Matiyu, echî 13
13
Egan í nyima-ebhin
(Mak 4.1-9; Luk 8.4-8)
1Nkúbhi ofú ábhi, Jisos a mághe njû ányi a jî kúmi ka mkpe aya se yê a kpí ane achot Obhasi. 2Ekam ane nji é bhâ fáre yê é kâk ka étíŋanti, é fâŋ eróŋ é chîŋ. Jisos a ruá mân a jî gyê ka okpi a kúmi. Ane mbá, á kə̂t ka mkpe aya.#Luk 5.1-3.
3A ri na ngan nâ Jisos a kóe a kpík ábho iyîm etî-etî. Kən a kí kpi ábho se, “Ofú bhə́t, nyima-ebhin yót a jak a jí bhe nkap ka ebhin ejê. 4Ebhú a kí bhe nkap nnyí, aməghe mma tat á gbô ka mbá. Nnón ḿ bâ dî. 5Etʉ̂ á gbô ka ngûm atáé-átáe. Á dʉ̂ etʉri-étʉ́ri áji, ka nsi á ka tí. 6Kən njúí a kpo to a fáp, nkap nnyi ta a dʉ nná a kpô fép, ka arʉk á ká gye nsi nono. 7Etʉ̂ á gbô ka ajoŋe, ajoŋe mmá á kúi na ḿmáne, á gbʉ́i nkap nnyí, kpe ekpak ekúúm cháŋ. 8Etʉ̂ á gbô ka nsi nnyi no. Áma á kúi, á káre nkap. Nsə́n etat a kí karé aməghe kpe nsam érôn, nnyi tat nsam ésá, nnyi tat nsam na ófó. 9Deê nne mân nnyo a fonê atûŋ mma á yugha mbá, a yúk.”
Echî nji Jisos á chorá nchot ka ngan a ri jen?
(Mak 4.10-12; Luk 8.9-10)
10Ane mba á tóbha Jisos á bhâ bhə̂p yê sê, “Echî nji ó chorá nchot ka ngan a ri jen.”
11Jisos a táme ábho se, “Obhasi a káre ên aron se ó mə́ŋe ên ejûm ebhə̂t nji é rî ka otúi ósô, kən ane mba ngá, á ká karé. 12Echî aŋ? Nne nnyo a fonê ofon, á kí kpe yê é chíŋi mân obhô, kən yê nnyo á ka fon, kpe mkpât nnyi a fonê áno, á kí tabhé.#Mat 25.29; Mak 4.25; Luk 8.18; 19.26. 13Echî mân nji ń chorá na ábho ka ngan é rî sê,
‘Ábho á kí kep ka etʉri, kən á bhó yen,
á kí yuk, kən é bhó jae ábho.’
14Ka ekpak njí, nchot i nkara-otîp Obhasi nnyo á kamá se Asaya a jóe ka etʉri. Asaya se,
Obhasi a chorê se,
‘Tîk o kî ên atûŋ,
kən ó bhó gyʉri ên nji á chóra.
Tîk o kêp ên,
kən ó bhó yen ên nji ó kebha ên.
15Echî aŋ? Énə́mé é faŋ ane mbá ka ḿbə́ŋé é chiŋ,
atûŋ ábho á kuŋ, mbá á ro yúk.
Amə̂t ábho á tan.
Áno asík, kə́n á mə́ŋe nji á yéna, á məŋe nji á yúgha.
Énə́mé fə́ne é mân ábho ka íkíkéré
á kpíghi mbâ amé, n yîm fə́ne ábho á sôn.’ ”#Asa 6.9-10.
16Kən Jisos se, “Ogyebhá-ḿbə́ŋé ó rî na ên kpe-eji. Amə̂t amə́né, á kí yen mbá. Atûŋ amə́né, á kí yuk. 17Deê ń sə́ré ên bəre akará-otîp Obhasi etî-etî na ane Obhasi á nok sê á yén iyîm mbi ó yena ên nná mfá-mfá, kən á ká yen. Sê á yúk iyîm mbi ó yugha ên mfá-mfá, kən á ká yuk.”#Luk 10.23-24.
Echî egan í nyima-ebhin
(Mak 4.13-20; Luk 8.11-15)
18Jisos se, “Kî ên mân atûŋ, yûk echî egan í nyima-ebhin. 19Ane mba á kí yuk otîp otúi Obhasi kən á bhó gyʉri, á rî noŋ nkap nnyi a gboê ka mkpe mbá. Á yûk otîp, kən Satan a bhâ yíghi ḿbə́ne ka ḿbə́ŋé ábho.
20“Nkap nnyi a gboê ka eji atáé-átáe nâ ane mba á yúghi otîp otúi Obhasi, á kô ḿbə́ne na ogyebhá-ḿbə́ŋé ntə̂m yə́t. 21Kən otîp mbí ó bhó fon arʉk ka ḿbə́ŋé ábho. Ka obhô mbí, ó bhó ka. Ebhú sê kpe nchot kpe oseŋe ó fâp ka obhô otîp mbí, ane ntʉ́ghi mbá á kí yighí obhô ka ḿbə́ne ka ngyím ányi.
22“Nkap nnyi a gboê ka ajoŋe nâ ane mba á kí yuk otîp Obhasi, kən íkíkéré ngun na ekot í ntí í bhó karé mbá otîp mbí ó kúi ka ḿbə́ŋé ábho.
23“Kən nkap nnyi a gboê ka nsi nnyi no a ri ane mba á kí yuk otîp Obhasi ó gyê ábho ka echî ó kúi ó kâp noŋ nkap nnyi a kí kap nsə́n etat a káre aməghe nsam érôn, etʉ̂ nsam ésá, nnyi tat esam na ófó.”
Egan í njé etat na énoê nkap
24Jisos a kpô sə́ré ane egan nji tat se, “Otúi Obhasi ó rî noŋ nne nnyo a kóe ejûm noŋ érési a bhê ka ebhin ejê. 25Atʉ́ mát, kpe énê a gyê ka eye njû, a núŋi. Nne-ebhan i nne nnyó a bhâ kô njé etat a bhê ka ebhin njí, a ruá. 26Ebhú iyîm mbí í kí dʉ, érési njí na njé nnyí, í dʉ̂ í kí kui fə́ne ebhú jə́t. 27Ágbán í mfone ebhin nnyó á kpô yén áno, á bhâ bhə̂p ńsé ábho se, ‘Ńsé, o bheê nná érési ka ebhin ejâ. Njé nnyí a kpó dʉ fan?’
28“Kən ńsé ábho a táme se, ‘Nne-ebhan omé nâ a yimî áno etûm áji.’
“Ágbán abhê á kpô bhə́p yê sê, ‘Kən e kâ jî é jí yə̂p njé nnyí, é yíghi a?’
29“A táme ábho se, ‘Maghê ên! Ájoé ó yim ên, ebhú tat tîk o chîŋ o yə̂p ên érési eróŋ. 30Maghê ên ebhin efʉʉ́m é sí. Ebhú é si, tîk afʉá-fʉ́á á râŋ mbá kpá á gbût njé ányi á yíghi, á bhôp ka ekpu á ríghi ka ngûn. Á man, tîk a kô mân érési á bhâ kî ka ókpáré obhámé.’ ”
Egan í nkap nnyi á kamá se mósta
(Mak 4.30-32; Luk 13.18-19)
31Jisos a tûp egan nji tat a káre ábho se, “Otúi Obhasi ó rî noŋ nkap etat nnyi á kamá se mósta. Nne a kô a bhê ka ebhin ejê. 32Ka chénchén nkap ka ngyím ányi, mósta nâ a chébhe a chîŋ ochíŋ kən á ko á bhê, a kí dʉ, a kúi, esə́n ejê é kí faŋ é chíŋi chénchén átí ka ńgyímí átí ányi. A chə́bhe étí nji é fáŋe é bhîk nji nnón ń kə́ bha ḿ bâ gbê ojû.”
Egan í ejûm ogyep etat nji á bhíŋa sê yîs
(Luk 13.20-21)
33A kpô túp egan etat a káre ábho se, “Otúi Obhasi ó rî noŋ yîs nnyi nne-nkáé a kí yim brêt a kô a kpê na fráwa brêt, a chə́bhe ta a nʉ̂t a súi ngûm.”
Jisos a kí kpi ane ka ngan
(Mak 4.33-34)
34Jisos á chorá mbâ ekam ane a ri ka ngan. Á bhó chot nji á ka túp ka ngan. 35Á yimá erû njí ka eyimím eyum í nkara-otîp Obhasi éməné é jóe ka etʉri. A chorê se,
“Ebhú n kí chot nchot na ábho,
tîk n chorá a ri ka ngan.
Tîk n sə́re ábho iyîm
mbi ta ebhú ngun a róghe ane á ká məŋé.”#Nkôn 78.2.
Jisos a sə́re echî egan í njé etat
36Jisos a mághe mân ekam ane njí, a gyê ka njû. Ágbán abhê á bhâ bhə̂p yê sê a sə́ré ábho echî egan í njé.
37Jisos a táme ábho se, “Nne nnyo a bheê érési a ri Mmon-i-ntem-nne. 38Ebhin ejê nâ ngun. Érési a ri ane mba á fóne otúi Obhasi. Ajé a ri ane Satan. 39Nne-ebhan nnyo a bheê njé nnyí a ri Satan yê ḿfoné. Ofú ebhin efʉʉ́m a ri ofú mbi ngun nnyí a kí man. Ane mba á kí fʉ a ri baénjel.
40“Ekpak á kí chuí ajé mmá á ríghi ka ngûn nâ fə́ne ekpak nji é kí joé ka ofú ngun a kí man. 41Tîk Mmon-i-ntem-nne a tûm baénjel abhê á jî yíghi ane mba á chóa atem á yimá obhí ka ngun nnyí é kpê na chénchén mba á yíma obhí ábho áfoné. 42Á chəmé ábho chénchén, a kí bhum ka erəmta-ngûn, a mághe ábho áfo á kə̂t á rʉra ekpatə́m ekʉ̂, á dik akek. 43Kən ane Obhasi tîk á yâk noŋ njúí ka otúi Ńsé ábho.
“Nne nnyo a fonê atûŋ, deê a yúk.”
Egan í ntí mmi á bhə́re
44Jisos se, “Otúi Obhasi ó rî noŋ ntí mmi nne a sə́me nsi a bhə̂t ka ebhin. Nji nne etat a jiî a jî yên ntí mmí, a kpô tuk asi a bhúi. É gyébhe yê kpe-eji, a jâk a jî gúri iyîm ibhê chénchén ka njû, a kô ntí a nâm ebhin áji.”
Egan í ntáé etat nnyi á kpok ntí
45Jisos se, “Otúi Obhasi ó rî noŋ njena-ogəm nnyo a kí wom ekpak í ntáé etat nnyi á kpok ntí se yê a nam. 46Nji a yéne yə́t nnyi a nobhê a chîŋ ochíŋ, a jak ka njû eye a jî gúri kpe bhaghé ejûm ejê, a kô ntí a nâm ńnyə́ne.”
Egan í ntûfúk
47Jisos se, “Otúi Obhasi ó rî fə́ne noŋ ntûfúk nnyi á túbhi ka aya, nsí kpe nnyə́n kpe nnyə́n, a kô. 48Ebhú á túbhi ntûfúk nnyí, osí ó gyê ó súi, atúbhá-túbhá á kí tʉ ńnyə́ne á gyʉ̂t ka ngun, á jî kúmi á sâŋ osí mbí, á kî ka ngûm ébháe. Nnyen osí mbi á wóme á kí kak ka iyîm ábho, á bhûm mbi á ká wom. 49Ekpak njí jə́t nâ é kí joé ka ofú ngun a kí man. Baénjel á kə́ bha á bhâ sâŋ ane abhí á yíghi ka ekam ane ano. 50Á kí bhum ane abhí ka erəmta-ngûn. Nji á bhúmi nná ábho ka ngûn, á kí kət á rʉra ekpatə́m ekʉ̂, á dik akek.”
Emané nchot
51Jisos a bhâ bhə̂p mân ábho se, “Nâ-ngá o ri ên ágo o məŋá ên iyîm mbi ń chorá nná a?”
Á kâm sê ábho á kí məŋé.
52Jisos a chôt mân se, “É fap sê kpe nnyón ntóŋa-ebhín nnyo a kpíi a mə́ŋe nchot otúi Obhasi a ri noŋ mfone njû nnyo a kí yighí iyîm mbi í kpóe ntí, kpe mbi fê, kpe mbi tə̂m, ka mmon-i-njû nnyo yê a kíi, a tóŋé ane.”
Á jiŋ Jisos ka eték ejê Nasaret
(Mak 6.1-6; Luk 4.16-30)
53Nji Jisos a jeghê ngan eye etúbhúm, a mághe eji njí. 54A chə́bhe njəm ka eték ejê, a jî gyê ka óchâm Obhasi a kí kpi ane. Ane mba á yúghi yê á kə̂t á chorá ábho-ábhô sê, “Ntʉ́ghi mbí oməŋá-ejûm ó dʉ̂ fan? A kóe ikom mfí fan a yimá ntûm okpógha-biji nnyí? 55Mmon i nkúma-njû nnyó nná asík á? To nnyen owe a ri Meri? Cháŋ abhon-í-nnyen abhê a ri mba Jems na Jusep na Simun na Juda a? 56Ḿfa asík nâ chénchén abhon-í-nnyen abhê mba ane-akáé á kúma a? Mbá nnyi yê a fonê mân chénchén aron mmá na ikom mfí a ri fan?” 57Á bhâ jîŋ mân yê na oyámá-ḿbə́ŋé.
Kən Jisos a sə́re ábho se, “Ejík í nkara-otîp Obhasi kpe jə́t cháŋ nji é dʉ̂k ka eték ejê na ndə́p-i-njû eye.”#Jon 4.44.
58Jisos á ka yim ntûm okpógha-biji etî-etî ka eték ejê, ka ane abhê á ká ki ḿbə́ŋé na yê.
Đang chọn:
Matiyu, echî 13: ETUNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Ejagham New Testament © Bible Society of Nigeria and Bible Society of Cameroon, 1996.
