Ons Het Gekom om Hom te Aanbid

God nooi twee groepe mense om die geboorte van Jesus te vier. Albei is buitengewoon, en albei vertel ons iets van wie God is. 

Die eerste uitnodiging gaan na 'n paar plaaslike herders. ’n Engel verskyn aan hulle in die veld en vertel hulle die goeie nuus. Dan gaan die herders om Jesus te aanbid.

Die tweede uitnodiging gaan die wêreld in. Na Jesus se geboorte het 'n ster oor Betlehem verskyn. ’n Groep mense van ’n ver land het die ster gesien en dit gevolg. Ons weet nie veel van hulle of hoeveel die reis werklik meegemaak het nie. Hulle het egter vir Jesus gevind en Hom met duur geskenke aanbid. 

Wat leer ons dus uit hierdie twee groepe besoekers wat deel van die Kersverhaal is? Dit wys ons onder andere hoe Jesus allerhande soorte mense bymekaar bring.

Die herders was soortgelyk aan Maria en Josef. Hulle was almal doodgewone mense uit 'n klein dorpie wat met lae-inkomste werke 'n bestaan gemaak het.

Die buitelandse besoekers kon egter nie méér anders gewees het nie. Hulle was van 'n ander land en het waarskynlik verskillende godsdiens oortuigings gehad. Dit kom voor dat hulle ook rykdom en invloed gehad het, wat Maria en Josef ontbreek het. 

Ons weet dat verskille mense kan verdeel. Ons het dit almal al gesien, beide in ons persoonlike verhoudings en in die lewens van ander. Die Kersverhaal skep egter 'n verbintenis met alle mense. God wil almal in sy familie insluit. So nooi God mense van naby en diegene van ver om Jesus se koms te vier.

Jesus se geboorte bring ook mense van verskillende stande bymekaar. Ons sien dit eers in die Kersverhaal, maar dit is 'n herhalende tema in Jesus se lewe. Hy het verhoudings gebou met mense van baie verskillende agtergronde. Deur daardie verbintenisse het Hy gehelp om die sosiale, ekonomiese en politieke hindernisse af te breek wat geneig is om ons te verdeel. 

God is besig om 'n wêreldwye familie te bou — so lei Hy ons om 'n "ons teenoor hulle"-ingesteldheid te laat vaar. Dit is een van die dinge wat ons met Kersfees vier: Jesus wys ons die krag wat in nederigheid, verbintenis en empatie opgesluit is.

Bid: Liewe Vader, dankie dat U my genooi het om deel te wees van u wêreldwye familie. Help my asseblief om aandag te gee hoe ek verbintenisse kan bou met mense wat anders as ek is. Wys my wie ek in 'n verhouding met U kan nooi. In die Naam van Jesus. Amen.