Oswald Chambers: Hoop - ‘n Heilige Belofte Voorbeeld

Dit is ‘n strik om gedurig aan foute te dink. Stel jouself enigeen voor wat homself in die lig van Jesus Christus gesien het en nog aan sy foute dink! Dis belaglik om te dink ons is te vuil vir woorde en om besorgd te wees oor die vlekke op ons. Los die hele miserabele ding uit; ons dra die doodsvonnis binne-in ons, dus kan ons nie op onsself vertrou nie, maar net op God, want God is vlekkeloos.

Die agtergrond van God se vergifnis is heiligheid. As God nie heilig was nie, sou daar niks in sy vergifnis wees nie. Daar is nie so iets soos God wat sonde miskyk nie; dus, as God vergewe, moet daar ‘n rede wees wat dit regverdig. Deur die mensdom te vergewe, gee God aan ons die erfenis van sy eie Seun — Hy verander die mensdom na die standaard van die Een wat sondes vergewe. Vergifnis is ‘n openbaring — hoop vir dié wat sonder hoop is; dit is die boodskap van die evangelie.

Oordenkingsvrae: Op watter maniere belemmer my foute en mislukkings die groei van my hoop? Watter rede het ek tot hoop as ek weier om vergifnis te gee of te aanvaar?

Aanhalings uit: "Not Knowing Where" en "The Shadow of an Agony", © Discovery House Uitgewers