Zã 14
14
A Yeezu n'ɩ a Naaŋmɩn Sãà zie cenu sɔ́r
1A Yeezu tɩ yel bɛ na: «Nyɩ ta ɩ a nyɩ tɩɛrʋ damnɛ nyɩ ɛ: nyɩ sàw na de a Naaŋmɩn, nyɩ mɩ̀ sàw de m. 2Ziir yaga be n a ɩ̃ sãà yir pʋɔ, alɛ bɛ tɩ ɩ lɛ a, ɩ̃ nãá tʋ̃ɔ́ na yel k'ɩ̃ɩ cere na k'ɩ̃ɩ tɩ cɔbrɩ zie bɛr nyɩ ɩ? 3Ɛ́ mãa wa cen tɩ cɔbrɩ a zie bɛr nyɩ baar'a, ɩ̃ na lɛb'a wa wa tɛr nyɩ, ɛ́ a be ɩ̃ na be a, be n'a nyɩ mɩ̀ na be. 4Ɛ́ a be ɩ̃ na cere a, nyɩ bãw nɩ a sɔ́r.» 5Toma tɩ yel ʋ na: «Sore e, tɩ bɛ bãw a be fʋ na cere a ɩ, ɛ́ ŋmɩŋmɩn n'a tɩ na tʋ̃ɔ́ bãw a sɔ́r?» 6A Yeezu yel ʋ: «Mãa n'ɩ a sɔ́r, a yel-mɩŋa nɩ a nyɔ-vʋʋrʋ. Nɩr za kʋ̃ tʋ̃ɔ́ cen a Naaŋmɩn Sãà zie, a bɛ ɩ mãa zie k'ʋ tu ɛ. 7Nyɩmɛ wa bãw mɛ̃ a, nyɩ mɩ̀ na bãw nɩ a ɩ̃ Sãà, nyɩ bãw ʋ na baarɩ mɩ̀, ɛ́ nyɛ̃ ʋ.»
8Filib tɩ yel ʋ na: «Sore e, wul tɩ a Sãà, ɛ́ a na sɛw tɩ na.» 9A Yeezu yel ʋ: «Ɩ̃ be n a nyɩ zie tɩ cɛlɩ sɛw à ŋá za, ɛ́ fʋ cãà bɛ bãw mɛ̃ ɩ, Filib i? Ʋlɩ sob na nyɛ̃ m a, ʋ nyɛ̃ nɩ a Naaŋmɩn Sãà. Ŋmɩŋmɩn za n'a fʋ yel: “Wul tɩ a Naaŋmɩn Sãà?” 10Fʋ bɛ sàw k'ɩ̃ɩ lãw nɩ nɩ a ɩ̃ Sãà ɛ́ a ɩ̃ Sãà lãw nɩ mɛ̃ ɩ? A ƴɛ̀rʋ ɩ̃ na ƴɛ̀rɛ kʋ̀rɛ nyɩ a, mãa mɩŋa bɛ n'ʋ ŋmɛ nyãa ƴɛ̀rɛ ɩ. A ɩ̃ Sãà na kpɩɛr a ɩ̃ pʋɔ a tone nɩ a ʋl mɩŋa tome. 11Nyɩ sàw de m, ɩ̃ lãw nɩ nɩ a ɩ̃ Sãà, ɛ́ a ɩ̃ Sãà lãw nɩ mɛ̃. Nyɩmɛ bɛ wa sàwr dier a ɩ̃ ƴɛ̀rʋ a, nyɩɩm sàw de a tome á ŋá zũú. 12Yel-mɩŋa sɩza sɩza n'a ɩ̃ yere kʋ̀rɛ nyɩ, ʋlɩ sob na sàw de m a, ʋ mɩ̀ na tõ n a tome ɩ̃ na tõ a, ʋ na tõ n tõ-bɛrɛ gãw lɛ mɩ̀: ɩ̃ na cere a Naaŋmɩn Sãà zie a ƴãw. 13Bom nɛ za nyɩ na na zɛlɩ a ɩ̃ yúor ƴãw a, ɩ̃ na ɩ na, a ɩ̃ Sãà tʋ̃ɔ́ nyɛ̃ yúor-vɩɛlʋ-danʋ a Bie pʋɔ. 14Nyɩmɛ wa zɛlɛ bom a ɩ̃ zie a ɩ̃ yúor ƴãw a, ɩ̃ na ɩ na.»
A Sãà na tõ n a Vʋʋrʋ Sõw
15«Nyɩmɛ wa nɔnɛ mɛ̃ a, nyɩ na sàwr'ɩ a ɩ̃ nɛ-ƴãwnɩ vla. 16Ɩ̃ɩ na zɛlɩ nɩ a Naaŋmɩn Sãà ʋ kʋ̀ nyɩ Gùre ƴen sob ʋ be a nyɩ zie kʋralɛ. 17A yel-mɩŋa Vʋʋrʋ n'ʋ, a ʋl a tẽ-daa na kʋ̃ tʋ̃ɔ́ sàw de a, ʋ na bɛ mɩ́ nyɛ̃ ʋ, ɛ́ mɩ̀ bɛ bãw ʋ a ƴãw. Nyɩɩm bãw ʋ na, ʋ na kpɩɛr a nyɩ zie ɛ́ be a nyɩ pʋɔ a. 18Ɩ̃ kʋ̃ bɛr nyɩ nyɩ ɩ bi-kpebe ɩ, ɩ̃ na lɛb'a wa a nyɩ zie. 19Blã blã, ɛ́ a tẽ-daa kʋ̃ lɛb nyɛ̃ m ɛ. Ɛcɛ a nyɩɩm, nyɩ na nyɛ̃ m'a, ɩ̃ vʋʋrɛ, ɛ́ nyɩ mɩ̀ na vʋʋrɛ na. 20A ʋlɩ bibir nɛ a, nyɩ na bãw na k'ɩ̃ɩ lãw nɩ nɩ a ɩ̃ Sãà, kɛ́ nyɩ lãw nɩ mɛ̃ na, ɩ̃ɩ mɩ̀ lãw nɩ nyɩ.
21Ʋlɩ sob na sàwr a ɩ̃ nɛ-ƴãwnɩ ɛ́ tuur a vla a, a sob ŋa n'ʋ nɔnɛ mɛ̃. Ɛ́ ʋlɩ sob na nɔnɛ mɛ̃ a, a ɩ̃ Sãà na nɔnɛ ʋ na, ɩ̃ mɩ̀ na nɔnɛ ʋ na, ɩ̃ɩ na wul'ɩ ɩ̃ tʋɔra a ʋ sob.»
22A Zuda na bɛ ɩ a Zuda Ɩsɩkarɩɔtɩ a tɩ sowr'ʋ na: «Sore e, bʋ̃ʋ n'ʋ so a fɛr kɛ́ fʋ wul fʋ tʋɔra a tɩɩm, ɛ́ ta wul fʋ tʋɔra a tẽ-daa?» 23A Yeezu tɩ sɔw ʋ na: «Nɩr wa nɔnɛ mɛ̃ a, ʋ na tɛr'ɩ a ɩ̃ ƴɛ̀rʋ vla, a ɩ̃ Sãà na nɔnɛ ʋ na, ɛ́ tɩ na wa na wa kpɩɛr a ʋ sob zie. 24Nɩr na bɛ nɔnɛ mɛ̃ a, ʋ bɛ dier a ɩ̃ ƴɛ̀rʋ ɛ. Ɛcɛ a ƴɛ̀rʋ nyɩ na wone a, a bɛ yi mãa zie ɩ, a ɩ̃ Sãà na tõ m a zie n'a a yi. 25Ɩ̃ yel'ɩ a yele á ŋá kʋ̀ nyɩ, ɩ̃ na cãà be a nyɩ zie a. 26Ɛcɛ a Gùre, a Vʋʋrʋ Sõw, a Sãà na na bɛr k'ʋ wa a nyɩ zie, a ɩ̃ yúor ƴãw a, ʋl na wul nyɩ nɩ a za. Ʋ na lɛb'a sɩ̃w a nyɩ tɩɛrʋ a yele al za ɩ̃ na yel kʋ̀ nyɩ a ƴãw.
27Ƴã-ɓaarʋ n'a ɩ̃ bɛrɛ kʋ̀rɛ nyɩ, a ɩ̃ ƴã-ɓaarʋ n'a ɩ̃ kʋ̀rɛ nyɩ. Ɩ̃ bɛ kʋ̀rɛ nyɩ mɛ̃ a lɛ a tẽ-daa na mɩ́ tɩr a ƴã-ɓaarʋ a ɩ. Nyɩ ta ɩ pʋl-vʋ̃ɔ nɩ dɛ̃bɩ̃ɛ tɛr nyɩ ɛ. 28Nyɩ wõ n a lɛ ɩ̃ na yel kʋ̀ nyɩ a, ɩ̃ cere na, ɛ́ na lɛb wa a nyɩ zie. Nyɩmɛ tɩ nɔnɛ mɛ̃ a, nʋ̃ɔ̀ nãá ɩrɛ nyɩ na, ɩ̃ na cere a ɩ̃ Sãà zie a: a ɩ̃ Sãà ɩ n kpɛ̃ɛ zuo mɛ̃. 29Ɩ̃ yel'ɩ a yele á ŋá za kʋ̀ nyɩ a ƴɛrɛŋa, ɛ́ a bɛ ta sɛr ɛ, kɛ́ alɛ wa ta a, nyɩɩm sàw kɛ́ sɩza n'a. 30Dɩ̃a na ta a, ɩ̃ kʋ̃ lɛb ƴɛ̀r'ɩ nyɩ cɛlɩ ɛ, bʋ̃ʋ n'ʋ vɛ̃, a tẽ-daa ŋa nãà waar'a. Sɩza n'a, ʋ bɛ tɛr ɩ̃ yel-ɩra ɩ, 31ɛcɛ à ŋá n'a a tẽ-daa na bãw k'ɩ̃ɩ nɔnɛ nɩ a Sãà ɛ́ ɩrɛ a lɛn tɔr za a Sãà na ƴãw nʋɔr kʋ̀ m a. Nyɩ ìr tɩ cen!»
Đang chọn:
Zã 14: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
