Yohana 15
15
Yeso a tu enabi ebi hon
1“A me ma tu enabi ebi, Àtà m a yawa hon a ge. 2Ge senggwa be bu e no a ju m, ya e gwa be ga anga ra. Be bu e no a ju m ya e gwa bwi ga anga, ge tsase be anga evǝa be e tu e bi adi ga egwam hon gaten. 3A nye, nye no enacham a chu be fwa a m jan nye anga. 4Nye e no a tswa mam, ngge a me ma no a tswa mo nye. Bu mo tumo akan a gwa a ti ye ga mo chu ye ra kpwà tén ano ge no a ju tumo hon. A nye gaten, nye gwa a ti nye be ga ra, kpwà tén a no nye no a tswa mam.
5“Ma tu enabi hon, nye no be bu hon. Ende e no a tswa mam, m no anga a tswa mbwe, ga gwa be ga àywá. Adia ge ma fwa ye adi efka mam ra, nye bwe a ti nye mò akan ra. 6Ano ende akan no ye anga a tswa m ra, ga no abu bu mo tumo a be ti twafwa ara, e ngǝ́ ara. Be te a fǝn be yishwa bu tumo ena kpu a nggwa a fǝ̀, fǝ̀ hon de a gu be. 7Tea ano nye no a tswa mam ngge be fwa mam no a tswa mo nye, nya bgó egwa egwa mo mò a nye dgyan anga, ba no nye nó. 8Atan a nye gwa be ga àywá, Àtà m a ben egǝ̀n, be nobǝ a yi jan nya be etsonchi mam.
9“Abu Àtà hon dgyan m anga, a me gaten m dgyan nye. Nye e no a tswa edgyan mam. 10Ano nye tse be edon mam, nya no a tswa mo edgyan mam. Abu m̀ tse be edon mo Àtà m, ngge m no anga a tswa mo edgyan mbwe ángá. 11M̀ jan ara nye fwa ena evǝa vǝtsen mam ngge ḿ mo nye, e té mò akan. Ekǝnggwa, nya no ngge vǝtsen embombo. 12Ena a edon mam: Nye e dgyan sojunye abu m dgyan nye anga. 13Edgyan e twafǝ̀ nwone a ende akan e ti nya mbwe e no a chu be shushwa ye ángá fwa ye ra. 14Nye no be shushwa m, ano nye bwe be mò a m jan nye e bwe anga. 15M fǝ́ m nye be ya mochi mam efwe ra, adia ya mochi yi ye mò a yagwamo mu mbwe bwe anga ra. Tea m fǝ́ ara nye be shushwa m, adia binbin mo be mò a m̀ kǝ́n-ekǝnkǝ́n a zǝn Àtà m ángá, m jan ara nye. 16Nyè swa m a nye ra, m̀ swa nye a me, m du nye nye e ken e gwa be ga. Be ga a nya gwa ángá, a no a fwa efwam. Kǝnggwa Àtà hon a no nye egwa egwa mo be mò ya a nya bgó adi ti mam ángá. 17Ena a edon mam hon: Nye e dgyan sojunye.
Ya e tsǝ́ be ekǝ̀n ra, a ze nye
18“Ano zǝnchaje hon ze nye, nye e yi jan gè ze ara m sangǝ́ be chà ze nye. 19Ano nye no be nobǝ ya e yi be Ehwya ra, be nobǝ mo zǝnchaje hon a dgyan nye adia nye no abu be ángá. Tea, nye fwa nye ḿ mo zǝnchaje efwe ra, m swa nye gwa ara a je a tswa mo zǝnchaje hon. Ena a mò e bwe zǝnchaje ze nye anga. 20Nye e ka e ben be mò a m̀ jan nye ángá. M̀ jan nye jan, ‘Ya mochi twafǝ̀ ye yagwamo mu mbwe ra.’ Ano bè tswa m fí, ba tswa nye fí gaten. Ano bè tse be moetum mam, ba tse ḿ mo nye gaten. 21Ba bwe nye binbin mo be mò e dwana adia nye no be nobǝ mam ngge be yi be ende e tson m bwa ángá ra. 22Ano me è ma bwa jan m be fwa ra, bà a fwa be ngge ebgen ra. Tea asuswana adia m tú ara be abu ebgen no ángá, be fwa be ngge mò a be ti jan ti a vǝ́ chu be a chu ebgen mo be ra. 23Ende e ze m, ze anga Àtà m gaten. 24Ano me e chà bwe m be moeditanm a m̀ bwe a engga mo be, a nobǝ efki è chà bwe didi be ra ángá, gà a no ye jan be bwe ara ebgen ra. Tea asuswana be di gu ara be moeditanm ena, bi adi enò, bè ze m tangge Àtà m gaten. 25Mò hon ena no edefǝm ngge Fwaebam, e jan, ‘Bè ze m a kukwa.’
26“Atan a Ejanjwa hon a ma tson, nwene e no Engǝ́ e fijan ebi anga, vǝ a zǝn Àtà bwa ara, ga jan be nobǝ fwa a chu m. 27A nye gaten, ge no kenm nye e jan be nobǝ fwa a chu m, adia ti adi etkem mo mochi mam, nyè no kpwà ngge me.
Đang chọn:
Yohana 15: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
