Matiyu, echî 14

Ekʉ̂ Jon nnyo mfúgha-ane-ayép

(Mak 6.14-29; Luk 9.7-9)

1Ka ebhú njí, Erot, nnyo ntûfâm i Gariri, a bhâ yûk esə́re Jisos. 2Nji a yúghi, a sə́re ane mba á yíma etûm na yê se, “Nne nnyó a ri Jon nnyo mfúgha-ane-ayép ka etʉri. A chə́bhe njəm ka ekpin. Nâ ńjə́ne a fonê áno ikom kən a yimá iyîm okpógha-biji.”

3Ebhú Jon a ri mbít, Erot a káre ikom, á fî Jon á kâk ka ókúmí. É dʉ̂ ka obhô Erodiyas, nkáé mmon-i-nnyen owe Firip. 4Jon a sə́re Erot se, “Ó gbo ebhín nji o tabhê áno nkáé mmon-i-nnyen owa.”#Luk 3.19-20.#Mbín 18.16; 20.21. 5Ḿbə́ŋé a bhîp Erot na Jon. A nôk ka ekpak a kí yui yê kən a kí fup ane Jus, ka chénchén ábho á jígha sê Jon a ri nkara-otîp Obhasi.

6Ka ofú Erot a fiî erom se á jíghí ofú mbi á jíi yê, mmon Erodiyas nnyo nne-nkáé a fâp a bhə̂n ebhə̂n ka ochî ane chénchén. Ḿbə́ŋé a gyébhe Erot kpe-eji. 7A bhâ chími a sə́re mmon nnyó se, “Bhə̂p kpe bhaghé ejûm, tîk n káre wâ.”

8Ka ekpak nji, nnyen i mmon nnyó a sə́re yê se a sə́re Erot se, “A kó echî Jon nnyo mfúgha-ane-ayép ka okpere, a bhá karé yê ka ngyím ányi.”

9Nji mmon nnyó a chorê ejûm njí, Erot a môt, kən á ka wom a yóŋé nji a chimî ka ochî ajéné abhê. A káre ikom se á yîm ejûm nji mmon nnyó a wóme. 10Á jak mân ka njû ókúmí á jî gbût echî Jon. 11Á kô echî áji á kâk ka okpere, á bhâ káre mmon nnyó. Mmon nnyó fə́ne a kô a jî káre mbâ nnyen. 12Ágbán í Jon á bhâ kə̂n biji ńsé ábho á jî kə̂n. Á jak á jî sə́re Jisos achot mma á fábhe.

Jisos a káre édî mbâ ekpatə́m ekam ane

(Mak 6.30-44; Luk 9.10-17; Jon 6.1-14)

13Ebhú Jisos a yúghi ekʉ̂ Jon, a gyê okpi a mághe eji áji, a jí wom eji etat a kumí yê átíŋ. Kən ane á yûk mbá a jiî, á mághe nték ábho, á tôp yê mbá-ḿbâ. 14Jisos a kpô fáp ka okpi, a yên ekam ane njí, a fôn nsôn kpe-eji na ábho. A yîm fə́ne mba á máŋa á sôn. 15Egu é kpó to é sí, ágbán abhê á bhâ chôt na yê sê, “Ebhú é ji, eji njí ngá a ri etə́m. Sə́re ane mbá á jî ka nték nnyi a ri mfá kpít, á jî nâm édî á dí.”

16Kən Jisos a táme ábho se, “Echî emaghám ábho a ri jen? Ên áfoné, karê ên ábho iyîm á dí.”

17Ágbán abhê sê, “Édî nji é kə́re êt mfá a ri nsûm i brêt érôn na nsí ébháe.”

18Jisos a sə́re ábho se á kô édî áji á káre yê. 19Nji á káre yê édî njí, a sə́re ane mbá se á kúmi okumí. A kô mân brêt nnyí érôn na nsí ébháe a fî. A yûŋ echî ka ósô a káre ekûp mbâ Obhasi. A bhêk brêt nnyí a káre mbâ atóbhá abhê se á kíri á káre ane. 20Chénchén ane á dî édî njí, á gyʉ́ri. Ágbán abhê á bhûp akpât édî mma á kə́re á kâk ka bikáé ófó na ébháe, í súi. 21É yighí ane-akáé na abhonche, mfan ane-arûm nnyi á díi édî áji a sî ejûm bəre ntem-esam ntə̂m-ntə̂m ófó na ébháe na ejûm (5,000).

Jisos a jên njəm-ósô ayép

(Mak 6.45-52; Jon 6.16-21)

22Ka ngyím ányi, Jisos a sə́re ágbán abhê se á gyé okpi á râŋ mbá-njəm aya nnyi ńgô, yê a kə̂t a nok ane á kʉ́rí. 23Nji á kʉra, a gyʉ̂t yê átíŋ ka ńchí egúí a jî góre Obhasi. Egu é kpó to é sí, Jisos a ri áfo yê átíŋ. 24Ka ebhú njí, okpi ane abhê ta ó si étíŋanti aya. Mfêp a kí yim, ábhúghí-aya á suma okpi á tubha ńgô, á túbha ngá.

25Ta nkok i ndaŋa-mbá a kûk, Jisos a mághe a kí jen njəm-ósô ayép a tóbhá ane abhê. 26Nji ane abhê á yéne nne a kí jen njəm-ósô ayép, efup é súi ábho biji. Á kí kere a ri sê ńkʉ́. Á kûk káŋ káŋ káŋ.

27Jisos a sə́re mân ábho ntə̂m yə́t se, “Ka fûp ên. Son ên ḿbə́ŋé. A ri mme áno.”

28Kən Pita se, “Ntûfâm, ájoé a ri we ka etʉri, sə́re ə̂m ń jên njəm-ósô ayép ḿ bá kpúghí wâ.”

29Jisos se, “Nâ bhák.” Pita a fâp fə́ne ka okpi a róghe ejeném njəm-ósô ayép a jak mbâ Jisos. 30Kən a kpô yén mfêp nnyí a kí nok, efup é fî yê kpe-eji, a róghe fə́ne eterém. Kən a kûk káŋ káŋ káŋ se, “Ntûfâm, nyáŋé ə̂m n kâ tân.”

31Jisos a tə̂n fə́ne obhô ebhú jə́t, a fî yê. A sə́re Pita se, “Ḿbə́ŋé eya nnyi o kíi na mme á ka son kpe mkpât. Jen é yími kən o fôn efup?”

32Nji á gyée okpi na Pita, mfêp a kími. 33Ane abhê mba á rî ka okpi, á káre Jisos ekpatə́m eyúp á chorá sê, “Ka etʉri, we a ri Mmon Obhasi.”

Jisos a yîm ane emaŋé ka Genesaret á son

(Mak 6.53-56)

34Nji Jisos na ágbán abhê á yáŋe aya, á tə́me ka eték í Genesaret. 35Ane á yên ábho, á mə́ŋe sê a ri Jisos. Á tûm eyum ka nték ebhat áji sê á kó ane bimaŋé á bhá. Ane á kə̂n chénchén ane bimaŋé á bhak mbâ Jisos. 36Á góre Jisos sê a kam ane mba á fóne emaŋé á kə́me kpe otûŋ-éfô obhê ḿbə́ne-mbənê. Ane chénchén mba á kə́me, á sôn fə́ne.

Đang chọn:

Matiyu, echî 14: ETUNT

Tô màu

Chia sẻ

So sánh

Sao chép