लुका 17
17
पाप आ छेमा
(मत्ति १८:६-७,२१-२२; मर्कुस ९:४२)
1पछास फेरि येसुले आप्न चेलासिका कहल्के, “मानुकसिका पापम फसाइलाहार बातसब त एबे कर्तो तर धिक्कार छो ओक्रा जुन मानुकक कारनस उ एतो। 2जुन मानुकले एगो कम्जोर मानुकका पाप कर लगाइतो, ओहोन मानुकका त घेचम जँता बाह्निक समुन्द्रम फेकि देल अस्लि हेतो। 3ओहेस होसियार रह। तोर भाइले पाप कर्तो त ओक्रा सम्झा। अनि ओइले आप्न पापका सुइकार करिक पस्चताप कर्तो त ओक्रा छेमा कर्।#मत्ति १८:१५
4“तोर भाइले तोर बिरोध करिक दिनम सात बाजि पाप कर्तो आ सातो बाजि तोरलग आइक छेमा माङ्तो त ओक्रा छेमा करि धि।”
बिस्वास
5तब पेरेरितस्या प्रभुका कहल्के, “प्रभु हमर्सिक बिस्वासका बराहि देन।”
6अनि प्रभुले ओकर्सिका कहल्के, “तोर्सिक बिस्वास एगो राइ सागक दुम्हाँ सनक रहतो त यि तुइंतक गाछ्का ‘उँख्रिक समुन्द्रम रोपि जो’ कहब त ओइले मान्तो।
नोकरक जिम्मेबारि
7“तोर्सिभोरिम कोन आप्न नोकर खेतम हर जोतिक कि भेरा चराइक घर एतो त ओक्रा ‘अगा खनाइ खो’ कहिक कहतो? 8बरु ओइले एनामे पो कहतो, ‘तुइं जाइक हम्र लागि खनाइ तयार कर् आ कप्रा फेर अनि हम खाइक नाइ सक्ल तलिक हम्र सेबा कर्। जब हम खाइक सक्बो तब तुइं खाह्य।’ 9पछास हम्र अराहिल काम करल्को कहिक कथि मालिकले नोकरका धन्येबाद देछे झन? 10ओनाहिमे जब तोर्स्याहु अराहिइल काम पुरा कर्ब त एना कह्य, ‘हमर्स्या त एगो नोकर मत्रे स्यो। हमर्स्या त आप्न जिम्मेबारि मत्रे पुरा कर्ल स्यो।’”
येसुले दस जना कुस्टरोगिसिका अस्लि कर्ल
11येसु यरुसलेम सहर जाइत खुमा सामरिया आ गालिल पर्देसक सिमानाबाक जाइति छले। 12जब येसु एगो गाँमम ढुक लग्ले त दस जना कुस्टरोगिस्या येसुका देखिक एले आ कनेक सना हट्ले ठेर्याइक, 13कस्याइक एनामे कहल्के, “हे येसु, हे गुरु, हमर्सिका दया कर्।”
14तब येसुले ओकर्सिभर ताकिक एनामे कहल्के, “तोर्स्या जो आ पुजारिका देखा।” ओकर्स्या जाइति-जाइति पैराइम अस्लि भेले।#लेबि १४:१-३२
15ओकर्सिभोरिम एक जनाले आप्न अस्लि भेल देखिक बर्कि घार पर्मेसोरक पर्संसा कर्ति घुमिक एले, 16आ येसुक टाङम गोरलाग्ति येसुका धन्येबाद देल्के। उ घुमिक आइलाहार मानुक चाहिं सामरिया पर्देसक छले। 17अनि येसुले ओक्रा पुछल्के, “तोर्स्या अस्लि भेल्हार दस जना नाइ छल झन? आरो नौ जना खोइ त? 18कि यि सामरि बाहेक अरुले पर्मेसोरका धन्येबाद दिअ लागि जरुरि नाइ सम्झल्को कि कथि?” 19तब येसुले ओक्रा कहल्के, “तुइं उठ् आ जो। तोर बिस्वासले तोरा अस्लि कर्ल छो।”
पर्मेसोरक राज्येक बारेम
(मत्ति २४:२३-२८,३७-४१)
20एक दिन् फरिसिस्या येसुका पर्मेसोरक राज्ये कह्या एतो कहिक पुछल्के त येसुले जबाफ देति ओकर्सिका एनामे कहल्के, “पर्मेसोरक राज्ये आँखिस देखाइलाहार रुपम नाइ एतो। 21कुन्हुँले पर्मेसोरक राज्ये ‘देख्, एत छो, देख्, ओत छो’ कहिक कह नाइ सक्तो किरकि पर्मेसोरक राज्ये त तोर्सिएक बिचम छो।”
22तब येसुले आप्न चेलासिका कहल्के, “एहेन समै आब्ति छो, जब तोर्स्या मानुकक बेटाले राज कर्ल एको दिन् देख पाइते त हेते कहिक कहब तर देख नाइ पाइब। 23उजुमा मानुकस्या तोर्सिका कहतो, ‘देख्, पर्मेसोरक बेटा एत छो, देख्, ओत छो।’ तर तोर्स्या ओकर्सिक पछा-पछा नाइ जाह्य। 24किरकि जेनामे अकासम बिज्लि चम्कत खुमा अइ काटस ओइ काट तलिक इजोत हब्छो, ओनाहिमे मानुकक बेटा पनि आप्न दिनम आब्त खुमा सभे मानुकस्या देख्तो। 25तर यि हबस अगा मानुकक बेटाका थुप्रे दुख भोग पर्तो आ यि पुस्ताक मानुकस्या ओक्रा इन्कार कर्तो। 26जेनामे नोआक समैम भेल छलो, मानुकक बेटा आइलाहार दिन् पनि ओहोने हेतो।#उत्पति ६:५-८ 27जुन दिन् तलिक नोआ पानि जाहाजम चहर्ल नाइ छले, उ दिन् तलिक मानुकस्या खाइति-पिति आ बिह्या-बारि कर्ति छले। तर पछास बर्कि बाहार एले आ सभेका नास करल्के।#उत्पति ७:६-२४ 28लोतक समैम पनि ओनाहिमे भेल छलो। मानुकस्या खाइति-पिति छले, बेपार कर्ति छले, खेति कर्ति छले आ घरसब बनाइति छले।#उत्पति २८:२०; १९:२५ 29तर जुन दिन् लोतले सदोम सहरका छोरिक निकल्ले, ओहे दिन् सोर्गस आगि आ गन्धक झरिक सभेका नास करल्के। 30मानुकक बेटा पर्कट भेल्हार दिन् पनि ओहोने हेतो।
31“उ दिन् घरक छतम भेल्हार्स्या आप्न समान लिअ लागि घर भित्रि नाइ जाउस। ओनाहिमे खेतम भेल्हारसब पनि घुमिक घर नाइ जाउस।#मत्ति २४:१७,१८; मर्कुस १३:१५,१६ 32लोतक बहुका कथि भेल छलो, उ बातका याद् कर्।#उत्पति १९:२६ 33जुन मानुकले आप्न जिबन बचाब खोज्तो, ओइले जिबन गुमाइतो। तर जुन मानुकले आप्न जिबन गुमाइतो, ओक्र जिबन चाहिं बच्तो। 34हम तोर्सिका कह स्यो, उ रात दुइ जना एगो बिछोनाम सुत्ल रहतो। एक जनाका लगाइतो आ दस्रोका छोरि देतो। 35दुइ जना जनिस्या सङि जँताम पिस्ति रहतो। एक जनाका लगाइतो आ दस्रोका छोरि देतो। 36[ओनाहिमे दुइ जनाले खेतम काम कर्त रहतो। एक जनाका लगाइतो आ दस्रोका छोरि देतो।”]
37तब चेलास्या येसुका पुछल्के, “हे प्रभु, यि कत हेतो?”
येसुले जबाफ देल्के, “जत सिनो रहतो, ओति गिधसब धेर्याइतो।”
Đang chọn:
लुका 17: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
