Jabura 31
31
Yige sa koe Ala ma
1Dauda la beete do le ka, min be donden beeti bɔɔlanu la kuntige bolo.
2Ee Alatala, n be tangare ɲinila ile le la,
i kana a ma n ni to maluya tɔ kudai.
I ni n nakisi i la teleŋɛ sabu la.
3I ni i tolomasɔ n na; ee n nakisi teriya la!
I ni ma n ɲɛ fata sɛnbɛma la, anun tatta la, min si n nakisi.
4Bayi ile le mu n na tuga nun n dogon dula la.
I ni n kun sɔ dula ɲinma la, i ni n doni ɲɔ, i tɔgɛ la ko la.
5Anu be jule min yɛlɛren n ɲatɔ, i ni n bɔɔ wo tɔ,
bayi i mu n nakisilá le la.
6N be n nɛ taakula i la.
Ee Alatala, tɔɲa tige, i bata n kunka.
7Minnu be anu tɛ kitiren kuye fufafuenu batu koe la, n bata wonu kɔn.
Kɔnɔ nde be n yigi saren ile Alatala le ma.
8N si sɛɛwa ka ɲagalin i la kinikinɛ la,
bayi i ka n na tɔɔrɛ fɛlɛ, i ka n sondoŋɛ la ɲamɔɛ lɔn.
9I ma n boloka n jaguenu bolo;
i bata n to dula yiriwareŋɛ tɔ ka tenkun ɲɔ.
10Ee Alatala, kinikini n ma,
bayi n be tɔɔrɛ tɔ. N ɲa bata tiɲa jusu makasa la;
n sondoŋɛ nun n bali bangue tugun ɲɔgɔnna.
11N be n na simaya banna tɔɔrɛ le tɔ,
n be n na saŋɛnu banna bɛlɛya le tɔ.
N bata laganfun n na junube sabu la,
n kolenu bata nagasi.
12N bata ma fondo fɛɛyareŋɛ la n jague bɛ bolo,
hali n sigiɲɔgɛnu be n mayola.
N mu mɔgɔ makilandeŋɛ le la n lɔnbaganu bɛ bolo.
N nun minnu be bɛnna kila kunma, wonu tini n yen anu be borila n na.
13Anu bata ɲina n ma, iko min bata faga.
N bata to iko fondo samareŋɛ.
14N bata foniyanu siyama mɔɛ, anu be min fɔla n kunma,
masibɔ koe be n namilinden dula bɛ tɔ.
Anu ka ɲɔgɔn yen wagate min tɔ,
anu bɛnta n kunma anu ni n faga.
15Kɔnɔ nde, n be yige saren ile Alatala le ma,
n ko: «N Marige Ala mu ile le la.»
16N na wagatenu be ile le bolo;
i ni n nakisi n jaguenu ma,
anun minnu be n beela.
17I ni i ɲakɔtɔ lahenti nde i la jondeŋɛ ye.
I ni n nakisi i la kanunteya danbale la.
18Ee Alatala, i kana sɔn n ni malu,
bayi n bata n kulɛ labɔɔ i ma.
I ni a ma ko koron malanu le ni malu;
i ni anu lamɔdɛ ka anu doni laakira.
19I ni foniyantenu da balan, anu ni ma bobe la!
Kɛ fan nakoloyalanu be kumala telenbaganu ye
wasumanteya la anun fɛɛya la.
20Haa, i be ɲinmaya min mandiren i ɲalakilannanu ye,
wo siyata.
Minnu be anu yɛtɛ taakula i la, i be i la ɲinmaya diila wondelen ma adamadeŋɛ bɛ ɲala.
21I ni anu dogon i bata sutura tɔ, mɔgɛnu la bɛsɛnkɔnnɛya la ko la.
I ni anu latanga a ɲinma la, ka anu layanfaya nɛŋɛ la gbaloe ma.
22Mamatɔgɛ be Alatala ye,
bayi n to tota iko saa min bata kɛlɛ,
a nata a la kanunteya yita n na kabanakoenu la.
23N be a miraren nun n hakkile tɔ, n ka a fɔ n ko:
«N bata bee kabɔɔ ile Alatala ɲakɔtɔ.»
Kɔnɔ n to ka n kulɛ labɔɔ i ma wagate min tɔ,
i ka n na mamataran kulɛ bɛ mɔɛ le.
24Alatala la lannante mɔgɛnu, wo bɛ ni a kanu.
Alatala si mɔgɛnu makanta le minnu be tola a la ko tɔ.
A ni fan nakoloyalanu sɔŋɛ lasaagi anu ma a koroŋɛ la.
25Wole min bɛ be yigi saren Alatala ma,
wo sɛnbɛ don, wo juse ni limaniya.
Currently Selected:
Jabura 31: MOG
Highlight
Copy
Compare
Share
Want to have your highlights saved across all your devices? Sign up or sign in
