Yohana 17
17
Yeso è bgó ebgo a chu ye
1Atan a Yeso è jan fwa ara be fwa ena ángá, gè takpa di zǝn a kpe nè bgó ebgo jan, “Àtà engga bwa ara, bwegǝ̀n Nwen o, evǝa Nwen o e bwe e gǝ̀n o. 2Adia o no ara ye emwentì a chu be nobǝ binbin, evǝa ge e no be ya ò kpu du ye a bu ángá, nya e no a fwa efwam. 3Nya e no a fwa efwam hon, a eyim mbo, Ehwya Akan tete e no ebi ngge Yeso Kristi a ò tson bwa ángá. 4M ti egǝ̀n bwa ara o a tswa zǝnchaje adi ebwekǝ̀nm mo binbin mo be mochi a ò no m me e bwe ángá. 5Asuswana, Àtà bwegǝ̀n m ngge egǝ̀n a m̀ no ge atan a m̀ no ngge bo a kpe, sangǝ́ bè chà tke zǝnchaje ángá.
Yeso bgó ebgo a chu be etsonchi mbwe
6“M fi o tú ara be ya ò kpu du m a bu a tswa zǝnchaje ángá. È bwa ekpe, bè no ḿ mbo, ò kpu be du m a bu, be tse ara fwa mbo. 7Asuswana be yi ara jan binbin mo be mò e no a bu m ángá, vǝ a zǝn o n chà bwa anga. 8M no ara be be fwa a ò no m ángá, be cha ara nó. Be yi tén adi ebi jan m vǝ a zǝn o bwa ngge be tsǝ́ekǝ̀n jan, o tson m bwa a bo. 9M bgó o anga a chu be. M bgó m ebgo hon anga a chu zǝnchaje ra. M bgó ebgo anga a chu be ya o kpu du m no a bu ángá, adia be no ḿ mbo ángá. 10Binbin mo be nobǝ a m no ngge be ángá a ḿ mbo, binbin mo be nobǝ ya e no ḿ mbo ángá a m mam ngge be ti egǝ̀n bwa m anga. 11Ma dgyen m fon a tswa zǝnchaje efwe ra, tea be chà no a tswa zǝnchaje ngge m nyabwa a zǝn o. A bo Àtà e fwa ye ngge ebgen a ju ye ra ángá, dgon se be a tswa echakpo mo ti mbo, ti nwone a ò no m ángá, evǝa be e no akan, abu a me ngge bo je no akan ángá. 12Atan a m̀ no ngge be ángá, m̀ dgon be ngge ti a ò no m ángá. Ben ye ende akan mo be e da ara ángá ra, kpwà nwone no ara ebwenyim jan ga tkò ángá. Gè tkò abu Fwaebam è jan ekpe ekpe ángá.
13“Asuswana m nyabwa a zǝn o. M jan fwa àywá ena anga atan a m chà no a tswa zǝnchaje ngge be, evǝa be e ben etkwa efom mam embombo a tswa mo be. 14M̀ jan ara be fwa mbo. Be nobǝ mo zǝnchaje ze be adia be fwa be ḿ mo zǝnchaje hon ra, abu m fwa m ḿ mo zǝnchaje ra ángá. 15M bgó m ebgo anga jan we kpu ara be a tswa zǝnchaje ra. Mò a m bgó anga, a we ti e vǝ́ be a bu mo Shetan. 16Be fwa be ḿ mo zǝnchaje ra abu m fwa m ḿ mo zǝnchaje ra ángá. 17Bwe be be e nga be nobǝ etsǝpepe adi efka mo ebi hon. Fwa mbo hon no ebi. 18M tson be kwa anga a tswa zǝnchaje abu ò tson m bwa a tswa zǝnchaje ángá. 19A chu be, m ti chu m no o enachacha evǝa a be gaten be e no enachacha efka mo ebi hon.
Yeso bgó ebgo anga a chu be ya e tsǝ́ekǝ̀n no ángá
20“Ebgó mam fwa ye a chu be etsonchi mam tete ra. Tea m bgó ebgo anga a chu be ye a tsǝ́ekǝ̀n a chu m, adi fwa mam a ba fo a zǝn be ángá. 21M bgó ebgo anga jan binbin mo be, be e no akan. Abu a bo, Àtà no anga a tswa ju m, ngge m no a ju o, be e no a tswa mo je gaten, evǝa zǝnchaje be e tsǝ́ekǝ̀n jan ò tson m bwa a bo. 22M no ara be egǝ̀n a o no m ángá abu be e no akan abu a me ngge bo je no akan ángá. 23Ma no a tswa mo be, a bo wa no a tswa mam. A be gaten be e no e tén abibi evǝa zǝnchaje e yi jan ò tson m a bo, ngge o dgyan be abu o dgyan m anga.
24“Àtà, m dgyan be ya o kpu du ara m a bu na, be e no ngge me adi zǝn a ma no ángá. Ngge be e di egǝ̀n mam, egǝ̀n hon a ò no ara m adia ò dgyan m sangǝ́ zǝnchaje e chà tke.
25“Àtà ebitete, bi adia zǝnchaje yi mbo ra ángá, m yi o, be etsonchi mam ena yi jan ò tson m bwa a bo. 26M fi o tú ara be. M no a fi o tú a bwi be anga evǝa edgyan a o no ngge ge a chu m ángá, e no a tswa mo be, tangge a me e chu m, me e no a tswa mo be gaten.”
Đang chọn:
Yohana 17: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
