Rick Warren se Daaglikse OordenkingsVoorbeeld

Vertroue lei tot goeie gesondheid

God het jou liggaam vir jou gegee as geskenk en dit kom met 'n eienaarshandleiding — Die Bybel. Daarin staan al die instruksies om na jouself om te sien en 'n lang, gesonde lewe te lei.

Jy weet alreeds wat die basiese beginsels is — gesonde kos, gereelde oefening en 'n goeie nagrus. Vandag wil ek kyk na die eerste vier gesondheidsfaktore waaraan jy dalk nog nie gedink het nie.

Om op God te vertrou is goed vir jou gesondheid — "Vertrou volkome op die Here en moenie op jou eie insigte staatmaak nie" (Spreuke 3:5). Hoekom is dit goed vir jou gesondheid om op God te vertrou? Wanneer jy op Hom vertrou dan is jy nie bekommerd nie.

Psalm 116:7 sê: "Ek moet nou tot rus kom, die Here het goed aan my gedoen." Jy gaan minder gespanne wees wanneer jy volkome op God vertrou.

Jy het 'n keuse — jy kan óf bekommerd wees óf aanbid. Jy kan óf bid óf angstig wees.

Hoe meer jy bid, hoe minder angstig gaan jy wees. Ontspan, want God sal na jou omsien!

Die Bybel sê in Spreuke 14:30, "'n Kalm gemoed hou die liggaam gesond; hartstog vreet 'n mens op." Dis nie net wat jy eet wat saak maak nie, maar dit ook wat aan jou eet. Jy kan al die regte makrobiotika en organiese voedsel inneem, maar as jou liggaam gevul is met haatdraendheid, bekommernis, vrees, wellus, skuldgevoelens, woede, bitterheid, of enige ander emosionele kwale, gaan dit jou lewe verkort.