Rick Warren se Daaglikse OordenkingsVoorbeeld

Geloof is iets wat ons doen

Geloof is meer as iets wat jy net voel. Baie mense verwar emosies en gevoelens met geloof. Hulle kom kerk toe en is emosioneel ontroer, geïnspireer en gestimuleer. Dit beteken egter nie dat hulle in geloof wandel nie.

Die Bybel sê geloof is iets wat ons doen, nie net wat ons voel nie. Met ander woorde, geloof is nie bloot sentimentaliteit nie. Gestel ek gaan buitentoe en sien iemand wat haweloos en arm is. Ek sien die persoon is honger, koud en het klere en skuiling nodig. Sou ek groot geloof openbaar as ek na hom toe stap en sê: "Hou moed! Moenie bekommerd wees nie, wees gelukkig! Voel goed! Glimlag 'n bietjie!"?

Dit verg nie veel geloof om dit te doen nie. Daar is deernis in geloof. Geloof sê: "Ek sal alles in my vermoë doen om jou seer te stop." Regdeur die Nuwe Testament word getuig hoe Jesus deur mense ontroer is en deernis vir hulle gehad het. Jesus het ons gewys dat geloof prakties is.

As ons 'n behoefte sien, doen ons iets daaraan. Ons sê nie net leë woorde nie — "Wel, ek sal vir jou bid." Die Bybel sê dat ons geloof sigbaar word deur ons dade.