Filib 2
2
Nyɩ wone taa ɛ́ tɛr tʋɔra-siwru
1A na ɩ à ŋá a, nyɩmɛ wa sɩrɩ mɔwlɛ taa nyɩmɛ nɩ a Kɩrɩta na lãw taa a zũú a, nyɩmɛ wa kpaalɛ taa a nɔ̃wfʋ pʋɔ a, lãw-taa wa be be a Vʋʋrʋ Sõw pʋɔ a, nɔ̃wfʋ nɩ nɩbaal-zɔba wa be be a, 2nyɩɩm ɩ a ɩ̃ nʋ̃ɔ̀ paalɩ tɩ tɔ. Nyɩ ɩ a nyɩ socie lãw taa, a nyɩ nɔ̃wfʋ nɩ a nyɩ tɩɛrʋ, a ɩ been. Nyɩ bɔbr kɛ́ nyɩ lãw taa ɩ been. 3Nyɩ ta ɩrɛ bom nɩ cier-taa yã bɔbr'ɩ yúor ɛ. Ɛcɛ, nyɩ ɩrɛ nɩ tʋɔra-siwru, ɛ́ mɩ́ sàw kɛ́ a nyɩ taabɛ zuo nyɩ na. 4Ŋa za ta mɩ́ tɩɛrɛ ʋl yõ yele ɩ, ʋ mɩ̀ mɩ́ tɩɛrɛ a ʋ taabɛ yele. 5Nyɩ ɩrɛ à à ŋá a nyɩ cara pʋɔ, mɛ̃ a lɛ bɛ na mɩ́ ɩrɛ bɛlɛ wa lãw nɩ a Yeezu Kɩrɩta a.
6Ʋl na tɛr a naaŋmɩnʋ a pɛr-tib daar za a,
ʋ bɛ tɩ fɩɩrɩ ʋlɛ nɩ a Naaŋmɩn sɛw-taa ŋa tɛr bɛ sàwr'ɩ ɛ.
7Ʋ nɩ̃ɛ na tɩ yàalɩ ʋ tʋɔra,
ɛ́ de tõ-tõ-bie ŋmɛ̃a, ŋmɛ̃ mɛ̃ nɩsaal a,
ɛ́ a tɩ sãá a ʋ ŋmɛ̃a pʋɔ k'ʋʋ ɩ n nɩsaal.
8Ʋ siwr'ɩ ʋ tʋɔra lɩɛbɩ nɔ-sàwrɛ
tɩ kpi n, tɩ kpi n a da-gara zu kũu.
9Al zũú n'a Naaŋmɩn zɛw ʋ yaga za,
ɛ́ por ʋ yúor na yi zuo a yée za a,
10kɛ́ a Yeezu yúor ƴãwfʋ ƴãw,
bʋ̃-vʋʋrɩ za gbine dume
a salom zu, a tẽw zu nɩ a tẽw pile,
11ɛ́ bɛ za sàw yere
kɛ́ a Yeezu Kɩrɩta n'ɩ a Sore,
a Naaŋmɩn sãà yúor-vɩɛlʋ-danʋ ƴãw.
A kɩrɩta-nɩbɛ tõ-nʋɔr a tẽ-daa zu
12A na ɩ à ŋá a, ɩ̃ nɩ-nɔnɩ i, nyɩɩm na sàwr a ɩ̃ nʋɔr kʋralɛ a, nyɩ cãà ɩrɛ a lɛ ɩ̃ na mɩ́ wa be a nyɩ sɔgɔ a, ɛ́ mɩ̀ ɩrɛ gãw lɛ a ƴɛrɛŋa ɩ̃ na bɛ ka be a. Nyɩ tɛr zɔba nɩ mawfʋ tone nɩ a nyɩ faafʋ tome. 13Bʋ̃ʋ n'ʋ vɛ̃, Naaŋmɩn be n a nyɩ sɔgɔ tone, ʋlɛ n'ʋ mɩ́ ƴãw nyɩ bɔbr ɛ́ maalɛ bom nɛ na tu a ʋ pʋ-tɩɛrʋ a.
14Bom nɛ za nyɩ na ɩrɛ a, nyɩ ta ɩrɛ zɛbr'ɩ bɩɩ ŋmɩɛr'ɩ nɔkpɛn ɛ, 15lɛ n'a nyɩ kʋ̃ tɛr sãwna bɛ yere ɩ, ɛ́ vɩɛl ɩ Naaŋmɩn bibiir na bɛ tɛr faalʋ a, vʋʋrɛ nɩ a tẽ-daa zu nɩbɛ sɔgɔ na fa ɛ́ sãw bɛ za a, nyɩwrɛ a bɛ sɔgɔ mɛ̃ ŋmar-bie salom zu a, 16nyɩɩm na tɛr a nyɔ-vʋʋrʋ ƴɛ̀rʋ a: à ŋá n'a nyɩ na zɛw a ɩ̃ yúor a Kɩrɩta waa bibir, bʋ̃ʋ n'ʋ vɛ̃, a ɩ̃ tome nɩ a ɩ̃ hanʋ kʋ̃ ɩ zawla ɩ.
17Ɛ́ alɛ mɩ̀ saa na fɛr a ɩ̃ zɩ̃ɩ cir mɛ̃ de-kʋ̀b-bom, ƴãw pʋɔ a bàwr a nyɩ naaŋmɩn-sàw-deb na maalɛ kʋ̀rɛ a Naaŋmɩn a ƴãw a, ɩ̃ cɩlɛ na, ɛ́ cɩlɛ lãwnɩ a nyɩ za. 18Lɛ mɩ̀ n'a, a nyɩɩm, nyɩ cɩlɛ, ɛ́ lãwnɩ mɛ̃ cɩlɛ.
A Timote nɩ Epafoditɩ yele
19A Sore Yeezu wa sàw a, ɩ̃ tɩɛrɛ na kɛ́ ka nɩ blã blã a, ɩ̃ na tõ n a Timote a nyɩ zie, kɛ́ ʋlɛ wa lɛb wa n a nyɩ yele wa manɩ kʋ̀ m a, mãa mɩ̀ tʋ̃ɔ́ nyɛ̃ mɔwlʋ a pʋɔ. 20Alɛ bɛ ɩ a ʋl yõ a, ɩ̃ bɛ nyɛ̃ nɩr na tɩɛrɛ a nyɩ yele mɛ̃ a mãa a ɩ: 21bɛ za tɩɛrɛ nɩ a bɛl tɛwr yele, ɛ́ bɛr a Yeezu Kɩrɩta dem. 22Ɛcɛ, nyɩɩm tɛɛ za bãw nɩ lɛ a Timote na ŋmɛ̃ a: ʋ lãw nɩ mɛ̃ na tone a Yel-nʋ̃ɔ̀ hieru tome mɛ̃ bie na be ʋ sãà zie a. 23Ʋlɛ n'ʋ ɩ̃ tɩɛrɛ k'ɩ̃ɩ tõ a nyɩ zie, mãa dɛ wa nyɛ̃ a ɩ̃ yele tɛr niwn a. 24Mɔ̃ mɩ̀, ɩ̃ bãwnɩ a na, a Sore wa sàw a, ka nɩ blã a, ɩ̃ mɩŋa na wa n a nyɩ zie.
25Ɛcɛ, ɩ̃ nyɛ̃ na a sɛw k'ɩ̃ɩ lɛb bɛr a tɩ yɛb Epafoditɩ kʋ̀ nyɩ, ʋ ɩ n a ɩ̃ lãw-tõ-tɔ, ɛ́ lãw nɩ mɛ̃ a zɛbr pʋɔ, ʋl nyɩ na tɩ tɩr kʋ̀ m k'ʋʋ sõwne mɛ̃, a lɛn daar ɩ̃ na tɩ bɔbr ʋ a. 26Ʋ tɩ bɔbr'ɩ yaga za k'ʋʋ lɛb nyɛ̃ nyɩ za. Ʋ zɩnɛ na guur, nyɩ na wõ a ʋ bàalʋ a ƴãw. 27Sɩza n'a, ʋ tɩ ɩ n bàal cɛ blã na kpi. Ɛcɛ Naaŋmɩn zɔ n a ʋ nɩbaalʋ, ɛ́ a bɛ ɩ ʋl yõ n'ʋ ɛ, ʋ mɩ̀ zɔ n a ɩ̃ nɩbaalʋ, k'ɩ̃ɩ ta páw pʋ-sãwna dɔwlɩ pʋ-sãwna zu ɛ. 28Alɛ n'a so ɩ̃ páw lɛb bɛrɛ ʋ kʋ̀rɛ nyɩ, kɛ́ nyɩ tʋ̃ɔ́ nyɛ̃ ʋ cɩlɛ a ʋ ƴãw, ɛ́ a ɩ̃ pʋ-sãwna siwri blã. 29A na ɩ à ŋá a, nyɩ tuori nyɔw ʋ nɩ nʋ̃ɔ̀ a Sore ƴãw, ɛ́ nɔnɛ a nɩbɛ bɛ ŋa taabɛ, 30ʋ na tɩ cɛ blã na kpi a Kɩrɩta tome ƴãw a. Ʋ sàw nɩ a kũu, k'ʋʋ lɩɛrɩ nyɩ tõ a tome nyɩɩm mɩŋa nãá kʋ̃ʋ tʋ̃ɔ́ tõ a ɩ̃ ƴãw a.
Đang chọn:
Filib 2: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.