Matiyu, echî 12

Nchot ofú oyoá-biji

(Mak 2.23-28; Luk 6.1-5)

1Ka ebhú áji, Jisos a kí jen a chíŋá ka ebhin í nkʉi etat. Ofú ábhi a ri ofú oyoá-biji. Njaé a róghe atóbhá abhê eyámám. Á gyê ebhóŋóm nkʉi nnyí á dik.#Otira 23.25. 2Ebhú ane echəme Farasi á yéne, á sə́re Jisos sê, “Ńgyê, atóbhá abhâ á kí yim ejûm nji kə́n á ká yim égyé, ka ofú oyoá-biji.”

3Kən a táme ábho se, “Nâ-ngá ó ka nok ên oyúk ejûm nji Debhit na ane abhê á yími ebhú njaé á yama ábho a? 4A gyée ókʉ́rí achot Obhasi, a kə̂n édî nji á jóme á káre Obhasi, a kíri na ane abhê á dî. To ebhín é fíi sê nkara-agore Obhasi átíŋ nâ á dik ntʉ́ghi édî njí.#1 Sam 21.1-7.#Mbín 24.9. 5To é rî fə́ne ka ebhín í Mosis sê, kpe bhaghé ofú oyoá-biji akará-agore mba á yíma etûm ka ókʉ́rí achot Obhasi á kí gboghâ ebhín ofú oyoá-biji, kən á bhó səre sê á gbo?#Mfana 28.9-10. 6N kí səre ên mân bəre nne yót a ri mfá, nnyo a faŋê a chíŋi ókʉ́rí achot Obhasi. 7Obhasi a toê se, ‘Ń ka wóm ekəp. Nji n wóme a ri nsôn na ntem-nne.’ Ájoé ó tʉri ogyʉ́rí ên achot mmá, kə́n ó bhó səre ên sê nne a gbô nji á ka gbo ka etʉri.#Mat 9.13; Ose 6.6. 8Məŋê ên mân sê Mmon-i-ntem-nne a ri Ntûfâm ofú oyoá-biji.”

Jisos a yîm nne nnyo á maŋá ékpoê-obhô a sôn

(Mak 3.1-6; Luk 6.6-11)

9Jisos a mághe mân eji áji, á jî gyê ka óchâm Obhasi ane mbá. 10Nne yót a ri áfo nnyo obhô obhê ó kpo. Ane mba tat á rî áfo mba á nóra sê á nyére Jisos nchot sê a yîm ejûm obhí. Á bhə̂p mân yê sê, “Ebhín ejə́ré é kare ikom sê nne a yim nne emaŋé a son ka ofú oyoá-biji a?”

11Jisos a táme ábho se, “É kó sê nne owəné yót a fôn mbúi nnyi a gboê ka ébhírí ka ofú oyoá-biji, o kí yim nan? Ó bhó bhi obhô o yíghi ńnyə́ne a?#Luk 14.5. 12Ó riŋi ên sê nne a fâŋ a chíŋi mbúi ntə̂m esam ntə̂m ekû. Áno mân ebhín ejə́ré é kam sê é yim ono ka ofú oyoá-biji.”

13A kpíghi mân a sə́re nne-emaŋé nnyó se, “Nyabhê obhô obhâ.” Nne nnyó a nyábhe fə́ne, obhô ó sôn noŋ mbi ngá. 14Ebhú a yimî nne nnyó a sôn, ane echəme Farasi mbá á mághe á jî ekubhi ekpak nji á kí yui Jisos.

Jisos nâ nne-etûm nnyo Obhasi a sáŋe

15Nji Jisos a yúghi ńtimî nnyi ane Farasi á fóne na yê, a mághe eji áji. Ane etî-etî á tôp yê á jak. Jisos fə́ne a yîm ábho chénchén mba á máŋa omaŋé á sôn. 16A tʉ̂ ábho obhô ka otûŋ se a kâ yîm ane á mə́ŋe ekpak í nne nnyo yê a ri. 17Nchot nnyí a fâp fə́ne ka ekpak nji nkara-otîp Obhasi nnyo á kamá se Asaya a séŋe se,

Obhasi se,

18“Ḿfa nâ ḿgbán nnyo n sáŋe, ḿgbán nnyo n korê.

Ka obhô obhê, n kí fon ekpatə́m ogyebhá-ḿbə́ŋé.

Tîk n káre yê ńtʉgântʉ amé.

Yê fə́ne nâ a kí yim ngun ndə́m á mə́ŋe ekpak nji

n kí taŋ ábho.

19Kən yê tîk á bhó gye áfírí, a kúghá,

ane á bhó yuk eyum ejê ka éré.

20Tîk á bhó maghé ane mba á rî ka oseŋe.

Tîk a tóŋe onobhá-eji mbâ ane mba á ká fap mbiŋ.

Tîk a yîm tata oyima-ejûm ka nnyen-i-mbá

ó kó érûm ka ngun nnyí.

21Ngun ndə́m tîk á kî ḿbə́ŋé na yê.”#Asa 42.1-3.

Obhasi Ebhare Ntʉgantʉ nâ a karê Jisos ikom, Besebup asík

(Mak 3.20-30; Luk 11.14-23)

22Ane etat á kô nne yót nnyo mbá á bhó yen, nchot á bhó chot, ka ojê ó kará yê oseŋe, á bhak mbâ Jisos sê a yim yê a son. Jisos a yîm nne nnyó a róghe mbá eyéném, a chorá nchot. 23Biji í kpô chénchén ane mba á rî áfo. Á kí bhəp atem sê, “Nâ mmon i Debhit i nchane nná tîk?”

24Kən ane echəme Farasi á kpó to á yúk nchot nnyí, á róghe egəmə́m sê, “A ri Satan nnyo é bhíŋa se Besebup nâ a karê yê ikom kən a kí yighí ojê ka ḿbə́ŋé ane.”#Mat 9.34; 10.25.

25Kən Jisos a mə́ŋe nji é rî ábho ka ḿbə́ŋé, a sə́re ábho se, “Kpe mbə́n otúi eték mbi ó kirí ka ngûm ka ngûm, ḿbâ á noghá na atem, ḿba á noghá na ḿbâ, otúi ábhi ó bhó gyimi. Kpe ndə́p-i-njû nnyə́n nnyi a kirî, á noghá na atem, ndə́p-i-njû ányi a kí chat. 26Ájoé mân otúi Satan ó kirí ka ngûm ka ngûm, ó noghá na atem, ó kí gbo. 27Ájoé ń yighá ojê na ikom í Besebup, ane mba á tóbha ên mân aŋ? Yên mân ane mba á tóbha ên á tóŋe jáé sê ó gbo ên. 28Kən ájoé ń yighá na ikom Obhasi Ebhare Ntʉgantʉ, nâ məŋé mân sê otúi Obhasi ó jen ó si ên.

29“Kpe nne yót cháŋ nnyo a kí wa njû mgban a gyê a jʉ̂ iyîm ibhê nji á ka raŋ mbá kpá a fi yê a bhóp.

30“Nne kpe nnyón nnyo cháŋ njəm amé, a ri nne ebhan omé. Nne nnyo á ka kak ə̂m obhô é chúi, a ri nne achât.#Mak 9.40. 31Ka obhô mbí, n kí səre ên bəre Obhasi kə́n a rî nsôn a sû chénchén obhí mbi ane ngun á yíma ka nchot i nnyo ábho na ka oyima-ejûm. Kən nne nnyo á chot ejûm ebhí a kpê na Obhasi Ebhare Ntʉgantʉ, Obhasi á bhó ri yê nsôn. 32Kə́n a rî nsôn a gyíni nchot mbí kpe nnyə́n nnyi nne a chorê a kpê na Mmon-i-ntem-nne, kən nnyi á chot a kpê na Obhasi Ebhare Ntʉgantʉ, á bhó ri nsôn, kpe ka mfá-mfá, kpe ka nsígha-njəm ebhú.”#Luk 12.10.

O kí məŋé étí ka nkap eye

(Luk 6.43-45)

33“Kən nne a fon nnyen i nkap ka étí, étí áji é rî é jóe nono. Étí nkap é ro joé nono, nkap eye fə́ne á bhó nop. Ane á kí riŋí étí ka nkap nnyi a kí dʉ ka ńjə́ne.#Mat 7.20; Luk 6.44. 34Abhon efomnté iyîm ane! O kí yim ên nan ó chôt ên nchot nnyi no nji ên áfoné a ri ane abhí? Nji é kí fap nne ka nnyo nâ nji é rî yê ka ḿbə́ŋé.#Mat 3.7; 23.33; 15.18; Luk 3.7; 6.45. 35Nne nno á bhak na íkíkéré ino mfi í dʉ̂ ka achot ano mma á rî yê ka ḿbə́ŋé. Nne mbí á bhak na íkíkéré ibhí mfi í dʉ̂ fə́ne ka achot abhí mma á rî yê ka ḿbə́ŋé. 36Deê ń sə́ré ên bəre ka ofú Obhasi a kí taŋ ngun, kpe énê a kí tame ebhə̂p ka nchot kpe nnyə́n nnyi a dʉ nne ka nnyo. 37Nji é fábhe wâ ka nnyo nâ á kí ko á tâŋ esup ejâ, á mə́ŋe ájoé ó gbo, na ó ka gbo.”

Sê Jisos a tóŋé eriŋ nji Obhasi a ri na yê

(Mak 8.11-12; Luk 11.29-32)

38Etʉ̂ atóŋá-ebhín na ane echəme Farasi mba tat á sə́re mân Jisos sê, “Ńsé, e kí wom ó yîm eriŋ okpógha-biji kpe jə́t é yén.”#Mat 16.1; Mak 8.11; Luk 11.16.

39Kən Jisos a táme se, “Abhon ebhú njí, obhí jen? Obhasi á bhó fup, á kí bhəp sê á tóŋe ábho eriŋ Obhasi. Kən kpe jə́t á bhó toŋe é ká chiŋi nji Jona nnyo nkara-otîp Obhasi.#Mat 16.4; Mak 8.12. 40Ekpak nji Jona a káe ka oya nsí nyúp, mfín ésá nâ noŋ fə́ne Mmon-i-ntem-nne a kí ka ka etím í nsi.#Jona 1.17. 41Ka ofú ngun etáŋám, ane Ninefa á kí gyimi á sə́re sê ó gbo ên. Echî aŋ? Ebhú á yúghi okpígha-ejûm í Jona, á mághe obhí ábho. Kən deê mân ń sə́ré ên bəre nne a ri mfá nnyo a faŋê a chíŋi Jona.#Jona 3.5. 42Ka ofú ngun etáŋám, ntûfâm i nne-nkáé nnyo a dʉ óséré tîk a gyími a sə́re se ó gbo ên. Echî aŋ? Yê a jenê a síghi ngun ofaré, a bhá yuk okpígha-ejûm í Soromon. Kən deê ń sə́ré ên bəre nne nnyo a faŋê a chíŋi Soromon a ri mfá.”#1 Atúi 10.1-10; 2 É fâp 9.1-12.

Ebhú ojê ó kí chəbhé njəm ó gyé ka biji nne

(Luk 11.24-26)

43Jisos se, “Ebhú ojê ó maghé nne, ó kí kət ó bhuŋa, ka óráné-ngun ó woma eji ekâ. Ájoé ó ká yen, 44ó kí ta biji etí ó chə́bhe njəm ka njû eye nnyi ó mághe. Ojê mbí ó chəbhé njəm ó yên njû nnyí nne cháŋ, á tʉri á fak. 45Ó kí chəbhé njəm ó jî kô atem anígisá mba á bhíbhi á chíŋi yê ḿfoné, á bhâ kúmi ka njû nnyí. Ojê mbí chénchén ó roghe ekumúm ka ḿbə́ŋé nne nnyó yót, é kí bhip mân na nne nnyó é chíŋi ndaŋa-mbá. Nâ noŋ é kí joé na abhon ebhú njí ka obhí ábho.”

Ḿban nâ á rî nnyen na abhon-í-nnyen í Jisos?

(Mak 3.31-35; Luk 8.19-21)

46Nji Jisos a nyə́ne a chorá na ane mbá, nnyen owe na abhon-í-nnyen abhê á bhâ gyími ka éré sê á bhîŋ yê a bhá. [ 47Nne yót áfo a sə́re Jisos se, “Nnyen owa na abhon-í-nnyen abhâ, á rî ka éré á kí wom á yén wâ.”]

48Kən Jisos a táme ábho ka ebhə̂p se, “Nnyón nâ ó bhiŋá ên sê nnyen omé, abhon-í-nnyen abhámé nâ mbán?”

49A tóŋe obhô a fáre ane mba á tóbha yê a chôt se, “Ḿfa nâ nnyen omé na abhon-í-nnyen abhámé. 50Kpe énê nnyo a kí yim ekpak nji Ńsé omé ka ósô a wóme, ntʉ́ghi nne ányo a ri mmon-i-nnyen omé na nnyen.”

Đang chọn:

Matiyu, echî 12: ETUNT

Tô màu

Chia sẻ

So sánh

Sao chép