Lesse Uit My TuinVoorbeeld

Sade

In die koue dae in Junie begin my gunstelingpos aankom — die saadkatalogusse! Natuurlik kan ek deesdae alles aanlyn vind en koop, maar ek hou van die kleurvolle uitleg van blomme en groente wat die katalogusse verskaf. Wanneer ek deur die glansbladsye blaai, dagdroom ek en dink aan warmer dae met daardie pragtige beelde in die katalogus in my eie braak land. 

Opgewonde en met groot hoop plaas ek my bestelling. Wanneer dit aankom, is dit nie die voltooide produk wat in daardie pragtige foto's in die katalogus verskyn het nie. 

Al wat ek ontvang is saad.

Sade is nie lieflik nie. Hulle is slegs neutraal gekleurde korrels, knolle, pitte of bone. Dit is al wat hulle is totdat hulle in die grond geplant en natgemaak word. Raai wat gebeur dan? 

Hulle gaan dood!

Jy sien, doodgaan is die enigste manier waarop 'n saad kan groei. 

Nadat die saad in die klam grond geplant is, swel dit uit en kraak oop; dit verloor die droë buitenste dop. Die saad gee sy saad-identiteit heeltemal prys om iets met selfs groter waarde te word — 'n spruit! Daardie spruitjie stoot 'n lang wortel onder die grond in en voor jy weet breek 'n stingeltjie deur die grond en klein groen blaartjies verskyn. Dan, uiteindelik blomme, en daarna vrugte! 

Hierdie groeisiklus is 'n wonderbaarlike herskepping van dood na lewe — 'n volledige uitruil van identiteite.

Jou lewe het dieselfde potensiaal as daardie saad. Jy kan kies om vas te hou aan jou selfbehoud, jou onafhanklike hart. Of jy kan toelaat dat dit sterf deur dit in die teer en bekwame hande van die Meester Tuinier te plaas, wat vir daardie "saad" sorg en dit verruil vir 'n vrugbare, oorvloedige lewe. 

Die sterwe vind plaas in die daaglikse prysgee van wat jy vir jouself wil hê. Dit gebeur as jy jou mond toemaak wanneer jy 'n string woorde wou uiter. Dit gebeur as jy kies om ander as belangriker as jyself te ag. 

Sterwe verg oefening. Jy sal baie keer per dag die keuse gegee word om jou kruis op te neem en Hom te volg, of jou eie natuurlike, menslike begeertes te kies. 

Natuurlik sal jy deur moeilike storms gaan en moeg word. Maar die wonderlike ding van jou bereidwilligheid om daardie dooie "saad" aan God te gee, is dat die grootte van jou vertroue of hoop nie saak maak nie! Om Hom te vertrou is die aktivering van jou geloof, en Hy sal dit selfs verder vermeerder as wat jy jou kan voorstel – van dood tot lewe!  

Om jouself te offer en jou aan Hom oor te gee, kan net vermenigvuldig word en groei, want by God is dit 'n geestelike onmoontlikheid om minder te word. Hy sal al die bloeisels, groei en vrugte in jou voortbring wat jy nooit op jou eie kon voortbring nie. Hy is die God van meer as, van oorvloed, van wonderlike goedheid en heerlikheid. 

Sal jy die "saad" — jou hart — in sy liefdevolle hande plaas? Hy verander alles wat ons aan Hom bied.

Moet nooit die verlies van jou identiteit vrees wanneer jy jou hele hart aan Hom bied nie. Dit is slegs wanneer ons breek wat ons vermenigvuldig word, en in die sterwe wat ons ware lewe begin.