Yohana 16
16
1“M̀ jan gu nye be fwa ena afwa ende akan a du nye, nya tswafù ngge nye twa a gwa chaebi mo nye. 2Ba nyo nye a vǝ́ a je mo be àtá chuefǝnm. Eshwen, engga akan nyabwa atan a egwa egwa e gu nye anga, a ka jan ge bwe anga mò a Ehwya dgyan anga. 3Ba bwe be yishwa mò e dwana adia be chà yi be Àtà hon ra, eno e ra a me. 4M̀ jan ara nye be fwa ena evǝa ano ekpengga mo be bwa ara, nye e ka e ben jan m̀ twa ara nye echa a chu mo be. M̀ jan m nye be fwa ena ekwafya ra, adia m̀ no abibi ngge nye.
Mochi mo Engǝ́ Echanwenwen hon
5“Tea asuswana m twabǝ nya anga a zǝn ende éè tson m bwa ángá. Tea ben ye ende akan mo nye e ká m eka jan, ‘Zǝn a o nya anga, a che ra?’ 6Tea, adia m̀ jan ara nye be fwa ena ángá, tsuruku mo nye bgen no àywá. 7Tea m jan nye ebi anga, enyam mam a no m mò esese a zǝn nye adia Ebwejwa hon a bwa ye a zǝn nye ra, kpwà tén ano m nya ara. Ano m ken ara, ma tson ye a bwa a zǝn nye. 8Atan a Ejanjwa hon bwa ara ángá, ge fi a jan be nobǝ a tswa zǝnchaje jan be dan ara a chu abu ebgen, ngge a chu mò a Ehwya dgyan tangge abu Ehwya a kpèn be nobǝ kǝn ángá. 9A chu ebgen, adia a be tsǝ́ be ekǝ̀n a chu m ra. 10A chu mò esese ebwem, adia m nyaken a zǝn Àtà hon, zǝn a nya di m efwe ra. 11Ngge a chu kǝ́n ekpènm, adia Ehwya kpèn fwa ara tì mo zǝnchaje ena kǝ́nfǝ.
12“M chà no ngge be fwa àywá a ma jan nye, tea nye bon a ti nye ekǝ̀n a chu be asuswana ra. 13Atan a, a ge, Engǝ́ mo ebi hon bwa ara, ga dgon nye na tú nye binbin mo ebi, adia ga jan ye fwa mo chu ye ra, ge jan a kpwà mò a ge fo ngge mò e bwa a bwe chafya ángá. 14Ga no m egǝ̀n adia ga cha chí mam ti a jan nye. 15Binbin be mò e no ḿ mo Àtà hon ángá, no ḿ mam. Eni a mò e bwe m jan Engǝ́ hon a kpu be mò e no ḿ mam, kpu a jan nye ángá.
16“A ti ye be tsǝnò àywá ra, nya di m efwe ra, kǝnggwa chashin mo ekpengga nwofyan, nya di m efwe.”
Tsuruku ebgen mo be etsonchi twanga a no etenten
17Be etsonchi mbwe ya ehwyà è ká sojube eka jan, “Engà mo mò a ge jan, ‘A ti ye be tsǝnò àywá ra, nya di m efwe ra, kǝnggwa chashin mo ekpengga nwofyan, nya di m efwe’, ángá a ano? Efwe engà mo mò a ge jan, ‘M nyaken a zǝn Àtà hon,’ ángá a ano?” 18Bè no kpwà adi eka ekam e sojube jan, “Engà mo mò a ge jan, ‘A ti ye be tsǝnò àywá ra’, a ano? Je foyi je fwa a ge jan anga na ra.”
19Yeso è yi ara jan be etsonchi mbwe e nda anga be e ká ye eka a chu fwa ena. Enona, gè jan be jan, “Nye no ká sojunye eka anga a chu engà mo fwa a m jan, ‘A ti ye be tsǝnò àywá ra, nya di m efwe ra, ngge a ti ye be tsǝnò àywá ra, nya di m efwe, ángá a ano’? 20Ebi m jan nye anga, nya kǝndwafǝ ngge nya ebgenm, tea be nobǝ mo zǝnchaje a no a tswa vǝtsen. Nya bgen nya, tea nya ebgenm mo nye twanga bwa a no vǝtsen. 21Ndegwa e mbwa nwen anga, fo ju edwam anga adia ekpengga mbwe bwangga ara. Tea atan a ge mbwa ara nwen hon ángá, ge mngoda ara zǝno ekǝnkǝn nya mbwe hon, adi ju eshanm a chu nobǝ a ge ti bwa ara a tswa zǝnchaje ángá. 22Ge té mò akan ngge nye. Asuswana, a ekpengga mo tsuruku ebgenm mo nye, tea ma di nye efwe. Ngge nya no a tswa tsuruku etenten, ende a cha tsuruku etenten mo nye a zǝn nye ángá, fwa ye ra. 23Atan enò, nya bgó m mò akan ra. M jan nye ebi, Àtà m a no nye egwa egwa mo mò a nye bgó adi ti mam. 24Ti bwa asuswana nye chà bgó nye mò adi ti m ra. Nye e bgó, nya ben evǝa tsuruku etenten mo nye a no embombo.”
Yeso è jan ge devǝ́ ara a chu zǝnchaje
25Kǝnggwa Yeso è jan, “M jan ara nye be mò ena adi hufwa. Engga nyabwa a ma jan m nye fwa adi hufwa efwe ra, ma jan nye fwa adi enggasansan a chu Àtà m hon. 26Nò eni, nya bgó ebgo adi ti mam. M jan m anga jan, ma bgó Àtà hon a chu nye ra. 27É yé, Àtà hon e chu ye dgyan nye anga adia nyè dgyan ara m, ngge nye tsǝ́ ara ekǝ̀n jan m̀ vǝ a zǝn Ehwya bwa ángá. 28Enò, m̀ vǝ a zǝn Àtà hon bwa kwa a tswa zǝnchaje, asuswana m gwa zǝnchaje twabǝ nya anga a zǝn Ata hon.”
29Kǝnggwa be etsonchi mo Yeso è jan, “Asuswana, o jan fwa anga enggasansan, fwa ye adi be hufwa ra. 30Asuswana je yi jan, o yi be mò binbin ngge o nda mbo ende e ká o eka sangǝ́ ra, adia o yi be mò a egwa egwa ka anga. Mò ena bwe je tsǝ́ekǝ̀n jan eshwen ò vǝ a zǝn Ehwya bwa.”
31Yeso è ká be eka jan, “Nye tsǝ́ ara ekǝ̀n asuswana? 32Tea ekpengga nyabwa, eshwen ge bwa fwa ara. Be bu a shan a gu nye, egwa egwa a nya efǝ mbwe. Binbin mo nye, nye twa a gwa m, m no juju m. Tea m fwa m jujum ra, adia Àtà m no ngge me.
33“M̀ jan gu ara nye be fwa ena evǝa a zǝn m nya ben adgye. A tswa zǝnchaje ena, nya ngǝ ekan. Tea nye e bonshi ekǝ̀n, m devǝ́ ara a chu zǝnchaje.”
Đang chọn:
Yohana 16: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
