Nɩ-toni 19
19
A Pol ta n a Efɛɛzɩ hiere a Naaŋmɩn ƴɛ̀rʋ
1A lɛn daar a Apɔlɔsɩ na tɩ be a Korɛ̃tɩ a n'a a Pol tɩ tu Azi Mɩnɛɛr tan pʋɔ sɔ́r wa ta a Efɛɛzɩ. Ʋ tɩ nyɛ̃ nɩ po-tuurbɛ bɛ mɩnɛ a Efɛɛzɩ, 2sowri bɛ: «A lɛn daar nyɩ na tɩ sàw de a Yeezu yele a, nyɩ tɩ páw nɩ a Vʋʋrʋ Sõw ɩ?» Bɛ tɩ sɔw na yel ʋ: «Tɩ bɛ dãw wõ bɛ ƴɛ̀r Vʋʋrʋ Sõw ƴɛ̀rʋ ɛ!» 3A Pol tɩ lɛb'a sowri bɛ: «Ɛ́ suob buor'ʋ bɛ kʋ̀ nyɩ?» Bɛ tɩ sɔw na yel: «Zã suob'ʋ.» 4A Pol tɩ lɛb'a yel bɛ: «Ɩb-lɩɛbʋ suob'ʋ a Zã tɩ kʋ̀rɛ a nɩbɛ yere nɩ kɛ́ bɛ sàw de a ʋlɩ sob na be a ʋ pùorí waar a, a pɛr lɛ kɛ́ bɛ sàw de a Yeezu.» 5Bɛ tɩ bɛr'a wõ a Pol ƴɛ̀rʋ ɛ́ de a suob a Sore Yeezu yúor ƴãw. 6A Pol tɩ ír'ɩ nuru dɔwlɩ a bɛ zu, a Vʋʋrʋ Sõw siw bɛ, bɛ ƴɛ̀rɛ ƴɛ̀r-pɛ-bʋʋrɛ bɛ na bɛ tɩ dãw wone a, ɛ̀ ƴɛ̀rɛ naaŋmɩn-ƴɛ̀r-manbɛ ƴɛ̀rʋ. 7Bɛ za tɩ ta n nɩbɛ pie nɩ ayi.
8A Pol mɩ́ tɩ cen nɩ a puoru-dĩó tɩ ɓãá ƴãw ƴɛ̀rɛ a Naaŋmɩn Naalʋ ƴɛ̀rʋ. Cuwr ata n'a ʋ ƴãw fãw tu à à ŋá, kɛ́ a nɩbɛ na bɛrɛ wone a ʋ ƴɛ̀rʋ a, bɛ sàw de kɛ́ sɩza n'a. 9Ɛcɛ bɛ mɩnɛ tɩ kpãa nɩ tobr, ɛ́ zawrɩ a ƴɛ̀rʋ sàw deb ɛ́ sãwnɛ a Sore sɔ́r yúor a nɩbɛ pʋɔ. Lɛ so a Pol tɩ bɛr bɛ, ɛ́ bibir za, ʋ mɩ́ tɛr a po-tuurbɛ tɛwr kpɛ n a Tɩranɔsɩ nakol-yir tɩ kanɛ nɩ bɛ. 10À ŋá n'a a tu tɩ maalɩ yome ayi, a Azi tẽw nɩbɛ tʋ̃ɔ́ páw a Sore ƴɛ̀rʋ wõ, a Zifʋ mɩnɛ nɩ a Gɩrɛkɩ mɩnɛ.
Seva bidɛbr yele
11Naaŋmɩn mɩ́ tɩ tu n a Pol maalɩ nɔ-ɓãa-yele na bɛ tɛr manʋ a. 12Lɛ so bɛ mɩ́ tɩ de niwn-pɛn-fɩɛlɩ, bɩɩ pɛnɛ na tɔ a Pol ƴã-gan a, tɩ dɔl pàw a bàalbɛ. A bàalbɛ mɩ́ tɩ sanɩ na, ɛ́ a kɔ̃tɔ̃-faar yi ɛ́ bɛr bɛ. 13Zifʋ bɛ mɩnɛ kãw na mɩ́ tɩ diwr kɔ̃tɔmɛ cɔlɛ nɩ a, mɩ̀ wa tɩ ìr'a pore a Sore Yeezu yúor ƴãwnɛ a kɔ̃tɔ̃-ìrbɛ. Bɛ mɩ́ tɩ yel'ɩ a kɔ̃tɔ̃-faar: «A Yeezu ŋa a Pol na hiere a yúor ƴãw, nyɩ yi!» 14À ŋá n'a Zifʋ bàwr-maal-kara kãw, na dɩ Seva a, tɩ tɛr bibiir ayopõi bɛ ɩrɛ à à ŋá. 15Bibir kãw, a kɔ̃tɔ̃-faa wa tɩ yel bɛ na: «A Yeezu a, ɩ̃ bãw ʋ na, ɛ́ mɩ̀ cãà lɛb bãw a Pol. Ɛ́ a nyɩɩm, ã-mɩnɛ n'ɩ nyɩ?» 16A kɔ̃tɔ̃-ìre tɩ ìr'a lo a bɛ za zu, tʋ̃ɔ́ bɛ za ɛ́ pɔb bɛ faa faa, bɛ wa tɩ yi a ʋ yir zɔ n pɛ-zawlɛ, ɛ́ ɩ natɩɛ tɛwr. 17A Efɛɛzɩ tẽw nɩbɛ za, a Zifʋ mɩnɛ nɩ a Gɩrɛkɩ mɩnɛ za, tɩ wõ n a yel ŋa. Dɛ̃bɩ̃ɛ tɩ nyɔw nɩ bɛ za. Bɛ tɩ danɛ nɩ a Sore Yeezu yúor na ɩ kpɛ̃ɛ a. 18A kɩrɩta-nɩbɛ yaga mɩ́ tɩ wa na wa háa nʋɔr wo a bɛ ɩ-faar. 19Nɩbɛ yaga na tɩ tɛr a sɔ-ɩb a, tɩ wob'ɩ a bɛ sɛbr ɓã taa nyɩw bɛr a nɩbɛ za niŋé. Bɛ na wa man a sɛbr á ŋá daarʋ a, bɛ nyɛ̃ na a ta salm-zɩɛ libie tùr-lɩz'a ayi nɩ pie (50 000). 20À ŋá n'a a Sore fãw zũú, a Naaŋmɩn ƴɛ̀rʋ tɩ yɛ́rɛ pàwr a be za. Ɛ́ a mɩ́ tɩ sãá kɛ́ a ƴɛ̀rʋ ŋa tɛr'ɩ fãw.
A damnʋ na dam a Efɛɛzɩ a
21A yele á ŋá pùorí, Vʋʋrʋ Sõw tɩ caal'ɩ a Pol ʋ yel k'ʋʋ na tu na yi Masedʋan nɩ Akayi ten pʋɔ cen Zerizalɛm. Ʋ tɩ yere na: «Mãa wa ta a be a, a mɩ̀ na fɛr'a k'ɩ̃ ta a Ʋrɔm.» 22Lɛ n'a ʋ tɩ tõ a ʋ sõw-sõwnbɛ ayi kãw, Timote nɩ Erasɩ, a Masedʋan. Ɛcɛ a ʋl tɔr za tɩ cãà na kpɛ a Azi kɔwrɩ blã. 23A vuo nɛ pʋɔ n'a a Efɛɛzɩ tɩ dam yaga yaga a Sore sɔ́r yele ƴãw. 24Dɔɔ kãw tɩ be n be dɩ Demetiriyisi, ɛ́ tɩ maalɛ salm-zɩɛ bome. Ʋ mɩ́ tɩ nyɩl'ɩ a salm-zɩɛ maal'ɩ yili na ŋmɛ̃ taa nɩ a ŋmɩn-pɔw Atemisɩ yir a. À ŋá n'a ʋ tɩ ɩrɛ nyɛrɛ tɔnɛ kʋ̀rɛ a bɛlɩ dem na tɩ tone nɩ a bɛ nuru a. 25Ʋ tɩ bʋɔl'ɩ a nɩbɛ bɛ ŋa ɓã taa, lãwnɩ a bɛlɩ dem a tome na ŋmɛ̃ taa nɩ a bɛ dem a, ɛ́ yel bɛ: «Ɩ̃ bá mɩnɛ ɛ, nyɩɩm mɩŋa za bãwnɩ a na, a tõ-nʋɔr ŋa pʋɔ n'a a tɩ tɛra yi. 26Ɛcɛ nyɩ nyɛ̃ a na, bɩɩ nyɩ wõ a na: a Pol ƴɛ̀rʋ damnɛ nɩ nɩ-yaga yaga a Efɛɛzɩ ka, tɩ faar na ta n a Azi za. Ʋ ɩ na a nɩbɛ sàw kɛ́ a ŋmɩmɛ tɩ na maalɛ nɩ a tɩ nuru a, ɛ́ a bɛ ɩ ŋmɩmɛ ɩ. 27A na ɩrɛ nɩ à ŋá, bɛ kʋ̃ʋ wa cãà ƴɛ̀rɛ vla a tɩ ton ŋa ƴãw ɛ. Ɛ́ lɛb waar, a tɩ ŋmɩn-pɔw-kpɛ̃ɛ Atemisɩ yir kʋ̃ cãà tɛr yúor ɛ. Ɛ́ alɛ wa ɩ à à ŋá a, a ŋmɩn-pɔw ŋa kʋ̃ cãà tɛr yúor ɛ, ʋl bɛ na puore ɛ́ ƴãwnɛ a Azi ka nɩ a tẽ-daa za zu a.» 28Bɛ na wa wõ à ŋá a, bɛ nyɛ̃ nɩ suur ɛ́ cɩɩrɛ bɛ tɛr bɛ́rʋ daar ɛ, yere nɩ: «A Efɛɛzɩ Atemisɩ ɩ n kpɛ̃ɛ!» 29A damnʋ tɩ dam'a pàw a tẽw za. A zu-sɛbla tɩ darɛ nɩ taa zɔrɛ wɩɛr'ɩ a dɩ̃ɛnʋ yir-kpɛ̃ɛ pʋɔ. Bɛ tɩ ŋmãa na nyɔw Gayisɩ nɩ Arɩsɩtakɩ na yi Masedʋan, ɛ́ tɩ bɩɛlɛ a Pol a ʋ cɔlʋ pʋɔ a. 30A Pol tɩ ìr'a yel k'ʋʋ na cen nɩ a zu-sɛbla zie be, ɛcɛ a po-tuurbɛ tɩ piw ʋ nɩ sɔ́r. 31A Azi tẽw tõ-tõ-nɩ-bɛrɛ bɛ mɩnɛ kãw, na tɩ ɩ a Pol bárɩ a, tɩ tõ na bɛ tɩ yel ʋ k'ʋʋ taa wa burbure yel k'ʋʋ cere nɩ a dɩ̃ɛnʋ yir-kpɛ̃ɛ nɛ pʋɔ ɩ. 32A be a, ŋa mɩ́ tɩ àr'a kɔw a ʋ tɔ ɛ́ cɩɩrɛ ƴɛ̀r-bie kãw, ɛ́ a ʋ tɔ mɩ̀ vaa kɔkɔr cɩɩrɛ bʋ̃-yoru, a dɛ tɩ ɩ gɔmɛ cɩlwɩlɩ a be za! A bɛ yaga zie bɛ tɩ bãw bom nɛ ƴãw bɛ na ɓã taa mɩ̀ a ɩ. 33Nɩbɛ kãw, a zu-sɛbla pʋɔ, wa tɩ manɩ nɩ a yele pɛr kʋ̀ dɔɔ kãw na dɩ Alɛsãdɩr a, a Zifʋ mɩnɛ na tɩ dáa ƴãw a yele niŋé a. A Alɛsãdɩr tɩ zɛw nɩ nũu kabrɩ yel a zu-sɛbla, kɛ́ bɛ bɛr gɔmɛ ʋ tʋ̃ɔ́ manɩ a pɛr kʋ̀ bɛ. 34Ɛcɛ bɛ na wa bãw kɛ́ a Alɛsãdɩr ɩ n Zifʋ a, bɛ za tɩ lãw na cɩɩrɛ mɛ̃ nɩ-been a, tɩ ta tɛm gbele ayi. Bɛ tɩ yere na: «A Efɛɛzɩ Atemisɩ ɩ n kpɛ̃ɛ!»
35A tẽw sɛ-sɛbrɛ tɩ wa nanɩ na ɓaalɩ a nɩbɛ bɛ bɛr a gɔmɛ, ʋʋ yel bɛ: «Efɛɛzɩ tẽw nɩbɛ ɛ, ãa n'ʋ bɛ bãwnɩ a, a Atemisɩ tẽ-sõw na n'ɩ a Efɛɛzɩ a? A Atemisɩ dasule na yi a salom zu wa lo a, ãa n'ʋ mɩ̀ cãà bɛ lɛb bãwnɩ a? 36Bʋnʋ bɛ wa ka be a ka a, nyɩɩm nyɔw nyɩ tʋɔra bɛr a damnʋ, ɛ́ gù taa wa tone dãbol-tome ɩ. 37A nɩbɛ bɛ ŋa nyɩ na tɛr wa n a ka a, bɛ bɛ tɔ bʋ̃-kãw za a ŋmɩmɛ yie pʋɔ ɩ, ɛ́ bɛ lɛb tʋ a tɩ ŋmɩn-pɔw zʋm ɛ. 38Demetiriyisi nɩ a nuru tõ-tonbɛ na tu a ʋ pùor a, bom wa be bɛlɛ nɩ nɩr cara pʋɔ a, ƴɛ̀rʋ-maalʋ zie be n be, ƴɛ̀r-maalbɛ be n be, bɛ cen a be bɛ tɩ bãw a yel-mɩŋa kʋ̀ bɛ. 39Ɛ́ nyɩmɛ wa cãà tɛr bom bɔbr kɛ́ nyɩ bãw a pɛr a, a ƴɛ̀rʋ-dɩb-lãw na tu n a lɛ a na sɛw kɛ́ a tu a kʋ̀ nyɩ. 40A kpaa-taa ŋa tɩ na àr'ɩ a dɩ̃a a, bɛ na tʋ̃ɔ́ na yel kɛ́ a tẽw nãà ŋmɛ-lɔbrʋ n'a tɩ bɔbr. Yel-mɩŋa za bɛ ka be tɩ na tʋ̃ɔ́ manɩ wul kɛ́ a ɓã-taa ŋa sɛw na ɩ.» 41Ʋ na wa ƴɛ̀r à à ŋá baar'a, ʋ ƴãw nɩ a zu-sɛbla bɛ yaarɩ lɛb kule.
Đang chọn:
Nɩ-toni 19: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
