लुका 15
15
हराइल भेराक उखान
(मत्ति २८:१२-१४)
1एक दिन् थुप्रे कर् उठाइलाहार आ पापिसब येसुक बचन सुन लागि येसुक लगम एले त,#लुका ५:२९,३० 2कुन्हुँ-कुन्हुँ फरिसि आ धर्मगुरुस्या एना कहति गन-गनाब लग्ले, “यि मानुकले त पापिसिका स्वागत कर्छो आ ओकर्सिएसङ बेठिक खाइछो।” 3ओहेस येसुले ओकर्सिका यि उखान कहल्के,
4“तोर्सिभोरिम कोन एहेन रहतो, जक्र एक सइगो भेराम एगो हराइतो त उनान्सइगो भेराका चरनेम छोरिक हराइल भेराका नाइ भेट्ल तलिक खोज्ति नाइ रहतो? 5अनि जब ओइले भेटाइतो त उ खुसिस लबर्ति ओक्रा आप्न काह्नम बोकिक घर आन्तो, 6आ आप्न सङ् आ परोसिसिका बलाइक कहतो, ‘तोर्स्या हम्रसङ लबर किरकि हम हराइल भेरा फेरि पाइल्यो।’ 7हम तोर्सिका कह स्यो, पस्चताप कर नाइ पर्लाहार उनान्सइ धर्मि मानुकसिस पस्चताप करिक पर्मेसोरभर घुमिक आइर्लाहार एक जना पापिक लागि सोर्गम खुसि मनाइतो।
हराइल चाँनिक डलरक उखान
8“ओनाहिमे कुन जनि एहेन रहतो, जक्र दसगो चाँनिक डलरम एगो हराइतो त ओइले दिब्याका बारिक नाइ भेट्ल तलिक घरका अस्लिमे बाहारिक नाइ खोज्तो? 9अनि जब ओइले हराइल डलर पाइतो त आप्न सङ् आ परोसिसिका बलाइक कहतो, ‘तोर्स्या हम्रसङ लबर किरकि जुन चाँनिक डलर हम्र हराइल छलो, उ हम पाइल्यो।’ 10हम तोर्सिका कह स्यो, एनाहिमे पस्चताप कर्लाहार एक जना पापिक लागि पर्मेसोरक सोर्गदुतसब खुसिस लबर्तो।”
हराइल बेटाक उखान
11तब येसुले दस्रो उखान कहल्के, “एक जना मानुकका दुइगो बेटा छले। 12एक दिन् ओक्र छोट्का बेटा आइक एनामे कहल्के, ‘गे बाप, सभे धन-सम्पतिका बख्रा करिक हम पाइलाहार बख्रा हम्रा दे।’ ओहेस बापले आप्न धन-सम्पति दुनुगो बेटाका बख्रा करि देल्के। 13बख्रा भेल कनेके दिनक पछा ओक्र छोट्का बेटाले आप्न बख्राम पर्ल सभे सम्पति बेचल्के आ ढेवा लइक बर्कि दुरिक देसम गेले। अनि ओइलग मौज-मस्ति करिक आप्नसङ भेल सभे ढेवा ओराइल्के। 14ओक्रसङ भेल सभे ढेवा ओराइले जुमा ओइ देसम बर्कि अनिकाल पर्ले। अनि ओक्रा खाइ पिअ लागि पनि मस्किल भेले। 15ओहेस उ ओइ देसक एक जना मान्खक घरम काम कर लागि रहले। अनि ओइ घरक मानुकले ओक्रा आप्न खेतम सुगुर चराब पठाइल्के। 16पछास ओक्रा बर्कि घार भुख लग्ले त ओइले सुगुरस्या खाइलाहार चिजसब खाइक पेट भोर्लाहार इच्छा करेक किरकि ओक्रा कुन्हुँले खाइलाहार चिज नाइ दिएक। 17पछास ओक्र होस खुजल्ले त एनामे सोच लग्ले, ‘हम्र बापक घरम नोकरस्या पेट भोरिक खाइक पनि उभर्छो तर हम चाहिं एत भुखस मोर लग्ल स्यो। 18ओहेस आब् हम आप्ने बापलग घुमिक जेबो आ कहबो, “गे बाप, हम पर्मेसोर आ तोर बिरोधम पाप कर्ल स्यो। 19आब् हम तोर बेटा कहलाहार लायकक नाइ स्यो। ओहेस तुइं हम्रा आप्न घरम नोकर राख्।”’ 20तब उ उठ्ले आ आप्न बापलग गेले। बापले भले दुरिस बेटाका आब्त देखिक थुप्रे मयाँ लग्ले। ओहेस बाप दोग्ति गेले आ होकार बाह्निक चुम्मा लेल्के।
21“अनि बेटाले बापका कहल्के, ‘गे बाप, हम पर्मेसोर आ तोर बिरोधम पाप कर्ल स्यो। ओहेस आब् हम तोर बेटा कहलाहार लायकक नाइ स्यो।’ 22तर बापले नोकरसिका बलाइक एनामे कहल्के, ‘तोर्स्या झप्सिन जो आ सभेस अस्लि कप्रा आनिक एक्रा पिन्हाँ। एक्र अङ्रिम अङ्ठि आ टाङम जुत्ता पिन्हाँ। 23अनि सभेस मोटाइल पसुका काटिक भोज तयार कर्। अनि आपन्स्या खाइक खुसि मनाब पर्तो। 24किरकि यि हम्र बेटा मोर्ल छलो तर फेरि जिउँत भेल छो, हराइल छलो तर फेरि भेट्लो!’ तब ओकर्स्या खाइति खुसि मनाब लग्ले।
25“उजुमा ओक्र जेठ्का बेटा खेतम छले। जब उ खेतस घुमिक घरलग पुग्ले त ओइले बजा बजाइक रमाइलो कर्ल सुनल्के। 26ओहेस ओइले एक जना नोकरका बलाइक, ‘यि कथि हब्ति छो?’ कहिक पुछल्के। 27तब उ नोकरले कहल्के, ‘तोर छोट्का भाइ अस्लिए घुमिक आइल कारनस तोर बापले बर्कि मोटाइल पसु काटिक भोज देल छो।’ 28यि बात सुनिक उ एक्दम पिटाइले आ घर भित्रि पनि जाइ लागि मन नाइ करल्के। ओहेस ओक्र बाप बाहार आइक ओक्रा सम्झाब लग्ले। 29तर ओइले बापका एनामे कहल्के, ‘हम एतेक बरिस तोर सभे बात मानिक तोर सेबा कर्ल्यो। तैयो तुइं हम्रा आप्न सङ्सिसङ मिलिक खुसि मनाब लागि एगो बक्रिक पथ्रु पनि नाइ देल। 30तर तोर सम्पति बेस्यासिसङ उराइलाहार बेटा आब्त खुमा चाहिं तुइं सभेस मोटाइल पसुका काटिक भोज धिल।’ 31तब बापले ओक्रा कहल्के, ‘बेटा, तुइं त हम्रसङ सब्दिन छिति स्या आ हम्र भेल सभे सम्पति तोरे स्यो। 32तर आजु आपन्स्या खुसिस लबर्लाहार दिन् स्यो किरकि यि तोर भाइ मोर्ल छलो तर फेरि जिउँत भेल छो, हराइल छलो तर फेरि भेट्लो!’”
Đang chọn:
लुका 15: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
