka, “Rẹ varẹma waa nọ ịnị ọpaapara Ịdamasịkọsị ịzị ụ hụrẹ vẹ, Wèe tù ịzọọ dị ụ sị angwẹ nyị Ihazayẹrị, dị ọ̀ vị ohinọyị Aramị. 16#2 Ohi 9.1-6Dị ụ rẹ sị angwẹ nyị Ijeehu ozi Inimisi dị ọnị ọ̀ vi ohinọyị Anisirẹrị. Dị ụ rẹ sị angwẹ nyị Erisa ozi Isahwati ana vi Anebẹrị Imehora dị ọ̀ vị ọnịsẹ dọ wụ ịrẹsụ. 17Aza ene èe zwe, di Ihazayẹrị ẹ̀ rẹ vaa zụụ wụ̀ wa nị, di Ijeehu ọnị wụ̀ wa. Aza ene èe re zwe oni Ijeehu ọ̀ yị zụ wụ, dị ahịka Erisa ọ wụ ẹnẹẹ nị. 18#Iro 11.4A nyị nyị ọnịsẹ ẹnị akawụ-akawụ oze ẹẹta tụra akahị ọnị mị vọ tịtẹ ịnị ẹtẹ Isirẹrị. Ịnị avaba ẹnịnị â yị nyị ene kú ẹtẹ kụ́ Ịbaarị. Ẹnịnị e yi re kú Ịbaarị irenu.”

Â hị́ Erisa ka ọ vị ọnọgụvọ Erija

19Ịzẹyịza di Erija hụụ ịzọọ aa na, di o re Erisa ozi Isahwati ka ọ kụ ọkẹẹkẹrẹ tụ́ imaaru ẹwụrẹva hi ọvịdị ee sii hura ẹtẹ nị. Erisa vị ana jẹẹ pè imaaru ana tụ́ ọ ẹwụrẹva. Di Erija para hu ne tù ọ, di o ne awuru anị ne kú ọ nị. 20Di Erisa navọ ịsụpa ẹnẹẹ hi ẹtẹ, di ee zwee dụ Erijaa na nị dị ọ ka, “Aarịhịnị jẹẹ ma na kụ́ ada amị ọnịrị ọnyị amị adihyọsa dê, di ma vaa dụ wụụ vẹ!” Di Erija tụ́ ohi dị ọ kà, “Varẹma wa na, áá nyị ịsị mị sị mẹ wụ?” 21Ịzẹyịza di Erisa varẹma, dị ọ na kụ́ imaaru ọnị ọ kụ́ ọkẹẹkẹrẹ tụ́ dị ọ wụ̀ wa, dị ọ sị mẹ̀ ịsọvọ nị. Dị ọ sị ọkẹẹkẹrẹ ẹnẹẹ dị ọ sị chịnẹ uye ẹnẹẹ, dị ọ kụ́ wa yị aza dị ẹ rị ọ nị. Di Erisa kwẹẹtẹ, dị aa dụ Erijaa ịrẹma, dị aa zị ọ ụtụ nị.

Currently Selected:

1 Ohinọyị 19: EBTP

Highlight

Copy

Compare