Zã 15
15
A Yeezu n'ɩ a divɛ̃ tɩ-sɩza
1«Mãa n'ɩ a divɛ̃ tɩ-sɩza ɛ́ a ɩ̃ Sãà n'ɩ a divɛ̃ tɩ-kʋ́ɔrɛ. 2Wule za, na be a ɩ̃ ƴãw, ɛ́ bɛ wɔnɛ a, ʋ mɩ́ cɛ ʋ na bɛr, ɛ́ wule za na wɔnɛ a, ʋ mɩ́ ɓɛlɓɛl'ɩ a wuli-ɓɛrmɛ bɛr k'ʋʋ tʋ̃ɔ́ wɔ̃ dɔwlɩ. 3Nyɩɩm a, nyɩ vɩɛl'a baarɩ, a kanʋ ɩ̃ na kanɩ nɩ nyɩ a ƴãw. 4Nyɩ lãwnɩ mɛ̃, mɛ̃ a lɛ ɩ̃ na lãw nɩ nyɩ a. Mɛ̃ a lɛ wule na kʋ̃ tʋ̃ɔ́ wɔ̃ wɔmɛ ʋ yõ, ʋlɛ bɛ wa nyɔw a tɩɛ a, lɛ n'a nyɩ kʋ̃ wɔ̃ wɔmɛ ɩ, nyɩmɛ bɛ wa lãw nɩ mɛ̃ a. 5Mãa n'ɩ a divɛ̃ tɩɛ ɛ́ nyɩmɛ n'ɩ a wuli. Ʋlɩ sob na lãw nɩ mɛ̃, ɩ̃ɩ lãw nɩ ʋ a, ʋ mɩ́ wɔ̃ n wɔmɛ yaga, mãa ƴãw sɩrɩ bɛ wa n'a a, nyɩ kʋ̃ tʋ̃ɔ́ ɩ bom za ɩ.
6Nɩr bɛ wa lãw nɩ mɛ̃ a, bɛ na lɔb ʋ na bɛr yẽw mɛ̃ a tɩɛ wule a, ʋ ko, ɛ́ a wuli-kon a, bɛ mɩ́ wob a na lɔb ƴãw vũumí a dɩ. 7Nyɩmɛ wa lãw nɩ mɛ̃ ɛ́ tɛr a ɩ̃ ƴɛ̀rʋ a, nyɩ zɛlɩ a ʋlɩ bom nɛ nyɩ na bɔbr a, ɛ́ nyɩ na páw ʋ na. 8À ŋá n'a a ɩ̃ Sãà yúor mɩ́ yi, nyɩ na mɩ́ wa wɔnɛ wɔmɛ yaga, ɛ́ wul à à ŋá kɛ́ nyɩ ɩ n a ɩ̃ po-tuurbɛ a. 9Mɛ̃ a lɛ a Sãà na nɔ̃w mɛ̃ a, lɛ n'a ɩ̃ mɩ̀ nɔ̃w nyɩ. Nyɩ be a ɩ̃ nɔ̃wfʋ pʋɔ. 10Nyɩmɛ wa sàwr a ɩ̃ nɛ-ƴãwnɩ a, nyɩ na be n a ɩ̃ nɔ̃wfʋ pʋɔ, mɛ̃ a lɛ ɩ̃ na sàw a ɩ̃ Sãà nɛ-ƴãwnɩ ɛ́ be a ʋ nɔ̃wfʋ pʋɔ a.»
11«Ɩ̃ yel'ɩ à à ŋá kʋ̀ nyɩ kɛ́ a nʋ̃ɔ̀ na kpɩɛr mɛ̃ a, ʋ mɩ́ kpɩɛr nyɩ, ɛ́ a nyɩ nʋ̃ɔ̀ tʋ̃ɔ́ vɩɛl ʋ za. 12A ɩ̃ nɔ-ƴãwna n'ɩ ŋa: nyɩ nɔnɛ taa mɛ̃ a lɛ ɩ̃ na nɔ̃w nyɩ a. 13Nɔ̃wfʋ bɛ lɛb ka be ɩ kpɛ̃ɛ zuo a fʋ bárɩ fʋ na nɔ̃w tɩ de a fʋ nyɔ-vʋʋrʋ tɩr a bɛ ƴãw a ɩ. 14Nyɩ ɩ n a ɩ̃ bárɩ nyɩmɛ wa maalɛ a lɛ ɩ̃ na ƴãw a nʋɔr kʋ̀ nyɩ a. 15Ɩ̃ bɛ cãà bʋɔlɛ nyɩ tõ-tõ-biir ɛ, a tõ-tõ-bie na bɛ bãw ʋlɩ bom nɛ a ʋ nɩ-kpɛ̃ɛ na ɩrɛ a ƴãw. Ɩ̃ bʋɔlɛ nyɩ nɩ bárɩ, ɩ̃ na ɩ nyɩ bãw a yele al za a ɩ̃ Sãà na wul mɛ̃ a. 16Nyɩmɛ bɛ nɛbɛ kaa ír mɛ̃ ɩ, mãa n'ʋ kaa ír nyɩ, ɛ́ ƴãw kɛ́ nyɩ cen tɩ wɔ̃ wɔmɛ, ɛ́ a nyɩ wɔmɛ be kʋralɛ. Lɛ n'a a ɩ̃ Sãà na kʋ̀ nyɩ bom nɛ za nyɩ nãá zɛlɛ a ʋ zie a ɩ̃ yúor ƴãw a. 17A nʋɔr ɩ̃ na ƴãwnɛ kʋ̀rɛ nyɩ a, ʋlɛ n'ɩ kɛ́ nyɩ nɔnɛ taa.»
A tẽ-daa hɩ̃ɛn nɩ a Yeezu nɩ a ʋ po-tuurbɛ
18«A tẽ-daa wa hɩ̃ɛn nyɩ a, nyɩ bãw kɛ́ mãa n'ʋ ʋ tɩ dãw de niwn hɩ̃ɛn. 19A tẽ-daa tɩ so nyɩ a, ʋ nãá nɔnɛ nɩ a ʋ bʋ̃-sora, ɛcɛ a tẽ-daa bɛ so nyɩ ɛ. Mãa n'ʋ kaa ír nyɩ a tẽ-daa zu, nyɩ be nyɩ tʋɔra, alɛ so a tẽ-daa hɩ̃ɛn nyɩ. 20Nyɩ lɛb tɩɛrɩ a ƴɛ̀r-bir ŋa ɩ̃ na tɩ yel kʋ̀ nyɩ a: “Tõ-tõ-bie bɛ zuore a ʋ nɩ-kpɛ̃ɛ ɩ.” Bɛlɛ wa dɔwrɩ mɛ̃ a, bɛ mɩ̀ na dɔwrɩ nyɩ na, bɛlɛ wa sàw de a ɩ̃ ƴɛ̀rʋ a, bɛ mɩ̀ na sàw na de a nyɩ dem. 21Bɛ na ɩ nyɩ nɩ à á ŋá za a mãa yúor ƴãw, bɛ na bɛ bãw a sob nɛ na tõ m a ƴãw. 22Mãa bɛ tɩ wa a, mãa bɛ tɩ ƴɛ̀r sɔw bɛ a, bɛ kʋ̃ʋ tɩ tɛr yel-bier ɛ, ɛcɛ a ƴɛrɛŋa a, a bɛ yel-bier bɛ lɛb tɛr zɛlɩ bɛr ɛ. 23Sob nɛ na hɩ̃ɛn mɛ̃ a, mɩ̀ hɩ̃ɛn nɩ a ɩ̃ Sãà. 24Ɩ̃ tõ n tome a bɛ sɔgɔ nɩsaalɛ za na bɛ tõ a. Mãa bɛ tɩ tõ a tome á ŋá a, bɛ kʋ̃ʋ tɩ tɛr yel-bier ɛ, ɛcɛ ƴɛrɛŋa bɛ na nyɛ̃ a a, bɛ cãà na hɩ̃ɛn mãa nɩ a ɩ̃ Sãà. 25Ɛcɛ à á ŋá za ɩ na kɛ́ a ƴɛ̀r-bir ŋa na sɛb a bɛ Naaŋmɩn wulu sɛbɛ pʋɔ a tʋ̃ɔ́ tu: “Zawlalɛ n'a bɛ tɩ hɩ̃ɛn mɛ̃#15:25 Nyɛ̃ Ssy 35.19, 69.5..” 26Ɩ̃ na kʋ̀ nyɩ nɩ Gùre na na yi a ɩ̃ Sãà zie a. Ʋlɛ n'ɩ a yel-mɩŋa Vʋʋrʋ na yi a ɩ̃ Sãà zie a. Ʋlɛ wa wa a, ʋl mɩŋa na dɩ n a ɩ̃ dãsɩɛ. 27Ɛ́ a nyɩɩm mɩ̀, nyɩ na dɩ n a ɩ̃ dãsɩɛ, nyɩ na be a ɩ̃ zie a pɛ-tib daar za a ƴãw.»
Đang chọn:
Zã 15: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
