Nɩ-toni 17
17
A Pol nɩ a Zifʋ mɩnɛ guu nɩ taa Tesalonikɩ
1Bɛ tɩ tu na yi Ãfipolisɩ nɩ Apoloni ɛ́ ta Tesalonikɩ. A Zifʋ mɩnɛ tɩ tɛr'ɩ puoru-dĩo a be. 2Mɛ̃ a lɛ ʋ na mɩ́ tu a kʋralɛ a, a Pol tɩ cen na tɩ páw bɛ hieri a ƴɛ̀rʋ kʋ̀ bɛ pɩ̃ɛnʋ bibie ata tu taa. A Sɛb-sõw ƴɛ̀r-bie n'a 3ʋ mɩ́ tɩ de manɛ nɩ kʋ̀rɛ bɛ, ɛ́ wule kɛ́ a tɩ fɛr'a kɛ́ a Kɩrɩta wõ tuo tɩ kpi, ɛ́ lɛb yi a kũu pʋɔ. Ʋ tɩ yere na: «A Kɩrɩta a, ʋlɛ n'ɩ a Yeezu ŋa ɩ̃ na hiere kʋ̀rɛ nyɩ a.» 4A Zifʋ bɛ mɩnɛ nɩ a Gɩrɛkɩ bɛl na tu a Naaŋmɩn puoru sɔ́r a, mɩ̀ na bɛ dɩ vuo a, lãwnɩ a tẽw pʋɔ pɔw-tɩbr tɩbr, tɩ sàw na de ɛ́ tu a Pol nɩ a Sɩlasɩ pùor. 5Ɛcɛ a Zifʋ mɩnɛ tɩ nyɛ̃ nɩ suur bɛ dɩ vuo ɩ. Bɛ tɩ bʋɔl'ɩ a nɩ-guuri na cɔlɛ gʋɔr a sɛ́ɛ pʋɔ a, ɓã taa ɩrɛ nɩ gɔmɛ damnɛ nɩ a nɩbɛ, tɩ dam'ɩ a tẽw nyaw taa. Bɛ tɩ ta n Zazɔ̃ yir sowre a Pol nɩ a Sɩlasɩ. Bɛ tɩ bɔbr'a kɛ́ bɛ́ nyɔw bɛ cen nɩ a zu-sɛbla niŋé. 6Bɛ na tɩ bɔ a Pol nɩ a Sɩlasɩ gù a, bɛ nyɔw nɩ a Zazɔ̃ nɩ a yɛbr bɛ mɩnɛ cen nɩ a tẽw ƴɛ̀r-dɩrbɛ zie, tɩ ŋmɩɛr cɛlsɩ yere nɩ: «A nɩbɛ bɛ ŋa na dam a tẽ-daa za a, ƴɛrɛŋa a, bɛ be n a ka. 7Zasɔ̃ de bɛ nɩ a ʋ yir. A bɛ kãw za ɩ-ɩrɩ bɛ tu a nɛ́ɛ a Ʋrɔm tẽw na-kpɛ̃ɛ na ƴãw a ɩ. Bɛ yere na kɛ́ nãà kãw mɩ̀ lɛb'a be be dɩ kɛ́ Yeezu.» 8A cɛlsɩ á ŋá tɩ dam'ɩ a zu-sɛbla nɩ a ƴɛ̀r-dɩrbɛ, 9bɛ fɛr ƴãw a Zasɔ̃ nɩ a ʋ taabɛ bin libie ɛ́ bɛ bãw bɛr bɛ.
Beere tẽw dem sàw na de a Naaŋmɩn ƴɛ̀rʋ
10A zie na wa sɔb a, a yɛbr tɩ ƴãw nɩ a Pol nɩ a Sɩlasɩ lo Beere sɔ́r daadaalɛ. Bɛ na tɩ ta a Beere a, bɛ cen nɩ a Zifʋ mɩnɛ puoru-dĩó. 11A Beere tẽw Zifʋ mɩnɛ tɩ bãw nɩ yã zuo a Tesalonikɩ Zifʋ mɩnɛ. Bɛ tɩ sàw na de a Naaŋmɩn ƴɛ̀rʋ nɩ pʋ-pla, ɛ́ bibie za, bɛ mɩ́ jɛlɛ nɩ a Sɛb-sõw ƴɛ̀r-bie kɛ́ bɛ nyɛ̃, lɛ n'a a yele sɩrɩ tu u. 12A bɛ yaga zie tɩ sàw na de a Yeezu yele, lãwnɩ Gɩrɛkɩ pɔw-tɩbr nɩ dɛbr yaga. 13Ɛcɛ, a Tesalonikɩ tẽw Zifʋ mɩnɛ na dɛ wa wone kɛ́ a Pol lɛb hiere nɩ a Naaŋmɩn ƴɛ̀rʋ a Beere a, bɛ ìr'a wa kɛ́ bɛ lɛb wa maal dam a nɩbɛ. 14Daadaalɛ, a yɛbr tɩ ƴãw nɩ a Pol de a kʋ̃ɔ-kpɛ̃ɛ sɔ́r, ɛ́ a Sɩlasɩ nɩ a Timote cãà be a Beere. 15A bɛl na tɩ bɩɛlɛ a Pol a, tɩ tɛr ʋ na tɩ ta n Atɛn ɛ́ lɛb wa, ɛ́ a Pol tõ bɛ kɛ́ bɛ tɩ yel a Sɩlasɩ nɩ a Timote, kɛ́ bɛ wa fɔ̃w wa páw ʋ a Atɛn.
A Pol ƴɛ̀r'ɩ a Atɛn tẽw yã-bãwnbɛ zie
16A Pol na tɩ be a Atɛn cɛlɛ a Sɩlasɩ nɩ a Timote a, a ʋ pʋɔ tɩ sãw na ʋ na tɩ nyɛ̃ a tɩbɛ paalɩ a Atɛn tẽw a ƴãw. 17Ʋ mɩ́ tɩ kpɛ n a puoru-dĩó tɩ ƴɛ̀rɛ nɩ a Zifʋ mɩnɛ, nɩ a bɛl na tu a Naaŋmɩn puoru sɔ́r a. Ɛ́ bibir za ʋ mɩ́ yi a nɩbɛ tuor-taa zie tɩ àr ƴɛ̀rɛ nɩ nɩr za ʋ na nyɛ̃ a. 18Yã-bãwnbɛ bɛ mɩnɛ kãw, bɛ na bʋɔlɛ Epikiir nɩbɛ#17:18 Epikiir nɩbɛ: Bɛ ɩ n nɩbɛ na bɔbr a ƴã-gan nʋ̃ɔ̀ ɛ́ nɩɩrɛ a tuo bɛrɛ a. nɩ Sitoyisɩ̃ɛ mɩnɛ#17:18 Sitoyisɩ̃ɛ mɩnɛ: Bɛ ɩ n nɩbɛ na mɩ́ yel kɛ́ a nɩbɛ nyʋr nyɛɛ ɛ́ de a tuo a. a, mɩ̀ tɩ be n be ƴɛ̀rɛ nɩ a Pol. Bɛ mɩnɛ tɩ yere na: «Bʋ̃ʋ n'ʋ a gɔmɛ sob ŋa yere?» Ɛ́ bɛ mɩnɛ yere: «Ŋmɩn-sãanbɛ bɛ mɩnɛ kãw yele tɔ̃w n'a ʋ manɛ.» A Yeezu yele nɩ a kũu-pʋɔ-lɛb-yibu yele n'a a Pol tɩ hiere kʋ̀rɛ bɛ. 19Bɛ tɩ nyɔw ʋ na cen nɩ a Atɛn tẽw ƴɛ̀rʋ-dɩb-lãw nɩbɛ niŋé, bɛ na bʋɔlɛ kɛ́ Aaropaazɩ a, tɩ sowr'ʋ: «Tɩ na tʋ̃ɔ́ na bãw a wul-paala ŋa fʋ na wule a? 20Fʋ kpole tɩ nɩ tobe nɩ yel-bõ-bome kãw, tɩ bɔbr'a kɛ́ tɩ bãw a pɛr.» 21A Atɛn tẽw dem za, nɩ a nɩ-sãanbɛ na kpɩɛr a Atɛn a, mɩ́ tɩ nɔnɛ nɩ a yel-paalɛ al na bɩɛrɩ yi a manʋ nɩ a bɛr-wob. 22A Pol tɩ ìr'a àr a Aaropaazɩ nɩbɛ sɔgɔ ɛ́ yel: «Atɛn nɩbɛ ɛ, ɩ̃ nyɛ̃ nɩ a nyɩ yele za pʋɔ kɛ́ nyɩ puore na bɛ dɩ vuo ɩ. 23Ɩ̃ na cɔlɛ a nyɩ sɛ́ɛ pʋɔ ɛ́ jɩ́rɛ a nyɩ ŋmɩmɛ maalʋ-ziir a, ɩ̃ wa tɩ nyɛ̃ nɩ bàwr-maal-kuur bɛ sɛb a ʋ zu: “Ŋmɩn tɩ na bɛ bãw a so ʋ.” A bom ʋl nyɩ na ƴãwnɛ à à ŋá ɛ́ bɛ bãw a, ʋlɛ n'ʋ ɩ̃ waar k'ɩ̃ɩ wa yel kʋ̀ nyɩ. 24A Naaŋmɩn ʋl na ír a tẽ-daa nɩ a ʋ pʋɔ bome za a, a ʋl na ɩ a salom nɩ a tẽw Sore a, ʋ bɛ kpɩɛr nɩsaal nuru yir-mɩɛrɩ pʋɔ ɩ, 25ɛ́ mɩ̀ bɛ tɛr nɩsaal nuru yel-ɩra a ʋ tome ƴãw, mɛ̃ ʋ tɛr'ɩ bom kãw yel-ɩra a ɩ, ʋl na kʋ̀rɛ a nɩbɛ za a nyɔ-vʋʋrʋ, a pɩɛlʋ nɩ a ŋmãa al za na cɛ a. 26Nɩ-been yõ n'ʋ ʋ de maal'ɩ a nɩ-bʋʋrɛ za ƴãw bɛ kpɩɛr a tẽw za zu. Ʋ ƴãw nɩ daar kʋ̀ a nɩsaalbɛ, ɛ́ tʋ̃ɔ̀ a bɛ kpɛb zie tʋr-bɔwrɩ wul bɛ. 27À ŋá n'a a Naaŋmɩn tu, kɛ́ bɛ bɔblɛ bɔbr'ɩ ʋ, a mɩnɛ kãw bɛ nãà wa nyɛ̃ ʋ na, ʋl na bɛ zãá nɩ tɩ kãw za a. 28Ʋlɛ n'ʋ so tɩ ɩ nɩbɛ vʋʋrɛ ɛ́ damnɛ, ɛ́ be mɛ̃ a lɛ a nyɩ yã-bãwnbɛ bɛ mɩnɛ na yel a: “Tɩ ɩ n a ʋ bʋʋrɛ.” 29A na ɩ lɛ tɩ ɩ a Naaŋmɩn bʋʋrɛ a, a bɛ tɛr sɔ́r kɛ́ tɩ tɩɛrɛ kɛ́ a naaŋmɩnʋ ŋmɛ̃ na taa nɩ salm-zɩɛ, salm-pla bɩɩ kʋsɛ-vla tɩɩb nɩsaal bãwfʋ nɩ a ʋ yã na maalɩ a ɩ. 30Ɛcɛ a Naaŋmɩn vɩɛ nɩ a zɔnʋ daar yele á ŋá bɛr, ɛ́ pãa bʋɔlɛ a nɩsaalbɛ za a ziir za, kɛ́ bɛ za lɩɛbɩ a bɛ ɩb. 31Sɩza n'a, ʋ ƴãw nɩ bibir ʋ na na maal'ɩ a tẽ-daa ƴɛ̀rʋ na tu yel-mɩŋa a. Ʋ kaa na ír nɩr a ƴɛ̀rʋ-maalʋ ŋa ƴãw. À ŋá n'a ʋ tɩ ɩ a sãá a nɩbɛ za zie, a lɛn daar ʋ na tɩ ɩ a nɩr ŋa lɛb yi a kũuni pʋɔ a.»
32Bɛ na tɩ wone a kũu-pʋɔ-lɛb-yibu ƴɛ̀r-bir wa báarɛ a, bɛ mɩnɛ tɩ ɩrɛ ʋ na laar, ɛ́ bɛ mɩnɛ yere: «A na ta ka a, bibir kãw n'a tɩ na lɛb bãw bɛr wõ a fʋ ƴɛ̀rʋ a yel ŋa ƴãw.» 33À ŋá n'a a Pol tɩ bɛr bɛ ɛ́ cen. 34Ɛcɛ bɛ mɩnɛ tɩ tu n a Pol, bɛ tɩ sàw na de a Yeezu yele. Deni, na ɩ a ƴɛ̀rʋ-dɩb-lãw nɩr kãw a, nɩ pɔw kãw na dɩ Damaarisɩ a, nɩ bɛ mɩnɛ kãw tɩ pʋɔ nɩ a bɛl na sàw de a pʋɔ.
Đang chọn:
Nɩ-toni 17: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
