लुका 16
16
चलाक बेबस्तापक
1तब येसुले आप्न चेलासिका दस्रो उखान सुनाइल्के, “एक जना धनिक मान्खक घरम एगो बेबस्तापक छले। उ बेबस्तापक्ले तोर सम्पति उराइतिछो कहिक मानुकस्या मालिकका सुनाइ देल्के। 2ओहेस मालिकले बेबस्तापक्का बलाइक कहल्के, ‘तोर बारेम हम यि कथि सुन्ति स्यो? तोरा हम जुन कामक जिम्मा देल छल्यो, उ सभेक हिसाप हम्रा दे। किरकि आब् हम तोरा हम्र घरक बेबस्तापक नाइ राख्बो।’ 3मालिकक बात सुनिक बेबस्तापक्ले मन-मने एनामे सोच लग्ले, ‘आब् हम कथि करुँ? मालिकले हम्रा बेबस्तापकक कामस निकाल्ति छो। खोन-जोत कर लागि हम्रा बल नाइ छो अनि भिख माङ हम्रा लाज लग्छो। 4ए, आब् हम एना कर्बो, जुन काम कर्त खुमा मालिकले हम्रा कामस निकालि देतो तैयो मानुकस्या हम्रा आप्न घरम स्वागत त कर्तो।’ 5ओहेस उ बेबस्तापकले मालिकलगस कर्जा लेल्हार एक-एक जनाका बलाइल्के आ सुरुम आइलाहारका पुछल्के, ‘तुइं हम्र मालिकका कतेक कर्जा तिर पर्लाहार छो?’ 6ओइले उत्तर देल्के, ‘तिन हजार लिटर तेल।’ तब बेबस्तापकले ओक्रा कहल्के, ‘तोर तमसुक ले आ झप्सिन ओइम पन्द्र सइ लिटर निख्।’ 7तब उ बेबस्तापकले दस्रोका पुछल्के, ‘तोरा चाहिं हम्र मालिकका कतेक कर्जा तिर पर्लाहार छो?’ ओइले उत्तर देल्के, ‘पाँच सइ मुरि गोहम।’ ओक्राहु बेबस्तापक्ले कहल्के, ‘तोर तमसुक ले आ ओइम चार सइ मुरि निख्।’ 8मालिकले उ बैमान बेबस्तापकक चलाखि देखिक ओक्र तारिफ करल्के। किरकि पर्मेसोरका नाइ चिन्लाहार यि सन्सारक मानुकस्या अरु मानुकसिसङ बेबहार कर्त खुमा पर्मेसोरका बिस्वास कर्लाहार मानुकसिस चलाक हेतो।
9“ओहेस हम तोर्सिका कह स्यो, सन्सारक धनस मानुकसिका सहयोग करिक आप्न लागि सङ्सब बना। किरकि जब तोर्स्या यि सन्सारस जेब त पर्मेसोरले तोर्सिका सोर्गक घरम स्वागत कर्तो। 10जुन मानुक कन्कि बातम इमान्दार रहतो, उ बर्कि बातम पनि इमान्दार हेतो। अनि जुन मानुक कन्कि बातम इमान्दार नाइ हेतो, उ बर्कि बातम पनि इमान्दार नाइ हेतो। 11ओहेस तोर्स्या सन्सारक धनम इमान्दार नाइ हेब त सोर्गक धन तोर्सिका कोन देतो? 12तोर्स्या पर्मेसोरले देल धनका इमान्दार भइक नाइ चलाइब त पर्मेसोरले पनि तोर्सिक आप्न साँच्चेक धन तोर्सिका नाइ देतो।
13“कुन्हुँ नोकरले दुइगो मालिकक सेबा कर नाइ सक्तो। ओइले कि त एक जनाका मयाँ करिक दस्रोका घिलाइतो, कि त एक जनाका इज्जत दैक दस्रोका हेला कर्तो। एनाहिमे तोर्स्याहु पर्मेसोर आ धन दुनुक सेबा कर नाइ सक्ब।”#मत्ति ६:२४
येसुक अरु सिछ्यासब
(मत्ति ११:१२-१३; ५:१८,३२)
14यि बात सुनिक फरिसिस्या येसुक खिसि करल्के किरकि ओकर्स्या लोभि छले। 15ओहेस येसुले ओकर्सिका कहल्के, “तोर्स्या मानुकसिक अगाम धर्मि बनिक त देखाइछ तर तोर्स्या केहेन स्या कहिक पर्मेसोरले तोर्सिक मनक बात जान्छो। किरकि जुन चिज मानुकसिक लागि बेसि मोलक छो, उ पर्मेसोरक नजरम घिल लग्लाहार स्यो।
16“मोसाले देल नियम आ अगमबक्तासिक सिछ्या बप्तिस्मा देल्हार युहन्नाक समै तलिक पर्चार भेलो। ओहे जुमास पर्मेसोरक राज्येक खुसिक खबर पर्चार हब्ति छो आ सभे जना ओइ राज्येम जाइ लागि बल कर्ति छो।#मत्ति ११:१२,१३ 17अकास आ पिर्थिबि बिलाइक जाइ सक्तो तर धर्मसास्तरम निख्ल एगो थोप्ला पनि बिना पुरा भइक नाइ ओराइतो।#मत्ति ५:१८
18“जुन मानुकले आप्न बहुका छोरिक दस्रो जनिका बिह्या कर्तो, ओइले बेभिचार कर्छो। अनि जुन मानुकले साँइले छोर्ल जनिका बिह्या कर्तो, ओहोले बेभिचार कर्छो।”#मत्ति ५:३२; १ कोरन्थि ७:१०,११
धनिक मानुक आ लाजरस
19येसुले फेरि कहल्के, “एक जना धनिक मानुक छले। ओइले सब्दिन महङ आ छग्बर-छग्बर कप्रासब पिन्हिंक मौज-मज्जा करिक जिबन बिताइत छले। 20मानुकस्या ओक्र घरक मुह्राम एक जना गरिब आ देहेभोरि घाबेगो भेल लाजरस कहलाहार मानुकका आनिक राखि दिएक। 21ओइले धनिक मानुकले खाइत खुमा झर्ल डुठा-कुठा खाइ पाइबो कि कहिक ताक्ति रहत छले। ओइ उप्रिम कुत्तास्या पनि आइक ओक्र घासब चाटि दिएक। 22एक दिन् उ गरिब लाजरस मोर्ले। अनि सोर्गदुतस्या ओक्रा लगाइक अब्राहामक काटम राखि देल्के। पछास उ धनिक मानुक पनि मोर्ले त मानुकस्या ओक्रा गारि देल्के। 23अनि उ धनिक मानुकले नरकम दुखस छट्पटाइत जुमा नजर उठाइक ताकल्के त अब्राहामक काटम लाजरसका देखल्के। 24ओहेस ओइले चिच्च्याइक एनामे कहल्के, ‘गे बाप अब्राहाम, हम्रा दया करिक लाजरसका आप्न हाथस पानिक एक थोपा हेतो तैयो हम्र मुहम चुवाइक हम्र जिका जुर कर लागि पठाइ धि किरकि हम यि आगिम छट्पटाइति स्यो।’ 25तर अब्राहामले ओक्रा कहल्के, ‘बेटा, एक बाजि याद कर्, तुइं सन्सारम रहत खुमा सुखे-सुख पाइल तर लाजरसले दुखे-दुख पाइल्को। ओहेस आब् उ एत सुखम छो आ तुइं दुखम। 26यि सभे बातका छोरिक, एतस कुन्हुँ ओत आ ओतस कुन्हुँ एत आब नाइ सकुस कहिक तोर आ हमर्सिक बिचम गद-गद गहिंर खद्रा छो।’ 27तब धनिक मानुकले कहल्के, ‘ओना स्यो त गे बाप, हम तोरा बिन्ति कर्स्यो, लाजरसका हम्र बापक घर पठाइ धि। 28ओइले जाइक हम्र पाँच जना दाजुभाइका एतको सभे बात सुनाइक चेताबनि दिउस, नत्रे त ओकर्स्याहु यि नरकम एतो।’ 29तर अब्राहामले कहल्के, ‘ओकर्सिसङ मोसा आ अगमबक्तासिक किताप छिति छो, ओकर्स्या ओहे सुनुस।’ 30तब धनिक मानुकले कहल्के, ‘गे बाप अब्राहाम, ओकर्स्या ओनामे नाइ सुन्तो। तर कुन्हुँ मोर्ल मानुक जिउँत भइक ओकर्सिलग जेतो त ओक्र बात सुनिक ओकर्स्या पस्चताप कर्तो।’ 31तर अब्राहामले कहल्के, ‘मोसा आ अगमबक्तासिक बात नाइ सुन्लाहारले मोर्ल मानुक जिउँत भइक जेतो तैयो ओकर्स्या ओक्र बात बिस्वास नाइ कर्तो।’”
Đang chọn:
लुका 16: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
