Ìyìn: Àṣàrò nínú Orin DáfídìÀpẹrẹ

Kín ni ó sọ?

Dáfídì gbàdúrà pé kí Ọlọ́run dáàbò bo ó lọ́wọ́ àwọn ọkùnrin tí òùngbẹ ẹ̀jẹ̀ ń gbẹ tí wọ́n dìtẹ̀ mọ́ ọ. Ọlọ́run ni odi, agbára àti ibi ààbò rẹ̀ ní àkókò ìpọ́njú.

Kín ni ìtumọ̀ rẹ̀?

Dáfídì kọ sáàmù yìí gan-an nígbà tí Míkálì, aya rẹ̀, tí ó jẹ́ ọmọ Sọ́ọ̀lù, ràn án lọ́wọ́ láti bọ́ lọ́wọ́ àwọn ọkùnrin bàbá rẹ̀ tí wọ́n dúró láti pa Dáfídì nígbà tí ó jáde kúrò ní ilé rẹ̀. Àkọlé náà tọ́ka sí pé èyí jẹ́ miktam kan - sáàmù ìtọ́nisọ́nà. Dáfídì kọ àwọn sáàmù mẹ́fà bẹ́ẹ̀ (16, 56-60) nígbà tí ó ń sá fún Sọ́ọ̀lù. Ọ̀rọ̀ tí a pè ní miktam níí ṣe pẹ̀lú kí á tẹ nnkan. Nítorí náa bí ó ti jẹ́ pé ibi kíkà yí jẹ́ àdúrà Dáfídì fúnrarẹ̀ sí Ọlọ́run, nkan kan wà nínú rẹ̀ tí Dáfídì mọ̀ pé ó nílò kí wọ́n tẹ̀ ẹ́ sí inú àti ọkàn àwọn ènìyàn Ọlọ́run. A kọ ọ́ ní àkókò tí Dáfídì ṣẹ̀ṣẹ̀ bẹ̀rẹ̀ síí sá fún Sọ́ọ̀lù, Dáfídì bẹ̀rẹ̀ àṣà kan tí a lè rí nínú gbogbo àwọn sáàmù - ó gbàdúrà ní òtítọ́ sí Ọlọ́run Ísraẹ́lì, ó dúró pẹ̀lú ìfojúsọ́nà fún Olúwa Alágbára Jùlọ́ láti ṣe é, ó sì yin ìwà Ọlọ́run nínú èyí tí ó ti rí agbára.

Báwo ni kí n ṣe dáhùn?

Àwọn òtítọ́ wo ni Ọlọ́run ti tẹ̀ sínú ọkàn àti àyà rẹ nípasẹ̀ ìrírí rẹ? Àwọn ẹ̀kọ́ wo ni o kọ́ ní àwọn àkókò tí ìnira pọ̀? Àwọn òtítọ́ àti ẹ̀kọ́ yìí gbọdọ̀ wà ní ìrántí kí á sì fi lé àwọn ènìyàn lọ́wọ́. Fi èrò sí ṣíṣe àkọsílẹ̀ nígbà tí o bá ń ṣe àṣarò nínú ọ̀rọ̀ lójoojúmọ́, tàbí kí o kọ ọjọ́ tí ó jẹ́ sí ẹ̀gbẹ́ ẹsẹ tí ó ní ìtumọ̀ pàtàkì nítorí pé ó tù ọ́ nínú tàbí ó gbà ọ́ ní ìyànjú ní àkókò tí nkan le. Tí Ọlọ́run bá ti fi ọ́ sí ipò adarí tàbi aláṣẹ, wá àwọn ọ̀nà tí o fi lè lo àwọn ẹ̀kọ́ ìyè yìí nínú bí o ti ń darí. O lè fi ohun tí o ti kọ́ lé àwọn ènìyàn lọ́wọ́ níbi tí ìwọ àti ẹbí rẹ ti ń jẹun alẹ́ tàbí nígbà tí ò ń jẹ oúnjẹ ọ̀sán pẹ̀lú alábàáṣiṣẹ́pọ̀ tàbí ọ iyàrá ẹ̀kọ́ rẹ. Òtítọ́ Bíbélì wo ni o nílò láti fihan ènìyàn kan lónìí?