Ìyìn: Àṣàrò nínú Orin DáfídìÀpẹrẹ

Kí ni ó sọ?

Dáfídì bèèrè lọ́wọ́ Olúwa láti da ìparun àti ìtìjú sí orí àwọn tí ó ti fi ibi san ire rẹ̀ padà. Ó fojú sọ́nà láti gbóríyìn fún Olúwa ní gbangba fún ìdáláre tí ó rí gbà.

Kí ni itúmọ̀ rẹ́?

Orin Dáfídì 35 jẹ́ sáàmù ìpè fún àjálù ibi nínú èyí tí Dafidi kò kàn bẹ Ọlọ́run láti ṣẹ́gun àwọn ọ̀tá rẹ̀ nìkan ṣùgbọ́n bákannáà kí Ó pa wọ́n run pátápátá. Àgbàlá ọba Sọ́ọ̀lù kún fún àwọn ènìyàn tí wọ́n ń sọ̀rọ̀ èké wúyẹ́wúyẹ́ nípa Dáfídì ní etí Sọ́ọ̀lù. Àwọn ọkùnrin tí ó ti pè ní ọ̀rẹ́ rẹ̀ ń fi ń ṣe yẹ̀yẹ́ wọ́n sì ń mú ìdààmú rẹ̀ pọ̀ si. Ó ṣe pàtàkì láti rántí pé ìmọ̀lára Dáfídì jẹ́ ti ènìyàn ṣùgbọ́n ó bá ìdájọ́ òdodo Ọlọ́run mu fún àwọn tí wọ́n kọ ète rẹ̀. Níwọ̀n ìgbà tí Dáfídì jẹ́ ọba ẹni àmì òróró Ọlọ́run, ó gbé àwòrán ìtọ́ka sí ète Ọlọ́run fún ọjọ́ iwájú Israẹli. Nítorí náà, èyí jẹ́ ẹ̀bẹ̀ fún orúkọ Ọlọ́run àti ìdí láti gbé e lárugẹ. Dáfídì tọ́ka sí ìwà ìrẹ́jẹ sí Ọlọ́run òdodo rẹ̀, ó sì gbàdúrà gẹ́gẹ́ bí ìfẹ́ Ọlọ́run pé àwọn ẹni búburú kò ní borí àwọn olódodo.

Báwo ni kí n ṣe dáhùn?

Gẹ́gẹ́ bí ọmọdé, ó ṣe é ṣe kí o ṣeré "ṣòfófó" tàbí "ẹ̀rọ ìbánisọ̀rọ̀," eré nínú èyítí ẹnìkan á sọ̀rọ̀ wúyẹ́ sí etí ẹnìkan títí yóò fi yípo, ṣùgbọ́n tí yóò ti sọ ìtumọ̀ rẹ̀ nù nígbàtí ó bá bá dé ọ̀dọ̀ ẹnití ó gbẹ̀yìn. Ohun kannáà yìí ń ṣẹlẹ̀ ní ìgbésí aye. Kò sí iye wákàtí tí o lò láti sọ̀rọ̀, tẹ ọ̀rọ̀ sínú afẹ́fẹ́, kí ó ránṣẹ́ fàyè rí, ó fẹ́rẹ̀ẹ́ má ṣeéṣẹ láti ṣe àtúpalẹ̀ ìbàjẹ́ ọ̀rọ̀ burúkú. Pẹ̀lú, tí o bá jẹ́ kí ohun tí àwọn ẹlòmíràn ńsọ nípa rẹ borí ọkàn rẹ, ó ṣeéṣe kí wọ́n ṣí ọ lọ́kàn kúrò nínú ète Ọlọ́run fún ọ. Ogun ẹ̀mí ṣe é jà dáadáa pẹ̀lú àwọn ohun ìjà ẹ̀mí - àdúrà àti àkókò nínú Ọ̀rọ̀ Ọlọ́run. Báwo ni àdúrà rẹ fún ìdáàbòbò Ọlọ́run ṣe nílò láti dún bíi Dáfídì nínú àyọkà òní? Ǹjẹ́ ọkàn ń ru sókè fún ìdájọ́ tàbí ẹ̀san? Ǹjẹ́ ò ń ṣàníyàn nípa orúkọ rẹ tàbí ti Ọlọ́run? Wá Ìwé Mímọ́ kí o lè gbàdúrà gẹ́gẹ́ bí ìfẹ́ Ọlọ́run lẹ́yìn náà kí o sì fi ọ̀rọ̀ náà sílẹ̀ pẹ̀lú Rẹ̀.