Nɩ-toni 18
18
Korɛ̃tɩ tẽw Lãw-yir zɩɩlʋ
1Al pùorí, a Pol tɩ yi n a Atɛn cen Korɛ̃tɩ. 2Ʋ tɩ páw nɩ Zifʋ nɩr kãw, na dɩ kɛ́ Akɩlasɩ a, a be. Pɔ̃ n'a a Akɩlasɩ tɩ yi. A Ɩtali n'a ʋlɛ nɩ a ʋ pɔw Pɩrɩsɩl tɩ yi wa ta paalʋ. Kuloor, na tɩ so a Ʋrɔm a, tɩ ƴãw nɩ nʋɔr kɛ́ a Zifʋ mɩnɛ za yi zaa a Ʋrɔm. A Pol tɩ cen na tɩ páw bɛ. 3Ʋlɛ nɩ a bɛl na tɩ lãw tõ-nʋɔr wóbr pɛnɛ-sɛwr a, ʋ tɩ be n a bɛ zie tone. 4Pɩ̃ɛnʋ-bibir za, ʋ mɩ́ tɩ de nɩ a ƴɛ̀rʋ a puoru-dĩó, ƴãw fãw kanɛ kɛ́ a Zifʋ nɩ a Gɩrɛkɩ mɩnɛ sàw de a Yeezu yele.
5Ɛcɛ a Sɩlasɩ nɩ a Timote na tɩ yi a Masedʋan wa ta a, a Pol tɩ bɛr'ɩ bom za, ɛ́ tu a Yel-nʋ̃ɔ̀ hieru tɛwr pùor. Ʋ mɩ́ tɩ wul'a a sãá a Zifʋ mɩnɛ zie, kɛ́ a Yeezu n'ɩ a Kɩrɩta. 6Ɛcɛ bɛ na tɩ zawrɩ a sàw-deb ɛ́ tʋʋr a Pol a, ʋ tɩ pĩ n a ʋ bʋ̃-suuri uuru ƴãw bɛ ɛ́ yel: «Nyɩmɛ wa bɔr a, a bɛ yi mãa zie ɩ! Ɩ̃ zaa n'ɩ ŋa! Dɩ̃a na ta a, a nɩ-bʋʋr-yoru zie n'a ɩ̃ na cen.» 7Ʋ tɩ yi n a be ɛ́ cen dɔɔ kãw na dɩ kɛ́ Tisiyusɩ Zitisɩ a yir. A dɔɔ ŋa tɩ ƴãwnɛ nɩ a Naaŋmɩn. A ʋ yir tɩ gbab'ɩ a puoru-dĩo. 8Kɩrɩsɩpɩsɩ, na tɩ ɩ a puoru-dĩo nɩ-kpɛ̃ɛ a, tɩ sàw na de a Sore, ʋlɛ nɩ a ʋ yir dem za. A Korɛ̃tɩ tẽw nɩbɛ yaga, na tɩ bɛr wõ a Pol ƴɛ̀rʋ a, tɩ lɩɛb'ɩ a bɛ ɩb ɛ́ sàw de a Sore, ɛ́ bɛ kʋ̀ bɛ a suob.
9Tɩ̃ɩsɔw kãw, a Pol tɩ nyɛ̃ nɩ a Sore ʋ yel ʋ: «Ta zɔrɛ dɛ̃bɩ̃ɛ ɩ, cãà ƴɛ̀rɛ, taa bɛrɛ ɩ. 10Ɩ̃ sɩrɩ na be a fʋ zie. Lɛ so, nɩr za bɛ íre nũu tʋɔr'ɩ fʋ k'ʋʋ dɔwrɩ fʋ ɛ. Bʋ̃ʋ n'ʋ vɛ̃, ɩ̃ tɛr'ɩ nɩbɛ yaga a tẽ-kpɛ̃ɛ ŋa pʋɔ.» 11A Pol tɩ kpɛ n a be yũon-ɓil nɩ cuwr ayʋɔb, wule bɛ a Naaŋmɩn ƴɛ̀rʋ.
12A lɛn daar a Galɩɔ̃ na tɩ ɩ a Akayi tẽw kaarɛ a, a Zifʋ mɩnɛ za tɩ wa ìr'ɩ a Pol ƴãw, nyɔw ʋ cen nɩ ƴɛ̀rʋ-maalʋ zie. 13Bɛ tɩ ta na manɛ a ʋ sãwna yere nɩ: «Naaŋmɩn puoru na bɛ tu sɔ́r a pʋɔ n'a a nɩr ŋa tawr a nɩbɛ ƴãwn.» 14A Pol tɩ maal'a k'ʋʋ háa a nʋɔr, a Galɩɔ̃ ŋmãa de a ƴɛ̀rʋ sɔw yel a Zifʋ mɩnɛ: «Zifʋ mɩnɛ ɛ, alɛ tɩ kaar mɛ̃ ʋ kʋ n nɩr bɩɩ ʋ sãw nɩ nɔ-kpɛ̃ɛ kãw a, a nãá tɛr'ɩ sɔ́r k'ɩ̃ɩ bɛr wõ a nyɩ dem. 15Ɛcɛ a na ɩ nɔkpɛn na càarɩ ƴɛ̀r-bie, nɩ yée, nɩ a nyɩ wulu a, mãa bɛ bɔbr k'ɩ̃ɩ dɩ a yele á ŋá taabɛ ƴɛ̀rʋ ɛ.» 16Ɛ́ tɩ diw bɛ bɛr a ƴɛ̀rʋ-maalʋ zie be. 17Lɛ n'a bɛ za tɩ lɩɛb lo a Sɔsɩtɛn zu, nyɔw ʋ ŋmɩɛr a ƴɛ̀rʋ-dɩb zie be. Ʋlɛ tɩ n'ɩ a puoru-dĩo nɩ-kpɛ̃ɛ. Ɛcɛ a bɛ tɩ ɩrɛ a Galɩɔ̃ bom za ɩ.
A Pol lɛb'a cen a Ãtɩɔsɩ
18A Pol tɩ cãà na kpɛ a Korɛ̃tɩ kɔwrɩ. Al pùorí, ʋ tɩ bɛr'ɩ a yɛbr ɛ́ kpɛ gbor, ʋlɛ nɩ a Pɩrɩsɩl nɩ a Akɩlasɩ, cere a Siiri. A Pol tɩ ƴãw na bɛ fɔr ʋ zu Sãkire, nʋɔr kãw ʋ na tɩ kõ a zũú. 19Bɛ na tɩ ta Efɛɛzɩ a, a Pol bɛr'ɩ a Akɩlasɩ mɩnɛ ɛ́ tɔl kpɛ a Zifʋ mɩnɛ puoru-dĩó tɩ ƴɛ̀r'ɩ a Zifʋ mɩnɛ. 20Bɛ tɩ zɛlɛ na kɛ́ a Pol kpɛ a be kɔwrɩ. Ɛcɛ a Pol tɩ zawr'a, 21ɛ́ yel bɛ: «Naaŋmɩn wa sàw a, ɩ̃ na lɛb'a wa a nyɩ zie nɩdaar kãw.» Al pùorí, ʋ tɩ bɛr'ɩ a be ɛ́ kpɛ a gbor a Efɛɛzɩ 22tɩ siw a Sezaare, tɔl do tɩ puori a Zerizalɛm Lãw-yir, ɛ́ siw a Ãtɩɔsɩ. 23Ʋ tɩ kpɛ n a be kɔwrɩ blã. Al pùorí, ʋ tɩ yi na cɔlɩ Galasi tẽw vuo, ɛ́ cɔlɩ a Firizi, nyuwle a Yeezu po-tuurbɛ za naaŋmɩn-sàwfʋ.
Apɔlɔsɩ hiere nɩ a Yel-nʋ̃ɔ̀ a Efɛɛzɩ
24Zifʋ kãw, na dɩ Apɔlɔsɩ ɛ́ yi Alɛsãdiri a, tɩ wa ta n a Efɛɛzɩ. Ʋ tɩ bãw nɩ ƴɛ̀rʋ vla vla, ɛ́ bãw a Sɛb-sõw bɛ dɩ vuo ɩ. 25Ʋ tɩ bãw nɩ a Sore sɔ́r yele ɛ́ tʋlɛ a ƴãw, hiere wule a nɩbɛ a Yeezu yele. A ʋ wulu tɩ tori na, ɛcɛ, a Zã suob yõ n'ʋ ʋ tɩ bãw. 26Lɛ n'a ʋ tɩ ɓãá ƴãw hiere a Yeezu yele a Zifʋ mɩnɛ puoru-dĩó. Ɛcɛ a Pɩrɩsɩl nɩ a Akɩlasɩ na wa bɛr wõ a ʋ ƴɛ̀rʋ a, bɛ tɛr ʋ nɩ bɛ tɛwr zie tɩ manɩ kʋ̀ ʋ a lɛ a Naaŋmɩn sɔ́r yele na sɩrɩ tu a. 27A Apɔlɔsɩ na tɩ bɔbr k'ʋʋ cen a Akayi a, a yɛbr tɩ sàw na kʋ̀ ʋ, ɛ́ maalɩ sɛbɛ yel kʋ̀ a be dem Yeezu po-tuurbɛ, kɛ́ bɛ tɛr ʋ a sãanʋ vla. Ʋ na tɩ ta a be a, a bɛlɩ dem na tɩ sàw de a Yeezu yele a Naaŋmɩn maalʋ zũú a, ʋ sõw bɛ nɩ yaga za. 28Lɛ n'a ʋ mɩ́ tɩ ƴɛ̀r tʋ̃ɔ́ a Zifʋ mɩnɛ a nɩ-yaga pʋɔ. A Sɛb-son n'a ʋ mɩ́ tɩ de wul'ɩ bɛ kɛ́ a Yeezu n'ɩ a Kɩrɩta.
Đang chọn:
Nɩ-toni 18: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
