Filib 1
1
Pol nɩ Timote puore nɩ a Filib tẽw kɩrɩta-nɩbɛ
1Pol nɩ Timote, na ɩ a Yeezu Kɩrɩta tõ-tõ-biir a, bɛlɛ nɛbɛ kʋ̀rɛ a sɛbɛ ŋa a Filib tẽw nɩbɛ bɛl za a Yeezu Kɩrɩta na ɩ bɛ pʋɔ a Naaŋmɩn nɩ-bʋʋrɛ pʋɔ a, bɛlɛ nɩ a bɛ kaarbɛ nɩ a bɛ dɩakɩr mɩnɛ. 2A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie.
A Pol puore na kʋ̀rɛ a Filib tẽw kɩrɩta-biir
3Mãa mɩ́ wa lɛb tɩɛrɛ a nyɩ yele a, ɩ̃ mɩ́ puore nɩ a ɩ̃ Naaŋmɩn yãanɩ. 4Kʋralɛ mãa wa puore kʋ̀rɛ nyɩ a, ɩ̃ mɩ́ puore nɩ nɩ nʋ̃ɔ̀, 5nyɩ na lãw nɩ mɛ̃ a Yel-nʋ̃ɔ̀ hieru ƴãw a zũú, a pɛr-tib daar za wa tɩ tɔ a dɩ̃a a. 6Ɩ̃ bɛ bʋ́nɛ nɩ a yel ŋa ɩ: a Naaŋmɩn na tĩ a tõ-vla ʋl a nyɩ zie a, ʋ na cãà na cow ʋ tɩ baarɩ a Yeezu Kɩrɩta lɛb-waa bibir. 7A sɛw na k'ɩ̃ɩ tɛr a tɩɛrʋ á ŋá taabɛ a nyɩ za ƴãw. Ɩ̃ tɛr'ɩ a nyɩ za tɩɛrʋ a ɩ̃ socir pʋɔ, bʋ̃ʋ n'ʋ vɛ̃, nyɩ za pʋɔ nɩ a maalʋ a Naaŋmɩn na kʋ̀ m a pʋɔ, a ƴɛrɛŋa ɩ̃ na be a gaso pʋɔ a, nɩ a lɛn daar ɩ̃ na mɩ́ zɛbr a Yel-nʋ̃ɔ̀ yel-mɩŋa zɛbr a. 8Naaŋmɩn dɩ n a ɩ̃ dãsɩɛ k'ɩ̃ɩ nɔnɛ nyɩ na nɩ a Yeezu Kɩrɩta nɔ̃wfʋ tɔr za.
9Ɛ́ a ɩ̃ puoru n'ɩ ŋa: kɛ́ a nyɩ nɔ̃wfʋ kɛrɛ dɔwlɛ nɩ bãwfʋ mɩŋa nɩ nyɛrʋ na vɩɛl ʋ za a, 10nyɩ tʋ̃ɔ́ mɩ́ bãw bom nɛ na vɩɛl a. Lɛ n'a nyɩ na vɩɛl nyɩ za, ɛ́ bɛ tɛr sãwna a Kɩrɩta waa bibir ɛ. 11A yel-mɩnʋ yel-vɩɛlɩ a Yeezu Kɩrɩta na maalɩ a nyɩ zie a na ɩ na nyɩ kpɛ naalʋ, a Naaŋmɩn yúor zɛwfʋ nɩ a ʋ danʋ ƴãw.
A Pol be n gaso pʋɔ ɛ́ a Yel-nʋ̃ɔ̀ cãà hiere cere
12Yɛbr i, ɩ̃ bɔbr'a kɛ́ nyɩ bãwnɩ a: a yele za na ta m a nɩ̃ɛ na ɩ a Yel-nʋ̃ɔ̀ hieri tɔl nidaa. 13A Ʋrɔm tẽw na-kpɛ̃ɛ-lɩɛrɛ yir za pʋɔ nɩ a ziir za a, nɩr za bãwnɩ a nɩ ƴɛrɛŋa, kɛ́ a Kɩrɩta ƴãw n'a ɩ̃ be a gaso pʋɔ. 14A ɩ̃ gaso pʋɔ pàwfʋ ɩ na yɛbr yaga zie ɓãá ƴãw bɛr tɩɛrʋ a Sore ƴãw, bɛ lɛb bãw ƴãw fãw bɛr dɛ̃bɩ̃ɛ za ɛ́ hiere a Naaŋmɩn ƴɛ̀rʋ.
15Sɩza n'a, nyuur'a bɛ mɩnɛ ɩrɛ nɩ mɛ̃ hiere a Kɩrɩta, tɛr'ɩ cier-taa tɩɛrʋ a ɩ̃ zie, ɛcɛ bɛ mɩnɛ hiere a Kɩrɩta nɩ tɩɛrʋ na vɩɛl a. 16A bɛ ŋa tone na nɩ nɔ̃wfʋ, bɛ bãw na k'ɩ̃ɩ be n a ka k'ɩ̃ɩ zɛb faa a Yel-nʋ̃ɔ̀. 17Ɛ́ a bɛl a, cier-taa yã n'a bɛ hiere nɩ a Kɩrɩta. A bɛ tɩɛrʋ bɛ vɩɛl ɛ, bɛ tɩɛr kɛ́ lɛ n'a bɛ na ɩ a ɩ̃ gaso pʋɔ pàwfʋ lɛb bãw wone mɛ̃.
18Ɛcɛ, a na ɩ m'ɩ ŋmɩn? Alɛ saa ŋmɛ̃ ŋmɩŋmɩn za a, tɩɛr-faar'a bɛ tɛr, bɩɩ yel-mɩŋa pʋɔ n'a bɛ be a, bɛ hier'ɩ a Kɩrɩta, ɛ́ nʋ̃ɔ̀ kpɩɛr mɛ̃ a al ƴãw. Mɔ̃ mɩ̀, ɩ̃ na cãà na cɩlɛ a al ƴãw. 19Bʋ̃ʋ n'ʋ vɛ̃, ɩ̃ bãw kɛ́ a na wa n nɩ faafʋ a ɩ̃ ƴãw a nyɩ puoru zũú, nɩ a Yeezu Kɩrɩta Vʋʋrʋ na sõwne mɛ̃ a zũú. 20Mɛ̃ a lɛ ɩ̃ na tɩɛrɛ kpɛ̃w za gùre nɩ a, ɩ̃ kʋ̃ nyɛ̃ vĩ towtow ɛ. Ɩ̃ bãwnɩ a na bɛ bʋ́nɛ zaa pʋrɩ mɩ̀ ɛ, a ƴɛrɛŋa nɩ kʋralɛ, a Kɩrɩta na nyɛ̃ nɩ danʋ a ɩ̃ nɩr ɩb za pʋɔ, alɛ saa ɩ a ɩ̃ cãafʋ pʋɔ n'a, bɩɩ a ɩ̃ kũu pʋɔ n'a a. 21Bʋ̃ʋ n'ʋ vɛ̃, mãa ƴãw a, a nyɔ-vʋʋrʋ n'ɩ a Kɩrɩta, ɛ́ a kũu bɛ ɩ loba a ɩ̃ zie ɩ. 22Ɛcɛ, mãa na na cãà tɛr yel-ɩra kãw a ɩ̃ cãafʋ pʋɔ a, a ka n'a ɩ̃ pãa bɛ bãw bʋ̃ʋ n'ʋ ɩ̃ na kaa ír ɛ. 23Ziir ayi n'a ɩ̃ àr'ɩ dɛ bɛ bãw ɛ: ɩ̃ bɔbr'a k'ɩ̃ɩ nãá kpi cen tɩ lãw nɩ a Kɩrɩta, lɛ n'a nãá vɩɛl tɩ zuo. 24Ɛcɛ a nyɩɩm ƴãw a, a cãà vʋʋrɛ a tẽw zu ka n'a fɛrɛ zuo. 25Ɩ̃ mɩŋa za bãwnɩ a na, ɩ̃ bãw na k'ɩ̃ɩ na be n be, ɩ̃ na be n be pɩɛlɩ nyɩ za, cãà sõwne nyɩ, nyɩ kɛrɛ dɔwlɛ ɛ́ tɛr nʋ̃ɔ̀ a nyɩ naaŋmɩn-sàwfʋ pʋɔ. 26Lɛ n'a mãa wa lɛb wa be a nyɩ zie a, a danʋ nyɩ na tɛr lãwnɩ a Kɩrɩta a, na kɛrɛ a mãa ƴãw.
27Alɛ saa ŋmɛ̃ ŋmɩŋmɩn a, nyɩ ɩ a nyɩ nyɔ-vʋʋrʋ tuur a Kɩrɩta Yel-nʋ̃ɔ̀, kɛ̀ mãa wa wa a nyɩ nyɛ́b bɩɩ mãa bɛ wa ka be a, mãa wone kɛ́ nyɩ lãw nɩ taa tɛr tɩɛr-been kpɛ̃w za, kɛ́ nyɩ lãw nɩ soci-been zɛbr a naaŋmɩn-sàwfʋ na yi a Yel-nʋ̃ɔ̀ pʋɔ a zɛbr, 28ɛ́ bɛ sàw a nyɩ dɔ̃ dem vʋ̃ɔ nyɩ pʋ̀lá zaa pʋrɩ ɛ, lɛ n'a a na wul bɛ kɛ́ bɛ bɔrɛ na, ɛcɛ a nyɩɩm be a faafʋ sɔ́r zu, ɛ́ a za yi a Naaŋmɩn zie. 29Bʋ̃ʋ n'ʋ vɛ̃, ʋ kʋ̀ nyɩ nɩ a maalʋ ŋa kɛ́ nyɩ tone a Kɩrɩta tome na bɛ ɩ a ʋ sàw-deb tɛwr a, ɛ́ mɩ̀ cãà ɩ a tuo nyɩ na wone a ʋ ƴãw, 30zɛbr'ɩ a zɛb-been nɛ nyɩ na nyɛ̃ ɩ̃ zɛb, ɛ́ nyɩ bãwnɩ ɩ̃ cãà zɛbr a.
Đang chọn:
Filib 1: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.